Read Ninia Yali 1 TESALONIKA 3 Bible Online

1 TESALONIKA 3 - Ninia Yali bible

1 TESALONIKA 3

¹ Aireg ma, ekenim we bok welam fug ale nenepuk en, an namu o Atena etma wereg kweleg,

²at Timotius nenare Allah amingming angge Fano Wene Kristus duruk katsi wene ninim hweag-hesauk kahe anyo, it ap homi en siahap nenepuk fam, wene ai, “Nenerim,” ulug, embesehep ha no, hit Kristus fam dip-deberuk kwit, welamag ulug henomamne apdoho henobahakeg, hit henenda aho ware henobahakeg, dukwag ulug, mon-hesa waharuhuk anyo. Airoho siahap nenepuk ai, Allah en “Enebukwag,” boruk ale higitdoho nenepuk.

⁴Hit ninim wereg lit, owan nenepuk eleg kweleg, “Siahap nenepuk kamuhup,” ulug, hweag-hesauk katuhuk anyo dip-isi ai, henoluk.

⁵Aireg ma, an ekenim we bok welam fug ale napuk en, at Iblis anyo en hit henenda kahalikoho angge fahet, “Nit wene alemaroho hweag-hesauk katuhuk ane aho!” bolug, nenenda firig wereg lit, hit Kristus obam dip-deberuk kahep anyo keroho wereg an noluk amag ulug, ap Timotius mon-hesa waharihik anyo.

⁶ Ketia neg de, at Timotius hit weregman nit nesa wahasireg henebug fano on hit Kristus obam dip-deberuk kahep ale inim, ap homi hinim henenda hundig enepuk kahep ale nim, ne, niren, “Ninim ambi ala e!” boruk kahe hag, hiren oho airoho boruk kwit, hundig-hundig henenda fano fam ebet-nenepuk kahep ale inim, mundoho hweag-nesa wahasi.

⁷Nori, nerekwi. Asingsing basingsingdoho anggin on nenobam atuk kweleg, hit Kristus fam dip-debelug dil noruk kahep ale hweag-nesa wahasi fam nenenda yuwag atsi.

⁸Hit Tuhan henenda hundig wereg lit, henenda mundoho elek duk fug angge welahep halug, an nenda anggin en wat-dahuk eleg. Nahayeg wereg lit, dil noruk karuhuk.

⁹At Allah il wereg kweleg, hit dil noruk hesalug, nit nenahayeg humon nenepuk mu Allah dang-duruk kahe.

¹⁰Hit henenda Kristus obam dip-deberuhup famen de, owan hag deg ai en, nit nenebe henobam henekit watlug, henenda aho ware henobahaik wamuhuk, ulug, hit fahet hupmu hubet somban uruk kwit neg welahe.

¹¹Ketia nit hesa wamuhuk en de, nenakni Allah inim, ne, Tuhan Yesus inim en kwe hwaloho nenobahaik wamag.

¹²Niren hit nenenda hundig henepuhuk hag, hit nit inim, ap homi mundoho inim, ekenim nenenda henenda hundig enepuk kamuhup ulug, Tuhan en henepuk kamag.

¹³Airoho henepuk kwit, at Tuhan Yesus at omaliki onggwareg en on inim[2] wamuhup salim ai fam at Allah il hanim, “Hit siag duk fug angge mun fano duruk fam nele henobam henobahakuk fug hihi,” ulug, hweag-hesa wamag ulug, henenda wirik-ap henepuk kamag.