Read Ninia Yali YOSUA 10 Bible Online

YOSUA 10 - Ninia Yali bible

YOSUA 10

¹At raja Yerusalem[2] on unuk Adoni-Zedek anyo en holduk men de at Yosua en o kota Ai anyo mundoho lilibug-lalabag deberuk kwit aren deloho hwelebag ale mel, aren raja o ai welatfag on oho it o Yerikho on nim, enowe raja inim fam debesebag hagdoho binggi watfag ale mel, etma esanggo holfag. Ne, aren eke holduk kwit oho re it ap Gibeon enap ohore it Israel on inim, nininim hundig welamuhuk ulug sali watswareg de it ap homi Israel on enesahalimu wereg ulug ebag ma holfag.

²Airoho debag ma re it ap homi Yerusalem enap de mundoho enakol neg atfag; ai indip de o Gibeon aire kota amu kwe hagdoho bumbuk hum obam, ne o kota Ai re dot hag deg kweleg o ai neg de humdeg latfag ma. Ne, ap weim yapuk enap etma ohore mun sehen anggen enap neg deg ma atlug debag.

³Ai fam de hun Adoni-Zedek en ap hun Raja Hoham o Hebron wereg latfag ahun inim, Raja Piream o Yarmut welatfag ahun inim, Raja Yafia o Lakhis welatfag ahun inim, Raja Debir o Eglon welatfag on inim fam de wene su diroho walug lowag ulug mon-enepfag.

⁴“Ap Gibeon enap de Yosua nim ap homi Israel on nim wene sali watswa ma re an o Gibeon enap enowarik kurukmu let nabik manik,” ulug mondotfag.

⁵Ai ebag ma re ap raja Amori enap foaben angge etare, raja Yerusalem on nim, Hebron on, Yarmut on, Lakhis on, Eglon on inim seberik watfagdeg, it enautsi tentara inim seberoho, iren o Gibeon walinggik lebagdeg enowarik kwebag.

⁶Airoho debag ma re ap Gibeon enap en de Yosua akit o Gilgal wene mondotuk kwit de, “Nenakni, nit nenamu nenobahauk fug! It ap raja Amori on o dom kwe wereg on etmano re misig sebe ehesareg nit nenowarukoho waharuk en de folo-folo nit let-nenebik ma!” ulug mondotfag.

⁷Ai ebag ma re Yosua nim ap tentara mun ebe on neg nim de dog yapul ulug o Gilgal en lebag.

⁸Laukmu TUHAN en Yosua fam uruk kwit de, “It fahet hakol enebuk fug. Hat fam mun halongap hobahakimu re, iron eta ap misig on eke en hambuk halug hat hinim dog yapuk katmisi fug,” ulug hweag-etfag.

⁹O hup deg kweleg de Yosua autsi sehen seneg enap nim de o Gilgal en o Gibeon lebagdeg, fetag-fetag ap Amori on anyo enowarik lebag.

¹⁰Ap tentara Israel on anyo waharukmu esebagdeg de ap homi Amori on de enenda nong-hong ebag. Ap homi Amori on de o Gibeon etman hum-hamdoho enowatfag, ne nin enoluk wilip atfag on de sik-mug eneplug de bule il kwe belabeg dom Bet-Horon honggoleg kwe en de o Azeka mel Makeda mel en yit-yatma il apma selatan fil etma lebag.

¹¹Ap Amori on etmano it Israel on enakol en dom il kwe belabeg heiye wamburuk men de, TUHAN en osit lumbiag hum-hamon bohol fam en it enobam belabik waharuk men neg de o Azeka huli lebag. It Israel on en enowatfag ma waratfag on de dotdeg hag famen de osit lumbiag ai fam en waratfag on neg de hum-hamdoho waratfag.

¹²Nukoho ai salim TUHAN en it ap Amori on fam en Israel enap enalongap debesebag salim aire, Yosua en TUHAN fam ele ebag. Ne, it ap homi Israel on inil hanim Yosua en uruk kwit de, “Hat mo aire o Gibeon emberimmu eiya bok amuk! Ne, hat Bigalem aire, o Ayalon Donggoma etan hihiloho la fug!” ebag.

