Read Ninia Yali 1 TESALONIKA 5 Bible Online

1 TESALONIKA 5 - Ninia Yali bible

1 TESALONIKA 5

¹Nori, nerekwi. Su duhu wene hweag-hisihi anyo, “Di li em aruhu,” ulug, lisu baloho hweag-hesehe ha fug alereg.

² At Tuhan waruhu salim anyo re, ap heraharuk on en o hup anggo waharuk anyo hag waruhu ai mun henoluk.

³It ap homi en, “Nenenda yuwagdoho sereg welahe,” ulug, boruk kweleg, hwe omalik ahummu wereg anyo, di salim endag-aruhu apelegdeg kweleg, il fenggen atuk mu ambol heinet watuk anyo hag, it ap homi wenggeleg eleg man elehapdoho feseik waharuk mu, it eke longgo uruk kwit enahap wendat-dahup fug.

⁴Ai famen, nori, nerekwi. Hit neg de henenda o mum hag wongdoho welahep fug. Ap homi enobam wongdoho wereg ma, ap heraharuk on kuruk halug, youk lauk anyo hag, o ai salim aik waharuk mu, hit airoho youk lahup fug.

⁵Ap homi o nukoho selegma wereg on hag hit abirangge o seleg ai fam duruk kahep on welahep. Nit o hup anggo mummu wereg hag, ai on welahe fug.

⁶Aireg ma, it ap homi foma nohoruk anyo hag nit airoho nohoruk kamuhuk fug. Nit nohouk fug angge ninil enggatdoho welamul.

⁷It ap homi nohoruk ai, hup anggo nohoruk. Ne, it ahalue wenenebo enebukwag ulug nauk ai, hup anggo neg nauk.

⁸ Ai famen, nit neg de, it nukoho duruk on anyo welahe ma, nit nohouk fug angge ninil enggatdoho welamul. Ninil enggatdoho neg wereg lit, ap en enesing wan-dauk hag, nit nenenda Tuhan obam dip-debeheg, ap homi nenenda hundig enebeheg, ap sehen anggen on en enunggulmu waruk no ulug enunggul asum bosie on wan-dauk anyo hag, nenahap wendat-nenebuhu anyo nenenda ebereg welaheg, duruk kamuhuk.

⁹At Allah en olok nenebuhu en eneko nenobahasi fug. Ite, at Tuhan Yesus Kristus en nenahap wendarukwag ulug, eneko nenobahasi.

¹⁰At Yesus ebe nit nenobahet ninim nenoluk mundoho welamuhuk ulug, waratsireg, fobik waruhu ai, nenebe waramuhuk mu waruhu ane? Nenoluk wereg ma waruhu a? Fano neg. At ebe waruhureg, ninim nenoluk mundoho welamuhuk.

¹¹Aireg ma, hit ketia henenda aho wat-wat aheg, ne, at eke en eke enda wirige feheg, dil noruk kahep higitdoho dil noruk kamek.

¹²Nori, nerekwi. It ap henowesi fahat-henesug wereg ai, Tuhan en unduhuk fesesi mu, wereg lit, komo-henebeheg, melale henobahakeg, henepuk mu, it enapma wereg lit, leho feseruk kamek.

¹³It airoho duruk ai en henendaman de, “It at nenowesi unuk bogdeg welamag,” ulug, boruk kwit, enebe henendaroho welamek. Airoho wereg lit de, hit-hit henobabut sakoroho duruk nu.

¹⁴Ne, nori, nerekwi. It ap yabuk wuruk fug angge koreg on ai, komo-enebeheg, enakol humdoho deg on ai, enenda hwerie feseheg, let-enebuk alereg on ai, let-enebeheg, duruk kwit, ap homi mundoho inil hanim hinil waroho welaheg, duruk kamek.

¹⁵Ap homi en hit eke siahap henepuk mu, onggo-onggo siahap debesouk fug angge wereg lit, hit hit fahet inim ap homi mundoho enobahet inim, enobabut fanoroho duruk ai on fam duruk kamek.

¹⁶Henenda henahayeg neg boruk kamek.

¹⁷Bok am fug angge somban neg neg uruk kamek.

¹⁸Kristus Yesus inim hundig lit, dil noruk mu hesalug, di ale su ale henepuk ai, Allah besi fam henepuk mu, dang-deheg neg, duruk kamek.

¹⁹Allah Aheime sebeloho fouk fug.

²⁰Allah Aheime en deberuk kweleg, wene hweag-hesauk anyo henendaman seram boruk kam fug.

²¹Di wene su wene abut bale folug, fano halug neg bug-bagdoho foroho welamek.

²²Di siag su siag duruk ale orohole enegdeg halug, ahaye duruk nu.

²³Airoho wereg ma, ketia at nenenda hwerie nenobaharuk on Allah en hit henebe at onggwareg fahet eneko fahat-dauk kwit, henesiag mundoho elehapdoho henobaharuk kamag. Tuhan Yesus Kristus waruhu salim fam siag henobam henobahauk no, henebe, henabut, henenda mundoho bugdoho fahat-henesug welamag.

²⁴At Nenakni Allah neneyonggo fesi on anyo en, “Diroho henebuhuk,” ulug, abug hweag-nesauk higitdoho duruk on anyo en sen-henesug welaruhureg, demdoho henebuhu.

²⁵Nori, nerekwi. Nenobahet Allah hweag-utuk nu.

²⁶Henenda hundig fam mako bugdoho dang-dang atuk kamek.

²⁷Nit lisu bal-hesehe su, nenori nenerekwi Yesus omaliki on mundoho inil hanim bilingguhup, ulug, Tuhan unuk hombuk baloho hweag-hisihi ai.

²⁸At Tuhan Yesus Kristus en fanoap henepuk kamag.