Read Ninia Yali YOSUA 14 Bible Online

YOSUA 14 - Ninia Yali bible

YOSUA 14

¹Ombolim su re kwenang o Kanaan fam Ik Yordan ikman mo obuk uruk fil anyo it ap homi Israel on enanggelegman keroho yohwan-debag ale ulug anyo dindiloho baleg su. Kwenang ai yohwandoho ap homi Israel on fam og-esebag on de Imam Eleazar mel, Yosua hun Nun amloho anyo mel, it enunggul unuk Israel on fam en enahain elekwe on fahet kepala welatfag on etmano mel en yohwan-esebag.

² TUHAN en Musa fam wene melaloho hweag-etfag ale higitdoho re kwenang Ik Yordan ikman mo obuk uruk fil aire it enunggul unuk Israel on minggiroho soho en etano fam yohwan-esauk kwit de, enenggik helep anggen wal halug[5] yohwan-debag.

³ Kwenang Yordan ikman mo lahaik waharuk fil at Musa en it enunggul unuk biren eke Manasye on foma minggiroho inim it Efraim on nim og-esebag. (Henolukdoho ulug at Yusuf en endag enepfag on it enunggul unuk biren ai Manasye nim de Efraim nim wereg ai.) Ne, it enunggul unuk Lewi on fahet de at Musa en it enanggwenang eke yohwan-esebag fug. Ite we enebe wereg ma fahet kota mel, enggela lei enowam sapi, domba mel fahet neg og-esebag.

⁵Kwenang anyo it ap homi Israel on en de TUHAN en wene melaloho Musa hweag-etfag ale higitdoho airoho yohwan-yohwan atfag.

⁶ Nukoho misig salim de it enunggul unuk Yehuda on de at Yosua akit o Gilgal watfag. It watfag on etan ap misig ekere unuk Kaleb hun Yefune amloho ap Kenas on anyo en uruk kwit de, “Yosua ao! Nit Hat nim an nim fahet o Kades-Barnea en TUHAN en At Allah ayonggo Musa anyo fam hweag-itsi ale etano hat de holuk deg.

⁷ TUHAN amingming angge Musa anyo en de an nebe noluk weregman neg umur 40 tahun deg li o kwenang su ninil lowarukwag ulug o Kades-Barnea en mon-nabik wahasi. Mon-nabik wahasimu sombandoho lauk kwit de an den wene bekit enamegdoho neg walug lauihik.

⁸Ap an ninim waharuhuk on etmano en de ap homi Israel on enakolap kwelap-enepswa. Famen de an neg de nakni TUHAN Allah anyo fam dipdeg lit higitdoho neg dirihik.

⁹ Airoho dirik ai en de, Musa en abug hweag-nutuk kwit de, kwenang an den nil o lowatil waharihik kwe etma re dik-demdoho an nim an nomaliki nim mundoho-mundoho nenangge on amag ulug og-hesahuk isi.

¹⁰Wene ai TUHAN en Musa fam hweag-itsi lien de ketia 45 tahun aha. Ne, ai atsi alere it ap homi enunggul unuk Israel on o lei kwe leil watil waharuk li em etano atsi. Ne, At TUHAN en sali isi aleroho re TUHAN en nalong bal-nusug lit wereg fam ketia an nebe noluk welahi au. Neakin, ketiare an nebe umur 85 tahun ahi angge,

¹¹famen de nebe nommamne re atam at Musa en mon-nabik wahasi li em deg latihik etano hag deg lahi. An de weim yabukwag ulug oho ne amu ale dukwag ulug ohore nomamne wereg neg.

¹²Aireg ma re, an nim ap an nim welatswa on nim en wene deg latsi ale walug lauhukmu TUHAN en abug hweag-hitsi on o Doma etmano og nimin. Anyo salim de haren oho hesanggo holdihin anyo, o etma re ap enowag yaron enunggul unuk Enak enap etma wereg urukmu holdihin. It de enobam kota elehet en hukdoho oko kwelabeg kwe wereg latswa. TUHAN en isi aleroho an den ap etma muko wilip-enebukwag ulug TUHAN en an let-neahu ane,” ulug hweag-etfag.

¹³Airoho ebag ma re at Yosua en de Kaleb hun Yefune amloho en hweag-etfag ale ai fano bebagdeg, aren o Hebron Kaleb anggwenang on amag ulug og etfag.

¹⁴At Kaleb ebe en TUHAN, Allah ap homi Israel on enakni anyo fam dipdoho duruk kwit higitdoho neg duruk katfag ma re, ketia huli en anggere kota aire at Kaleb hun Yefune amloho ap Kenas on ai ambiangma on en enangge on deg lit wereg.

¹⁵Atam o Hebron ai unuk Arba uruk katfag. (Arba aire it enunggul unuk Enak enap enesahalimu en ap hum-ham on welatfag.) Airoho debag ai fam de weim en enabusel sahalduk elegdoho wereg lit o kwenang ai fam de enakol elegdoho mun finik-fanoroho neg welatfag.