Read Ninia Yali YOSUA 11 Bible Online

YOSUA 11 - Ninia Yali bible

YOSUA 11

¹At Raja Yabin o Hazor ahun anyo en de, it Israel on enalong atil watfag ale etmano esanggo holfagdeg de, aren ap yonggo re hun Yobab raja kota Madon on nim, it raja o kota Simron nim Akhsaf on fam nim,

²it raja dom unggul fil en utara fil wereg on fam nim, o Lembah Yordan il apma o Galilea en selatan fil wereg on nim, o dum indip kwe wereg on nim, o Dor horogma ik aeg kwe wereg on nim, fam wene mondotfag.

³Aren de nin ap o Ik Yordan en mo indip fil mel, mo obuk uruk fil mel, wereg on ap Kanaan enap etma re, Amori on, Het on, Feris on, Yebus enap o dom kwe wereg on mel, ne Hewi enap Dom Hermon indipmu en o Mizpa fam etma wereg on mel, fam yonggo fesebag.

⁴Airoho fesebag ma re it raja etma nim enautsi tentara re esan hum-hamdoho enebe ik inggi hagdoho mel watfag.

⁵Raja etma enebe abirangge misig sebe ulug it Israel on nim weim yapul ulug watfagdeg de Ik Merom agdoho wirig atuk on fam etma lohwalik watfag.

⁶Airoho watfag ma TUHAN en Yosua fam uruk kwit de, “Haren it fam hakol enebuk fug. It Israel on inili oko re sono hubet o il dia hag deg kweleg it enebe abirangge An den enowaruhuk. Iren enengge kuda etma re haren eyog andeng derag esahun, ne iren enangge kereta dog yapil lauk on etma re haren indok han yaluhun,” ulug hweag-etfag.

⁷Airoho hweag-etfag ma re Yosua nim autsi tentara mundoho nim en de Ik Merom agdoho wirig atuk on horogma etman fetag-fetag enowarik kwebag.

⁸Ne, TUHAN en it Israel on anyo it ap etma fam en enalongap debesebag. Ap Israel on en bin kuruk kwit de, it enebe sik-mug eneplug de o Mesrefo-Maim en yatdoho etma huli en de o Sidon en il utara fil en de, o Lembah Mizpa yatma mo lahaik waharuk fil etma huli feseik lebag. Weim aire yapuk men neg de, it Israel on eneselei omano ando eke welatfag fug mun abirangge waratfag.

⁹Yosua en de TUHAN en diyug ulug melale febag aleroho debesebag: Aren de it enangge kuda omano eyog andeng bale feseheg, enangge kereta han yaleheg, debag.

¹⁰At Yosua nin sombandoho lauk kwit de, o Hazor aire it raja etma enesahalimu en mun enomamne hum deg latfag on anyo delik kwebag. O kota anyo han yalfagdeg de, raja nim it ap homi holduk on nim de binggi enowatfag; misig ulug oho enoluk eke fesebag fug.

¹²O kota etma abirangge re Yosua en delfagdeg de, raja omano re sen enepfagdeg, wene melaleg Allah amingming angge Musa anyo en hweag-etfag ale higitdoho re binggi enowatfag.

¹³Famen de kota o indok han yaleg on olun fam nikangge witfag on de, dem misig oho eke it Israel on en han yalfag fug, we o Hazor at Yosua enggik en indok han yalfag on ai neg.

¹⁴Ap homi o etma wereg on de enoluk eke fesouk fug angge enebe mundoho binggi enowatfag. Famen de it enangge munangge manangge onggo wereg angge etma mel iren enowam mel neg de it ap homi Israel enangge on amag ulug hwelebag.

¹⁵Di ale su ale TUHAN en At amingming angge Musa fam hweag-etfag on etmano abirangge re, Musa en Yosua fam febag ma, Yosua en dil lebag; dem misig ulug oho eke embesebag fug on de eke wereg fug.

¹⁶Yosua en o deloho wil lebag kwe re, o dom kwe mel, dom indip kwe mel, il emberim utara fil mel, il apma selatan fil mel; o wilayah Gosyen fam mel, o Gosyen en il apma selatan fil lei enggelangge elegma etma mel, o Lembah Yordan mel, delfag.

¹⁷O ai unggut wiriloho deg latfag alere o Edom horogman Pegunungan Gundul uruk katfag on ai fam en il apma selatan fil en de, il emberim utara fil de yit-yatdoho o Baal-Gad o Lembah Libanon, Dom Hermon fam il apma selatan fil huli etma deg latfag. Li anunuroho Yosua en it ap raja o etma on inim weim yapuk katfag famen de, ambiangma en de it sen-enepfagdeg enebe binggi enowatfag.

¹⁹O etma fam kota welatfag on etman de we misig en oho eke it Israel on nim enele sali watfag fug, we it Gibeon o kota ap Hewi enap welatfag ma ai neg. Ne, kota abirangge etma re weim yabik kuruk kwit etma mun enalong elehapdoho fesebag.

²⁰ TUHAN en de ap homi etma it Israel on nim weim yabukwag ulug enenda omamne debesebag, aire TUHAN en wene melaloho Musa hweag-etfag ale higitdoho it enebe enelaheg esalug fesouk fug angge it enebe mun elehapdoho fesoukwag ulug debag.

²¹Eta li em neg de at Yosua en de ap homi enunggul unuk Enak enap, ap inunggul unuk ai on de enowag yatdeg-batdeg enap o dom kwe o Hebron mel, Debir mel, Anab mel, it Israel on enobam inim it Yehuda on enobam inim en dom kwe etma mundoho welatfag enap. It enebere at Yosua en abirangge enowatfagdeg de it enobam kota inim mun welelenggendoho febag.

²²It enunggul unuk Enak enap ai en de ap misig oho eke it Israel on wereg ma etma ando welatfag fug, we o Gaza fam inim, Gat inim, Asdod inim neg de welatfag.

²³Ai en kwenang ai abirangge re at Yosua en de TUHAN en wene melaloho Musa hweag-etfag ale higitdoho delfagdeg de, aren it ap homi Israel on enangge amag ulug og-esebag. O Kwenang aire yohwan-debagdeg de it enunggul unuk domog de, huli misig heg hwelebag. It Israel enap anyo weim yapuk ale mun debebagdeg de it enanggwenang fam etma, enakol eleg angge enebe mun ibik-eberoho neg welatfag.