Read Ninia Yali YOSUA 1 Bible Online

YOSUA 1 - Ninia Yali bible

YOSUA 1

¹TUHAN amingming angge Musa anyo mundoho waratfag ma TUHAN en Musa amingming angge Yosua hun Nun amloho anyo ele hweag-utuk kwit,

²“An Namingming angge Musa anyo mundoho waratsi mu, hat nim ap homi Israel on abirangge hinim de kwenang An den og-esahuk mu Ik Yordan dahaloho foma fil etlema nindig-amuhup anggere ketia fik-fouk duruk kamek.

³ An den Musa mundoho hweag-utuk kwit de, hat Yosua inim ne An nomaliki abirangge inim en o di kwe su hiren eneyog sobitil lahup kwe etma at An den abirangge it og-esahuk, ulug hweag-itihik.

⁴Hit henobam bumbuk de o leimu il apma selatan fil sahareg on etman de il emberim utara fil de o Libanon dom fam etma ne o mo lahaik waharuk fil de Ik Efrat humon ai fam en dil-dil de ap homi enunggul unuk Het on wereg ma etma abirangge en de mo obuk uruk fil de ik Laut Tengah bul on wereg huli etma.

⁵ Yosua ao, hat hebe holuk wereg laruhun huli etma re ap misig en oho hat halong elehapdoho hobahauk ale eke deg lamuhup fug. An den atam Musa oluk wereg li ninim nambieg welatihik hag, hat hinim oho airoho hundig hinim welaruhuk anggere. An den hat hamu lin healug lahuk fug.

⁶ An den kwenang ap homi au enombasi fam og-esahuk ulug abug og-esauihik mu etma hwelag kwik lauk li haren melal-eneplug kuhun anggere haren henda dip-debelug hambong seroho neg diyug.

⁷Haren dil lauk ale etma ambiangma fano neg dil lauk karuhun en de, An den namingming angge Musa fam nawene melaleg og itihik on anyo fam fik-furebelug duruk kamuk. Dorangge lohon dahan debelug duk fug. We hebe neg de henda dip-debelug hambong seroho neg diyug.

⁸Buku wene melaleg baleg on ai ap homi hundig bilinggoho hweag-esauk nu, nerim ulug embesouk fug. Ite wene lisu baleg ai ilonggoma baleg wereg on ai hat hebe fam duruk karuhun en de, hupmu nim hubet nim kumururuk kamuk. Ne, haren lahe ai abirangge dil lauk karuhun fam de hat hebe fam di angge su angge wereg angge neg deg lit haren dil lauk on ambiangma fano atil neg lauk karuhun.

⁹Hat mun hambong seroho wereg lit, henda hambukdoho welamin ulug An den melale hobahaki on anyo ebet hakiyug! Haren hakol deheg, henda seram aheg duk fug. Hat di kwe su kwe laukmu An hakni TUHAN Allah hinim lauk karuhuk anggere hakol eleg,” ulug hweag-etfag.

¹⁰Airoho hweag-etfag ma Yosua en Israel enap enowesi melal-enepuk on omano fam de,

¹¹ap homi Israel on enobam kemah on sabo wirig kwe maseroho lalug wene melaleg su hweag-esa lowag ulug melale feseruk kwit de, “Henanggwenang henakni TUHAN Allah en hit og-hesasimu etmano kwik lalug welamuhup en, nukoho henahan debelug Ik Yordan baloho nindig-amuhup anggere, henasiburu kwemangge fouk diek, ulug hweag-esa lakiek,” ulug melal-enepfag.

¹² It enunggul unuk Ruben on mel, Gad on mel, Manasye on foma mel etano fam at Yosua en uruk kwit de,

¹³“Henakni TUHAN Allah en kwenang Ik Yordan foma fil mo lahaik waharuk fil oma re hit henobam henanggwenang on amag ulug og-hesasi, ulug at Musa TUHAN amingming angge anyo en isi ale anyo wenggel-hakiyug!

¹⁴Hit henohwesi mel henomaliki mel henowam mel de suma welamuhup famen hiron en ap dog yapuk on lik-louk deg enap etma re it henori Israel on fomane enobahet it dam dog yabil de Ik Yordan dahaloho lahup.

¹⁵Hit de it let-enepil lauk men neg de it enanggwenang Ik Yordan dahaloho mo obuk uruk fil hit henakni TUHAN Allah en og-esasimu etma hweria aik kuhup. At TUHAN en ap homi Israel on abirangge enambong seroho welamag ulug debesehumu neg de, hit oho henanggwenang Ik Yordan foma fil mo lahaik waharuk fil, at Musa TUHAN amingming angge anyo en hit og-hesasimu suma sombandoho wamuhup,” ulug hweag-esebag.

¹⁶Airoho hweag-esebag ma, it enunggul unuk Ruben on, Gad on mel, Manasye on foma mel anyo en uruk kwit, “Nit de haren hele diroho duluhup airoho duluhup ulug hweag-nesauk halug aire duruk kamuhuk neg, ne dima fil lakiek, suma fil lakiek ulug hweag-nesauk karuhun halug ai oho nit de lauk kamuhuk neg.

¹⁷Nit Musa ele furoho holoho duruk katuhuk hag, hat hele oho nit furoho holoho duruk kamuhuk. Musa oho akni TUHAN Allah inim ambieg welatsi hag, hat oho hakni TUHAN Allah hinim welamag!

¹⁸Ap enemu domog en hat halong welahen on anyo hapma sebele fahat da fug angge deheg, hele melaleg mel higitdoho duk fug angge deheg, duruk halug de unggum de waratuk on og-umuhup. We henda neg de dipdoho deg lit hambong seroho neg diyug!” ulug hweag-etfag.