Read Ninia Yali YOSUA 2 Bible Online

YOSUA 2 - Ninia Yali bible

YOSUA 2

¹ Ai en o Sitim kemah fam sabo saloho wereg ma etano en at Yosua en de ap biren angge o Kanaan inil o lowalik lowag ulug mon-enepfag. Ap biren angge etare o Kanaan kwenang fam etma ling-long inil o lowarik lauk kwit de mun yugdoho re o Yerikho inil o lowarukwag ulug mon-enepfag. Airoho mon-enepfag ma re it etano o kota anyo fam lebagdeg de hwe hambena duruk on eke unuk Rahab ai obam nohobag.

²At raja o kota ai on anyo esanggo holduk men de ap Israel on o Yerikho inil hwalik wahesa urukmu holfag.

³Ai fam de at raja en de hwe Rahab anyo fam wene su hweag-irik lakiek ulug mon-enepfag: “Ap hat hobam nohweik wahesa on etma wilibi feseik ma. It aire o Yerikho kwenang fam abirangge su inil hwalukoho lit wahesa anggere!” ulug mondotfag.

⁴Mondotfag ma, ap biren o inil o lowarik lebag on etanore at hwe Rahab obam ambolma enggelangge baloho lahabeg on apma etmano heraho fesebagdeg en, onggo hweag-esauk kwit de, “An nobam ap wahesa ale aire demdoho, famen de it ebe diman wahesa ulug de an mun napeleg. It enebe re o kota sok humon anyo latuk eleg kweleg o heik a seleg a deg li em etano fahe mun lahesa. Hit kema laluhup en ulug oho an den hein mel og-isihi fug, famen de fol-folo mug-esa laman de enombolim mug-esa lahep ha alereg,” ulug hweag-esebag.

⁷Airoho hweag-esebag ma re at raja en amingming on etano o kota embeselug lebag. It dag fil wilibik lebagdeg duruk men de o kota sokole anyo mundoho latfag. Iren ap biren inil hwalik lebag on etano hera enebil de Ik Yordan dahaloho nindig-aik lauk on huli fam lebag.

⁸Hup anyo salim ap biren inil hwalik lebag on etano owan nohouk fug li re, at Rahab anyo o ambolma lahabagdeg de,

⁹it etano fam uruk kwit, “At TUHAN o kwenang su hit og-hesasi ale aire an noluk deg lahi, ne ap homi suma abirangge en de hit henobam enakol henepuk.

¹⁰ Hit o Mesir en wiliplug waharuk li TUHAN en ik Laut Gelagah anyo firohwe fesi ale ai mundoho holduhuk. Ne, eke Ik Yordan foma fil mo lahaik waharuk fil etman hiren ap homi enunggul unuk Amori on enowesi raja biren angge Sihon nim Og nim binggi enowatuhup ale oho mundoho holduhuk.

¹¹Airoho nenesanggo holduhuk deg de nit mundoho nenamelmel neg atsi. Hit henobahet de ap niren oma mundoho eneluk anggin atuk kwit enakol neg atswa. Hit henakni TUHAN Allah aire o bohol fam inim kwenang fam inim dik-demdoho Allah Mun Omamne humon wereg.

¹²An den behi ale re an den hit henobahaki ale etaroho hiren oho an nahain elekwe on airoho hobahakuk ulug At henakni TUHAN unuk fam hombuk balep behi. Hat hakni, hisinga mel, hori-herekwi mel, it enahain elekwe on abirangge mel, niren enowaruhuk fug, ite inili og enebuhuk ulug sali wat-nemek. Ne, airoho duhuk ulug aire iren demdoho uswa ulug an nenda ebereg welaruhuk en eneg angge eke og-nemek!” ulug hweag-esebag.

¹⁴Airoho hweag-esebagma re it ap biren etano en uruk kwit de, “At TUHAN en o kwenang su nit og nesauk li em de niren oho hit henobam fano ale neg henobahakuk ulug sali wat-hutuk kahe. Famen aire haren nit fahet ap homi amu on fam dindil-esahun fug halug fahet. Ne, niren sali wat-herehe on ai dipdoho duhuk fug halug de we At TUHAN en neg nit hururung nenobahaukwag,” ulug hweag-etfag.

¹⁵At hwe Rahab ai obam de o kota elehet fak oho on anyo fam wirigmu re, hwe Rahab anyo en ap biren angge etano sabu mebon fam liloho jendela elekwe belap-enebik wahasi.

¹⁶It hweag-esauk kwit de, “O Dom fil etma lakiyug,” ulug hwe Rahab anyo it hweag-esebag. “Ap at raja en mon-enebik wahasi on etman sen-henebuhup hayog de. Nukoho henahanam aire etma heraho lit wereg lamuk, weregman it sombandoho wahail laukem neg de, hiroho laul ulug lakiyug,” ulug hweag-esebag.

¹⁷Ap inil hwalam lebag on biren angge etano en hwe Rahab fam uruk kwit de, “Hiren sali wat-nemek ulug nit fam heng nenebehen on ai niren dipdoho neg duhuk.

¹⁸We haren duhun ale re su. Nit lahe o hat hanggwenang fam au bin kwik waharuk halug de, haren de sabu mebon au jendela fam eta borebeiyug. Hat hakni-hisinga, hehebi-herekwi mel, hat hakni on enunggul unuk agdoho deg on etmano abirangge mel de o haren au neg dugdoho feseiyug.

¹⁹Ne, it ai on enesahalimu misig eke o su fam en bologdoho wilibik lahumu binggi ware fohup halug de, at wararuhu on aire at onggwareg obabe elekwe; nit de ai fahet diroho airoho ulug duhuk fug. Famen de o su olman eke enebe alemat amuhup on halug de, wene nit nenobam aruhu.

²⁰Ai hagdoho re haren nit fahet ap eke fam hweag-esahun halug de, nit de haren sali wat-nemek ulug heng nenebehen on ai fam de hetdeg welamuhuk fug,” ulug hweag-etfag.

²¹Ai ebagma at iren ebag on anyo at Rahab en fano bebagdeg, it anyo enebe lowag ulug embesebag. Ai en aren sabu mebon anyo obam jendela fam etano borebebag.

²²Airoho dulug de it ap biren angge etano o dom fil etmano lebag. Ne, ap raja en mon-enepsi on etano re nukoho henahanam hunduko di kwe su kwe hera-enepfagma de it enebe hweag-enepfag fug. Airoho dusareg it mon-enepfag on etano enambol somban o Yerikho watfag.

²³Ai en de it ap Israel on inil hwalni biren angge etano o domman wambik laswareg, ik dahaloho nindig-atlug Yosua wereg ma sombandoho watfag. Ai en iren debag ale mel hebag ale mel etmano mundoho Yosua fam bilinggoho hweag-etfag.

²⁴Ai en iren uruk kwit, “Ap homi etma mundoho re nit fahet enakol en duruk anggere, o kwenang aire TUHAN en dik-demdoho nit-og nesahu,” ulug hweag-etfag.