Read Ninia Yali YOSUA 17 Bible Online

YOSUA 17 - Ninia Yali bible

YOSUA 17

¹O kwenang Ik Yordan foma barat fil omano en foma re it hun Manasye hun Yusuf amloho wandeba on anyo ambiangma on enahain elekwe on etmano fam og-esebag. Hun Makhir, nimi Gilead akni aire, at Manasye amloho wandeba on. Ne, at ebe re weim yapuk ale fahet amururu deg ahun deg ma re o kwenang Gilead fam mel Basan fam mel Ik Yordan foma timur fil etma re at og etfag.

²O kwenang Ik Yordan ikman mo obuk uruk fil on etma re, at Manasye ambiangma on en it enahain elekwe amu on etmano og-esebag, it hwelebag on etare: Abiezer mel, Helek, Asriel, Sikhem, Hefer, Semida mel; it enebe abirangge etare hun Yusuf amloho Manasye anyo ambiangma on ap neg eta. Ne, it enebe re it enahain elekwe etmano fahet kepala welatfag.

³Zelafehad, hun Hefer amloho, Gilead omba (Gilead aire hun Makhir amloho, hun Manasye omba) aire at omalik ap angge welatfag fug, we ahwelani neg welatfag on de: Hwele Makhla, Noa, Hogla, Milka, Tirza, mel eta.

⁴ It enebe re Imam Eliezer mel, Yosua hun Nun amloho anyo mel, it enowesi melal-enepuk on mel enakit lebagdeg hweag-esauk kwit de, “TUHAN en Musa fam uruk kwit de, nit oho nenori ap amu on en kwenang hwelausa ai hagdoho nit oho ambiroho hwelahup ulug hweag-itsi,” ebag. Aireg ma re, TUHAN Awene melaleg higitdoho re hwelani hun Zelafehad omaliki etma re kwenang it enerekwi nim seberoho og-esebag.

⁵Ai fam de at Manasye ambiangma on etma re we ap angge on neg kwenang it dohon hwelebag fug, it hwelani at ambiangma on oho kwenang it dohon hwelebag. Ai fahet de unggul unuk Manasye on ai kwenang at asiog num en hwelebag ai, kwenang Ik Yordan foma fil o Gilead mel Basan mel etmano oho wereg kweleg famen de kwenang o Gilead aire at Manasye ambiangma on it amu on og-esebag.

⁷It enunggul unuk Manasye on ai enobam wilayah iren huli-hulire, o Asyer en indip dulug de o Mikhmetat o Sikhem en mo lahaik waharuk fil etma huli. Etan de huli-huli ai walug belabeg de il apma selatan fil it ap enunggul unuk aegdoho En-Tapuah on enobam huli etma.

⁸O Tapuah aire it enunggul unuk Manasye on enobam, famen de o kota Tapuah ai huli-hulimu re, it Efraim ambiangma on enangge.

⁹Ai en huli-huli wilayah Manasye en on anyo re belabeg de Ik Kana ahanggen on anyo fam etma. O kota ik ahanggen on ai en il apma selatan fil etma re wilayah Manasye on fam wereg famen de at Efraim en on. O wilayah Manasye en on huli-huli anyo re lisoho re kwe ik ag duruk on anyo emberim kwe en de ambiang fotogdoho re Laut Tengah on anyo fam deg.

¹⁰Airoho deg ma re Efraim il apma selatan fil wereg kweleg de Manasye re il emberim utara fil welatfag, ne Laut Tengah on aire mo obuk uruk fil it enanggwenang huli-huli welatfag. Barat laut fil etman wilayah unggul unuk Manasye en on huli-hulire unggul unuk Asyer en on nim huli-hulimu, ne timur laut fil de, wilayah Isakhar en on nim huli-hulimu deg latfag.

¹¹Ne, wilayah Asyer en on mel Isakhar en on mel etma fam de kwenang Manasye en on oho welatfag. Kwenang etare: Bet-Sean mel, Yibleam o sili-sili aluluk kwe wereg on etma mel. Ai en eke o Dor kota aire ik laut elanma welatfag on ai mel, En-Dor mel, Taanakh mel, Megido o sili-sili aluluk kwe wereg on etma mel.

¹² Famen de it enunggul unuk Manasye on en de ap homi o kota eta fam wereg on muko wilibi fesebag fug; ai fam de ap Kanaan on de etma yugdoho welatfag.

¹³Fobik en it Israel enap enebe enomamne hum-ham atfagdeg en ohore iren ap Kanaan on etma abirangge muko wilibi fesebag fug; iren de ap etmano enomamne fam yabuk dukwag ulug mingming-enepuk katfag.

¹⁴It Yusuf ambiangma on etmano en uruk kwit de, “Nit de TUHAN en fanoap nenebaharukmu nenebe hum-ham deg lahe famen de, nit de nunggwelug kwenang huli misig neg og nesauhup?” ebag.

¹⁵Ai ebag ma Yosua en onggo uruk kwit de, “Hit de henebe hum deg lahep, ne o kwenang dom Efraim fil etma hit welam ale fahet mun onggog deg ma re, hit de o kwenang ap Feris on mel Refaim on mel en on etma fam lakiek. It enohwei etma fam obale keron hilinggiyug,” ulug hweag-esebag.

¹⁶Airoho ebag ma it Yusuf ambiangma on etmano en onggo uruk kwit de, “O kwenang dom fene etare nit nim ilit deg fug, ne it enunggul unuk Kanaan on de o donggo doaleg kwe etma wereg lit enangge kereta weim yapuk on bosiemanggen fam wirig on foroho, aire it o Bet-Sena wereg on et ne it aluluk kwe etma maseroho wereg on et mel, ne it o Lembah Yizreel kwe wereg on et mel de airoho neg deg,” ulug hweag-etfag.

¹⁷Ai ebag ma Yosua en it enunggul unuk Manasye on mel Efraim on mel etano fam uruk kwit de, “Dik-demdoho, hit de henebe hum-ham deg lit henebe henomamne deg lahep, ne kwenang eke nim dopnoroho og-hesauk ale aire duk alereg.

¹⁸Hit de o dom kwe etma hwelakiek. O etma re ohwei wereg famen de hiren e muko kuhup halug de abirangge hit hwelahup. Ne, ap Kanaan enap ai fahet de, it enebe enomamne hum deg lit, enangge kereta weim yapuk on fahet bosiemanggen on fam wirig on fahat dalug famen de, hiren muko wilibi fesehup,” ulug hweag-esebag.