¹³ Ai ebag ma re mo anyo bok atfag ne bigalem hihiloho la fug angge weregman neg de it ap Israel on anyo it enaselei on mundoho enalong elehapdoho fesebag. Ai debag ale ai fahet de Buku Yasar fam baleg wereg. Nukoho misig hunduko aire mo bohol bik-bulmu bok welatfagdeg de anunuroho welatfagdeg neg de obuk ik lebag.

¹⁴TUHAN en ap homi on en enenda boruk ale higitdoho debag ale aire, nukoho airoho atfag on ai endam oho airoho eke atfag fug, ne fobik oho eke airoho aruhu fug. TUHAN de it Israel on inibil deg lit dog yapuk katfag!

¹⁵Anyo airoho weim yapfagdeg de Yosua autsi tentara nim de sombandoho enobam sabo kemah salegma o Gilgal omano lebag.

¹⁶Famen de it raja Amori on enebe foaben etano re foldongdoho wilibik lebagdeg o Makeda owik misig fam etma heraho latfag.

¹⁷It airoho herahoma ap en inil esebagdeg de, herahoma etmano fahet Yosua hweag-irik lebag.

¹⁸Hweag-irik lebag ma at Yosua en uruk kwit de, “Helep humon imbiloho owik ai elma lare folug de, ap kahaleg on eke eta welamag ulug feseiyug,

¹⁹famen de hit de eta huli bok am fug, it mug-eneplug de enembol fil en enowarik kwiyug, it enobam kota fam etma kwik lowag ulug embesouk fug! It ai fam en de TUHAN en hit henalongap henobahakeik anggere,” ulug hweag-esebag.

²⁰Yosua nim ap homi Israel on nim en de ap homi Amori on etma enowatfag, famen de nin fomane re heiye it enobam kota fam etmano lebagdeg, herag aik lebag ma re, it enebe enowatfag fug.

²¹Airoho dulug de tentara Yosua autsi omano re enahap wendareg angge o Makeda saboma etmano akit watfag. Ap homi o kwenang etma fam on en it Israel on fam enele ahakoreg ale eke uruk katfag fug.

²²Ai mundoho dulug, Yosua en uruk kwit de, “Ketiare owik anyo ele sok husoho ap raja foaben anyo og eneplug wilibik manik,” ulug hweag-esebag.

²³Hweag-esebag ma re owik anyo husebag ma re, it raja Yerusalem on, Hebron on, Yarmut on, Lakhis on, Eglon on, etmano lit eneplug wilibik watfagdeg,

²⁴walug Yosua akit lebag. Ai en Yosua en ap homi Israel on abirangge wol-enepfagdeg, it ap sehen foroho on enowesi perwira at inim weim yabik lebag on etmano watlug ap raja etma enanggolop owag eneyog en soberik wamag ulug mingming enepfag. Airoho ebag ma re it ap sehen seneg on enowesi omano watfagdeg de ap raja omano enanggolop berelik watfag.

²⁵Anyo mundoho debelug, Yosua en ap perwira omano fam uruk kwit de, “Henenda sebe ulug henakol duk fug. Airoho neg TUHAN en ap heneselei on fam debeseruk karuhu anggere, henenda seroho re henenda hambuk deg lamuk,” ulug hweag-esebag.

²⁶Airoho ebagdeg de Yosua en ap raja etano enowatfagdeg de e deloho unduhuk on fam suknoho fesebag. It enebe wareg omanore eta embesebag ma weregman neg de o hupmu atfag.

²⁷O mo obuk ik lauk kweleg etano re Yosua en ele mingming fam de, ap wareg etmano belabik watfagdeg de owik it raja etan atam heraho latfag ma etano hwik-esa kwebag. Airoho dulug de helep humon en owik anyo elma lare febag ma re helep etma ketia hulien nim eta wereg.

