Read Ninia Yali YOSUA 18 Bible Online

YOSUA 18 - Ninia Yali bible

YOSUA 18

¹O kwenang TUHAN en abug og-esebag ma anyo mundoho sebeloho febagdeg de, it ap homi Israel on anyo abirangge o Silo kabog-debagdeg, o sabo TUHAN ebe aik waharukmu witfag.

²Ap Israel on anyo enunggul unuk sabit en on de kwenang owan hwelauk eleg ma,

³Yosua en it ap homi Israel on hweag-esauk kwit, “Yaho hit kwenang henaknisi enakni TUHAN Allah en hit og-hesasimu hwelag lalug welam fug angge neg nangno hauk kwit weregman neg de ke huli welamluhup?

⁴Hit henunggul unuk domog en ap henahan momal-enebiek. Momal enepluhupmu re an den kwenang it hwelahup kwe etma huli-huli lisu balik lowag ulug mingming-enepminmu, it balik lahupdeg de an nakit sombandoho wamuhup en.

⁵Kwenang aire yohwandoho re huli sabiren debehup. Ne, at Yehuda re at oho dugdoho wilayah il apma selatan fil welaruhu, ne Yusuf de wilayah at oho ibil on il emberim utara fil welaruhu.

⁶Kwenang huli-huli sabiren aire ilit dulug de an og-numuhupmu re, an den de At Allah en hit henobahet keroho eneg debesi ai nenoluk amag ulug de, helep anggen fam waldoho kumu hahuk.[7]

⁷We it enunggul unuk Lewi on neg de kwenang hit hinim etma it fahet on hwelahup fug, aire it hwela hagde it enebe imam wereg lit TUHAN obahet duruk kamuhup ai. Ne, it enunggul unuk Gad on, Ruben on nim ne Manasye on minggiroho nim fahet de, it dohon de kwenang Ik Yordan foma fil mo lahaik waharuk fil etmano hwelausa. At Musa TUHAN amingming angge anyo en it mundoho og-esasi,” ulug hweag-esebag.

⁸Airoho ebag ma re at Yosua en wene diroho diyug airoho diyug ulug diroho melaloho hweag-esebag, “Hit henebe kwenang au maseroho laluhupdeg de huli-huli kwe anyo ilit angge diyug; airoho dulug de sombandoho an nakit wamluhup. Airoho duhupmu re an den o Silo suman de TUHAN en hit henobahet on keroho enegdoho fesi ulug noluk aruhu,” ulug hweag-esebag. Airoho Yosua en hweag-esebag ma holfagdeg de it anyo kwenang anyo inil hwalukoho lebag.

⁹O kwenang anyo abirangge it anyo en mundoho lebagdeg, kwenang huli sabiren anyo lisu baleheg, ne kota ilonggoman etma wereg on etmano nim lisu baleheg, debag. Airoho debagdeg de it anyo sombandoho re Yosua akit o Silo sabo salegma etmano watfag.

¹⁰Airoho debag ma re at Yosua en de TUHAN en it fahet keroho enegdoho fesi ulug helep anggen wal hebagdeg, at Yosua en de it ap homi enunggul unuk Israel on anyo en kwenang hwelebag fug on etmano it dohon yohwan-esebag.

¹¹Keram yohwandoho og-esebag on de it enunggul unuk Benyamin on fam enahain elekwe etmano fahet yohwan-esebag. Iren dohon de kwenang unggul unuk Yehuda en on nim it unggul unuk Yusuf ambiangma en deg on nim dulug etma.

¹²Il emberim utara fil en huli-huli re Ik Yordan ikman indip dulug de, lahabeg de o Yerikho emberimmu utara fil alo kwe etma, ai en de mo obuk uruk fil en de dom unggul kwe en de o Bet-Awen iliangge lei busandoho etma.

¹³Huli-huli ilitdeg on aire lauk kahareg de o Lus (o Betel ulug enoluk deg ma) etman il apma selatan fil etman de, belabeg de o Atarot-Adar dom fam en apma selatan fil o Bet-Horon-Hilir fam etma.

¹⁴Dom ai foma barat fil etman de, kwenang ai huli-huli ilit deg on anyo re hwaninggoho re o Kiryat-Baal (aire Kiryat-Yearim urukmu ai) fam. O Kiryat-yearim aire it enunggul unuk Yehuda en dohon. Mo obuk uruk fil en kwenang ilit deg on huli-huli re ai.

¹⁵Huli-huli il apma selatan fil de o Kiryat-Yearim fam indip dulug de, dil-dil de ik Me-Neftoah eleruk wilipukmu etma,

¹⁶etan de belabeg de dom indipmu etman de Lembah Hinom nim alukwe wutdeg ma etman Lembah Refaim ambiang fam en utara fil etma. Ai debelug de ilit deg aire belabeg il apma selatan de Lembah Hinom kwe en de o Yebus kwenang fam dom-dom alo kwe en il apma selatan fil en de dil-dil de o En-Rogel fam,

¹⁷il emberim utara fil de hwaninggoho re o En-Semes en de o Gelilot fam o Adumim lahaik lauk men de foma fil etma huli. Ai en de huli ilitdeg on anyo re belabeg de Helep Bohan fam (Bohan aire hun Ruben amloho unuk),

¹⁸ai en de dom-dom Lembah Yordan nim wutdeg ma etano en il emberim utara fil en de, belabeg de donggo ai fam deg.

¹⁹O Bet-Hogla unggulmu dom kwe il emberim utara fil en de fotogdoho re ik Laut Mati on anyo emberim utara fil Ik Yordan ambut kwelabik laukmu etma huli deg. Il apma selatan fil huli-huli deg alere ai.

²⁰Ik Yordan aire il mo lahaik waharuk fil fahet huli-huli deg on. Huli-huli airoho it enunggul unuk Benyamin fam enahain elekwe deg ale omano it enangge on amag ulug yohwan-esebag.

²¹It enunggul unuk Benyamin on fam en enahain elekwe etmano en enobam kota nim o sili doron aluluk kwe maseroho wereg on nim et de nesanggo en welatfag. It enobam etare: Yerikho, Bet-Hogla, Emek-Kezis, Bet-Araba, Zemaraim, Betel, Haawim, Para, Ofra, Kefar-Haamonai, Ofni, Geba nim.

²⁵Ai en eke ombolim o kota nim sili-sili aluluk kwe maseroho welatfag on ebe 14 su inim. O etare: Gibeon, Rama, Beerot, Mizpa, Kefira, Moza, Rekem, Yirpeel, Tarala, Zela, Elef, Yebus (Aire Yerusalem uruk on anyo), Gibea, Kiryat-Yearim mel. Aire kwenang it enunggul unuk Benyamin on fam en enahain elekwe domog et enangge on amag ulug og-esebag kwe re eta.