Read Ninia Yali YOSUA 13 Bible Online

YOSUA 13 - Ninia Yali bible

YOSUA 13

¹Airoho duruk katfag man de at Yosua ebe mundoho sobal atfag. TUHAN en Yosua fam uruk kwit de, “Yosua! Hat hebere mundoho sobal ahen, famen de o kota foma deluhupmu hum-hamdoho wereg ai:

²Wilayah it Filistin enap en on nim it Gesur enap en on nim abirangge etma,

³ne o wilayah it Awi enap en il apma selatan fil wereg on etma nim. (O Ik Sikhor ikman o Mesir nim huli-hulimu etman de, o Ekron huli-hulimu il emberim utara fil etma huli, o abirangge etma re it ap enunggul unuk Kanaan on nim, ne it raja Filistin on etma re o Gaza, Asdod, Askelon, Gat, nim Ekron nim fam etma wereg.)

⁴Ai en o eke deldil kuhupmu re: O Kanaan etma abirangge nim, o Meara (It enunggul unuk Sidon on en) etma nim, en de huli-huli re o Afek it enunggul unuk Amori on enobam nim huli-hulimu etma;

⁵ai en de o it enunggul unuk Gebal on wereg ma nim, o Libanon kwe en mo lahaik waharuk fil etma abirangge nim, o Baal-Gad Dom Hermon en il apma selatan fil etman de, dil-dil kobokwe o Hamat lauk on fam huli etma.

⁶ Eke it ap Sidon on enobam etma nim, ne it o dom kwe wereg on dom-dom o Libanon dulug dom Misrefot-Maim dulug bul kwe etma nim de mun owan deg,” ulug hweag-etfag. TUHAN en ele eke nim hweag-utuk kwit de, “It enunggul unuk abirangge etma re An den it nomaliki Israel on weim yabik kuruk li em fobik muko wilibi fesehuk,” ulug hweag-etfagdeg eke hweag-utuk kwit de, “Kwenang aire An den hat hweag-hitihik hagdoho haren it ap homi Israel on enangge on amag ulug yohwan-esahun.

⁷Anggere, kwenang aire ketia haren it ap enunggul unuk soho en on it enunggul unuk Israel on fam ai en nim ne, it enunggul unuk Manasye on minggiroho eta fam inim kwenang it enangge on amag ulug yohwan-esakin,” ulug hweag-etfag.

⁸ It enunggul unuk Ruben mel Gad mel, ne it enunggul unuk Manasye on foma etano nim de kwenang anyo en it dohon at Musa TUHAN amingming angge anyo en Ik Yordan foma fil mo lahaik waharuk fil etmano og-esebag ma hwelebag.

⁹Wilayah iren on atfag on de o Aroer (Lembah Arnon en esanggo fil) ne kota donggo ai bulmu etma wereg on nim. Ai en donggo lehoma etma abirangge o Medeba en de o Dibon huli

¹⁰ne ai en de o ap homi Amon on enobam huli-hulimu etma. Aire o kota hun Sihon raja Amori on obam Hesybon on anyo apma welatfag on nim etmat.

¹¹Ai en o Gilead inim, o Gesur nim Maakha nim maseroho etma nim, Dom Hermon ai abirangge nim, o Basan kwe en de Salkha huli etma.

¹²It enobam nin de at Raja Og ap Refaim[4] on o fotogdoho re aren o Asytarot nim Edrei nim melal-enepuk katfag ahun ai apma welatfag on mel. At Musa en de ap homi enunggul unuk etma on de mun enalong elehap debesebagdeg de it enobam etman muko wilibi fesebag.

¹³Famen de it ap homi o Gesur mel Maakha mel fam welatfag on de it Israel on en muko wilibi fesebag fug; it enebe ap homi Israel on wereg ma etma welatfag.

¹⁴ It enunggul unuk Lewi on de kwenang at Musa en yohwandoho it en dohon ulug og-esebag fug mu hwelebag fug, aire TUHAN en Musa fam hweag-utuk kwit, it ap Lewi en dohon de di angge su angge waroho TUHAN, Allah it Israel on enakni anyo fahet mezbah fam yalduk kamuhup on etma ulug ebag ma.

¹⁵Kwenang TUHAN en abug it ap homi Israel on fam hweag-esebag on omano en fomane re at Musa en de it enunggul unuk Ruben on fam en enahain elekwe domog etmano it enangge enanggwenang on amag ulug og-esebag.