²⁸Nukoho anyo salim de Yosua en de o Makeda enowarik kwik lauk kwit de, o kota nim ap enowe raja nim enalong elehapdoho fesebag. Ap homi o ai fam wereg on de abirangge enowatfag, misig ulug oho eke enoluk fesebag fug. At Yosua en ap raja Makeda on aire atam raja Yerikho on fam debebag anyo hagdoho debesebag.

²⁹Airoho debebagdeg de Yosua autsi tentara nim de lauk katfagdeg de o Makeda en de o Libna lebagdeg o Libna enowarik lebag.

³⁰TUHAN en o ai inim ne raja o ai nim fam en it Israel on enalongap debesebag. Ap misig eke oluk fesebag fug; ap homi o kota ai on de abirangge enowatfag. Yosua en raja o ai on de aren raja kota Yerikho on fam debebag anyo hagdoho debag.

³¹Ai en Yosua nim tentara nim anyo o Libna en hihiloho re o Lakhis lebag. Iren de o ai huk dik lebagdeg de bin kwebag.

³²Nukoho bireneg angge weim yapuk men de TUHAN en ap homi Israel on fam o Lakhis fam en enalongap debesebag. Iren o Libna fam debebag ale etare o Lakhis fam oho airoho debesebag; ap misig ulug oho enoluk eke fesebag fug, we abirangge enowatfag.

³³Hun Horam, raja Gezer on ai it Lakhis on let-enepmin ulug watfag famen de Yosua en at ebe nim autsi tentara nim enalong elehap debesebag; ap misig eke lil atfag fug, abirangge waratfag.

³⁴Nukoho ombolim on fam de, Yosua nim autsi tentara nim de o Lakhis en hihiloho lebagdeg de o Eglon lebagdeg o ai hukdoho re o kota ai enowarik kwebag.

³⁵Nukoho ai salim de iren o Eglon sebelik kwebagdeg de, iren ap homi Lakhis on fam debesebag higitdoho ap etma on oho abirangge enowatfag.

³⁶O Eglon en de Yosua nim autsi tentara nim de dom lohwaroho re o Hebron lebagdeg o ai fam enowarik kuruk kwit,

³⁷o kota ai deloho hwelebag. Raja o ai on nim, ap homi o ai ilonggoma wereg on mel, ne kota foma amu on aluluk kwe etma wereg on mel, abirangge enowatfag. Yosua en de o Eglon fam debebag hagdoho o aire mun luluhun-lalahan debebag. Ap misig oho eke enoluk fesebag fug.

³⁸Airoho debeselug de, Yosua nim autsi tentara nim sombandoho waharuk kwit de, o Debir enowarik watfag.

³⁹Kota ai mel, raja ebe mel, ne kota amu on aluluk kwe wereg on etma oho abirangge Yosua en delfag. Ap homi etma wereg on abirangge enowatfag. Yosua en de raja Libna on mel Hebron on mel fam debesebag hagdoho, aren de raja Debir on inim it Debir enap mel fam airoho debesebag.

⁴⁰O kwenang etma abirangge re Yosua en sebeloho febag. Aren de it raja dom kwe wereg on mel, duk amig kwe mo lahaik waharuk fil wereg on mel, dom indip kwe mo obuk uruk fil wereg on nim, ne o lei kwe il apma selatan fil wereg on nim mundoho enalong elehapdoho fesebag. Ap misig oho eke enoluk fesebag fug, we abirangge enowatfag. Aire ap homi Israel on enakni TUHAN, Allah en wene melal-etfag higitdoho debag.

⁴¹Yosua en de o Kades-Barnea il apma selatan fam etman de dil-dil de o Gaza ik aegma huli etman de, o Gosyen abirangge nim en de, dil-dil de o Gibeon en il emberim utara fil huli etma enalong elehapdoho fesebag.

⁴²Ap homi Israel on enakni TUHAN, Allah re ap homi Israel on enobahet weim yapil laukmu atlug de, we misigam weim yabik lauk on fam de, Yosua en raja etma enalong elehapdoho fesebagdeg, o it enalong apma welatfag on etmano deloho hwelebag.

⁴³Airoho mundoho debelug de, Yosua autsi tentara nim de sombandoho o Gilgal saboma watfag.