Read Ninia Yali YOSUA 16 Bible Online

YOSUA 16 - Ninia Yali bible

YOSUA 16

¹Kwenang huli-huli it Yusuf omaliki on anyo fam baloho hweag-esebag on de, Ik Yordan ikma etman dulug, lahareg o Yerikho horogman de, mo lahaik waharuk fil o Yerikho en ik eleruk wilipuk on fam etman de iliangge fene leimu etma huli. O Yerikho en de huli-huli ai lahabeg de o Betel domma huli etma.

²Huli ai Betel huli en lahareg, o Lus huli etman o Atarot kwe en de ap Arki on wereg ma etma.

³Etman huli ai lahareg, barat fil de o ap Yaflet on wereg fil en huli Bet-Horon-Hilir fil en dulug, o Gezer, en ambiangma re, ik Laut Tengah wereg on fam etma.

⁴Aire kwenang ap enunggul unuk Manasye on mel, Efraim on mel, at Yusuf ambiangma on omano it enangge mundoho welamag ulug og-esebag kwe.

⁵Ombolim sure kwenang omano unggul unuk Efraim on enahain elekwe hundomog bal heg og-esebag on. Foma timur fil en kwenang iren on hulire, Atarot-Adar en dulug, lauk kahareg Bet-Horon-Hulu fil etlema,

⁶ai en bekit Laut Tengah huli etma. O Mikmetat aire il utara fil wereg. Ne, timur fil de kwenang huli-huli re maseroho re o Taanat-Silo fil etman dulug ai timur fil en sohwandoho re bekit o Yanoah huli.

⁷Etman de huli ilit deg on aire belabeg de o Atarot en de Naharat huli ai en Yerikho waling-waling de ambiang fotogdoho re Ik Yordan huli.

⁸Huli foma barat fil en Efraim on fahet de, o Tapuah en de laha-laha ik doron Kana ikman de, huli-huli re Laut Tengah on etma huli deg. Aire kwenang it unggul unuk Efraim on enangge amag ulug enebe enahain elekwe hundomog yohwan-esebag on de ai,

⁹o kota doron mel, o sili wilayah Efraim on en fam sahalimu etma wereg latfag on et.

¹⁰ Famen de it enunggul unuk Efraim on en de ap Kanaan on de o Gezer fam etman muko wilip enepfag fug. Ai fam de ketia huli en ap Kanaan on de o Gezer etma it Efraim enap nim seberoho wereg, famen de it de ap Efraim on enamingming angge atlug yabuk duruk kamag ulug enomamneroho mingming enepuk katfag.