¹⁶Wilayah iren on de o Aroer (Lembah Arnon en elan kwe etma mel) ne kota donggo ai bulmu etma welatfag on mel en de o Medeba horogdoho donggo leho on welatfag etma huli;

¹⁷ai en o Hesybon nim ne o kota donggo leho kwe welatfag on abirangge etma re: O Dibon, Bamot-Baal, Bet-Baal-Meon,

¹⁸Yahas, Kedemot, Mefaat,

¹⁹Kiryataim, Sibma, Zeret-Hasahar donggo ai fam en duk emberimmu welatfag on ai nim,

²⁰o Bet-Peor mel, Dom Pisga amig etma mel, o Bet-Yesimot mel.

²¹Ai en de o kota donggo lehoma etma nim at Raja Sihon ap homi enunggul unuk Basyan on along wereg lit sebeleg welatfag ma etma atam de o Hesybon welatfag. At nim it ap o Midian enap enalong welatfag on enebe re: Ewi, Rekem, Zur, Hur, Reba nim ohore at Musa en enalong elehapdoho fesebag. Ap enalong welatfag on abirangge etare at Raja Sihon obahet o kwenang ai fam melal-enepuk kwit welatfag enap.

²²Ap it enunggul unuk Israel on en enowatfag etma enesahalimu oho re at Bileam hun Beor amloho fobik aruhu ale ulug ele foruk katfag on anyo oho watfag.

²³Ik Yordan aire it enunggul unuk Ruben on enobam wilayah huli-hulimu welatfag. It enunggul unuk Ruben on anyo en enahain elekwe fam it enangge on amag ulug og-esebag kwe o kota mel desa mel de etma.

²⁴Kwenang TUHAN en it ap homi Israel on fam abug og-esebag ma etmano en fomane re at Musa en it enunggul unuk Gad on enahain elekwe omano enangge on amag ulug og-esebag.

²⁵Wilayah iren on de o Yaezer mel o Gilead fam etman kota abirangge inim o it enunggul unuk Amon on enobam etma foma minggiroho re o Aroer en il yatdoho o Raba en mo lahaik waharuk fil etma;

²⁶o Hesybon en de o Ramat-Mizpa huli ne ai en o Betonim mel, ai en o Mahanaim en de o Lodebar huli-hulimu etma huli, abirangge etma re wilayah it enunggul unuk Gad on enobahet neg febag.

²⁷O Lembah Yordan etman de wilayah it enunggul unuk Gad on ai enobahet de o Bet-Haram mel, Bet-Nimra mel, Sukot, mel Zafon, at Raja Sihon o Hesybon along wereg lit sebeleg welatfag man ando etma mel. Wilayah it enunggul unuk Gad on ai enobahet o mo obuk uruk fil en de Ik Yordan ikman de lahabeg ik yenggeleg Galilea il emberim utara fil huli.

²⁸It enunggul unuk Gad on anyo en enahain elekwe fam enangge on amag ulug o kota mel desa og-esebag kwe re etma.

²⁹Kwenang TUHAN en ap homi Israel on fam abug og-esebag ma etmano en fomane re at Musa en it enunggul unuk Manasye minggiroho etano fam it enangge on amag ulug mundoho og-esebag.

³⁰It enobam wilayah re o Mahanaim huli etma, aire o Basan abirangge meletma at hun Og raja Basan ahun ai along wereg lit sebeleg welatfag kwe mundoho inim, ne ai en hun Yair obam bumbuk dot-doron 60 en o Basan fam welatfag on etano abirangge et nim og-esebag.

³¹Ai en o Gilead ohore minggiroho og-esebag, o Asytarot mel, Edrei mel o kota biren etare at Raja Og wereg li o kota lohon welatfag ma etano. O kwenang eta abirangge re hun Manasye amloho Makhir anyo ambiangma on enahain elekwe on etmano en minggiroho etano fam og-esebag.

³²Airoho at Musa ebe o Moab donggo doaleg on fam etma wereg lit de kwenang Ik Yordan nindiko fil, o Yerikho en mo lahaik waharuk fil omano airoho yohwan-esebag.

³³ Famen de it enunggul unuk Lewi on de kwenang etan dorangge ulug oho Musa en eke og-esebag fug. Musa en it fam hweag-esauk kwit de, it enengge atuk kamuhup on de di on su on TUHAN Allah ap homi Israel on enakni ai fahet folug og utuk kamuhup angge etma atuk kamuhup ebag.