Read Ninia Yali 1 TESALONIKA 4 Bible Online

1 TESALONIKA 4 - Ninia Yali bible

1 TESALONIKA 4

¹Nori, nerekwi. Allah ahayeg howag ulug keroho dil noruk kamuhup hweag-hesauhuk ale wauhupdeg, mundoho dil noruk kahep famen, mun alongdoho ekenim dil noruk kamuhup ulug, Tuhan Yesus unuk fam wene ambiangma komo-henebeheg, nenele omamne fam hweag-heseheg, ukohon.

²Tuhan Yesus awene melaleg hilil-nesasi melaloho hweag-hesauk katuhuk ai, henoluk.

³Allah en hit duruk kamuhup boruk ale ai, “Hit siag duk fug angge mundoho an nobahet eneg wereg lit, homi hesangge enebuk fug angge wereg nu.

⁴It ap dagma on omano en enakni Allah an enapeleg deg lit, ahanhan enepuk halug, homi hesangge hwelauk anyo hag, hit ap airoho hwelauk kam fug. Ite, henakni Allah enda ahayeg heheg, ne ap homi en henunuk fano eheg duruk welamag ulug, hiren siag duk fug angge henohwesi nim lomboroho neg welamek.[3]

⁶Ai on fahet higitdoho duruk kwit de, henori henerekwi inil saloho enohwesi enehunsi on hambena enebuk fug,” ulug, Allah endaman airoho boruk kwit, hweag-nesauk ai. Airoho uruk ai en de, atam niren uruk kwit, “It ap homi hambena duruk on anyo, Tuhan en olok enobam fesehu en wereg,” ulug, nenele omamneroho komo-henepuhuk anyo.

⁷Nit siag ai on dil noruk kamag ulug, at Allah en wol-nenepsi fug. Ite, siag duk fug angge at obahet eneg welamag ulug, wol-nenepsi.

⁸Aireg ma, ap eke wene su sahaloho embeseruk halug, aren ap enele embeseruk fug. Ite, at Allah Aheime og-nesauk on Allah anyo embeseruk.

⁹Henori henerekwi hinim henenda hundig enebil lauk kahep ai, Allah en atam hweag-hesasi mu, wene ai on ekenim lisu bal-hesa ale nenepuk eleg.

¹⁰Hit henori henerekwi mundoho o Makedonia wereg on demdoho henenda hundig enepuk katuhup famen, ekenim henenda hundig enepuk kamuhup ulug, melaloho hweag-hesehe.

¹¹Henunuk fano welamuhup en, henobam yamugdoho wereg lit, hit henemu domog en heneyabuk wit-dauk kwit, atam komo-henepuhuk anyo higitdoho neg duruk nu.

¹²Airoho duruk kwit, ap amu on en wirig fam neg sareg lam fug angge duruk kamuhup halug, it ap homi Kristus demdoho boruk eleg on en, mot-henepuk kamuhup.

¹³Nori, nerekwi. It ap homi waratlug, keroho atuk anyo, wene henapeleg welamuhup ai nerim. Ap homi foma enenda ebereg eleg ma, enenda wat-dauk anyo hag, hit henenda airoho wat-dehep ha no, bilinggoho hweag-hesa.

¹⁴At Yesus waratsireg, oluk inatsi, ulug, nit demdoho boruk kahe. Ai fam, it ap homi Yesus inim hundig lit waratswa anyo at Allah en eneluk apdoho unduhuk fesehu demdoho boruk kamul.

¹⁵ Wene ai fahet Tuhan hweag-nesasi on hweag-hesa. Tuhan Yesus waharuk salim ai, it ap waratswa on wereg kweleg, nit owan nenoluk welahe on anyo dam lahakuk fug.

¹⁶At Allah ele humon fam eheg, Allah ayonggo malaikat leho on en ele eheg, “Tuhan waharuk,” ulug, Allah ambohweap trompet ele fu deheg, duruk mu, Tuhan Yesus neg boholman wambik waharuk kweleg, it ap Kristus fam hundig lit, waratswa on omano at Allah en it dam enoluk apdoho unduhuk fesehu.

¹⁷Unduhuk fesehureg, ai en nit owan nenoluk welahe anyo, it ninim hena anggelegma bul etma Tuhan ninim seberuhuk en og-neneplug lahaku mu, Tuhan ninim mundoho-mundoho welamuhuk.

¹⁸Ai halug, wene ehe on ai fam henenda aho wat-wat atuk kamek.