Read Ninia Yali YOSUA 12 Bible Online

YOSUA 12 - Ninia Yali bible

YOSUA 12

¹ O Ik Yordan foman mo lahaik waharuk fil, o Lembah Arnon etman ilihig de Lembah Yordan en de, il emberim utara fil Dom Hermon en yit-yatdoho oromu re it Israel enap en hwelebagdeg de it huraik kwebag. Ap raja biren angge iren enalong elehapdoho fesebag.

²Ap misig unuk de Sihon, raja Amori fam welatfag ahun ebe o Hesybon welatfag. O at apma welatfag on de o Gilead etma foma minggiroho welatfag on etare: o Aroer (Lembah Arnon elanma) huli en de, donggo ai bulmu kota welatfag on etman dil-dil Ik Yabok wereg huli o it enunggul unuk Amon on nim huli-hulimu etma fam;

³Ai en o Lembah Yordan mo lahaik waharuk fil etma wereg on nim, ik yenggeleg on Galilea anyo en il apma selatan fil en de o Bet-Yesimot (ik Laut Mati anyo en mo lahaik waharuk fil) huli en, dil-dil Dom Pisga indipmu huli etma.

⁴Raja amu on eke it Israel on en along elehapdoho febag on de Raja Og ahun o Basyan ai on ebe re o Asytarot mel Edrei mel etma welatfag on. At aire ap enunggul unuk Refaim[3] en at neg unggul unuk ai on welatfag.

⁵O at apma welatfag on de, Dom Hermon fam en, Salkha nim, o Basan abirangge angge o Gesur mel Maakha mel en yit-yatma etma huli; ai en o Gilead abirangge nim en at Raja Sihon o kota Hesybon welatfag on anyo apma welatfag on etma horog deg kweleg de at neg yit-yatdoho etma deg latfag.

⁶ At Yosua nim ap homi Israel on nim en seberoho ap raja biren angge enalong elehap debesebag on de eta. It raja eta enanggwenang de at Musa TUHAN amingming angge anyo en, it enunggul unuk Ruben, Gad, nim ne it enunggul unuk Manasye on minggiroho foma inim fam it enangge enanggwenang on amag ulug og-esebag.

⁷It raja at Yosua nim it enunggul unuk Israel on nim seberoho en enalong elehapdoho fesebag on de, it raja-raja o Ik Yordan foma mo obuk uruk fil welatfag on abirangge. Aire o Baal-Gad o Lembah Libanon en dil-dil de Pegunungan Gundul weregman il apma selatan fil o Edom horogma huli etma. Kwenang aire at Yosua en de it enunggul unuk ap homi Israel on fam it enangge on amag ulug yohwan-esebag.

⁸Wilayah etma re dom kwe etma inim, mo obuk uruk fil duk indip kwe etma nim, Lembah Yordan en de duk-duk indip etma inim, mo lahaik waharuk fil en alo beng-beng deg kwe etma nim, il apma selatan fil en lei kwe etma nim. O etma re atam ap enunggul unuk Het, Amori, Kanaan, Feris, Hewi mel, Yebus mel welatfag on enobale kwe.

⁹Raja enalong elehapdoho fesebag on, abirangge seberoho re 31 en. Enebe etare raja o kota unuk apma su fam welatfag on: O Yerikho, Ai, (Betel horogma) on nim, Yerusalem, Hebron, Yarmut, Lakhis, Eglon, Gezer, Debir, Geder, Horma, Arad, Libna, Adulam, Makeda, Betel, Tapuah, Hefer, Afek, Lasaron, Madon, Hazor, Simron-Meron, Akhsaf, Taanakh, Megido, Kedes, Yokneam (o Karmel fam etma), Dor (ik aegma welatfag on), Goyim (o Galilea fam) etma nim o Tirza nim fam welatfag enap enalong elehapdoho fesebag.