Read Ninia Yali YOSUA 20 Bible Online

YOSUA 20 - Ninia Yali bible

YOSUA 20

¹ Airoho debagdeg TUHAN en Yousa mingming duruk kwit de,

²“Wene diroho ap homi Israel on fam hweag-esakin. An den Musa hweag-utuk kwit de o kota along balegma welaruhu mu fahet hit hweag-hesowag ulug hweag-itihik. Kota etare ap homi en along balegma etma welamag ulug buroho lauk kamuhupmu fahet. Ketiare kota eta momaliek.

³Ap eke en wenggeleg elegman ap amu on eke binggi ware folug halug de, ap en unggulmu watul ulug enahummu ahe laharuk on ai fam en waruk no ulug heiye lauk halug lil atuk karuhu.

⁴Aren de o kota etan misig on eke fam heiye lauk karuhu fano, ne aren de o kota sokole kwik laukmu en wene katukdoho baldukmu etma lalug de, aren de ap enowesi melal-enepuk on etmano fam de wene aruhu ale anyo fahet dindiloho hweag-esauk karuhu. Hweag-esahumu re it melal-enepuk on etmano en de at ebe o kota anyo fam kwik lowag ulug hweag-umuhup deg de ebe wereg ma fahet obale hweag-umuhup.

⁵Ne, ap unggulmu watul ulug mutlug lahup on anyo lahe muko lahupdeg eta huli aik lahup halug de, ap homi o kota ai wereg on en de ap anyo it enenggikmu og-esahup fug. Ap ai en ap amu on aire ahum kwe het en waruhu fug mu we wenggeleg elegman waruhu mu re, iren ap ai along baluhup.

⁶At anyo re o kota ai fam neg weregman de at awene ap humdoho enolohotman katukdoho baluhupdeg, ne ap eta li em Imam Agung welaruhu on anyo wararuhu huli re etma welaruhureg obam lahu. Airoho atil lauk em neg de ap anyo obam indipmu waruhu mu etmano sombandoho lahu, ulug hweag-esakiyug,” ulug hweag-etfag.

⁷Ai ebag ma re o kwenang Ik Yordan ikman barat fil etmano re o kota along balegma welaruhu on ulug it ap homi Israel on en fouk debebag on de su: O Kedes, o Galilea en Naftali on enandom fam etmano nim, Sikhem Efraim on enandom fam etmano mel, Hebron Yehuda on enandom fam etmano nim febag.

⁸O Ik Yordan foma fil mo lahaik waharuk fil kwenang amig lehoma iliangge lei o Yerikho en foma fil etmano en de, iren kota along balegma ulug de dia febag: Kota Bezer o wilayah Ruben on fam etmano nim, kota Ramot o Gilead en wilayah Gad on en etmano nim, kota Golan o Basan en wilayah Manasye on fam etmano nim eneko febag.

⁹O etare along balegma it ap homi Israel on nim fahet nim, ne ap bohon it enesahalimu wereg on fahet nim eneko febag. Ap hundomog en wenggeleg elegman ap amu on binggi ware feselug halug de, ap iren oho unggulmu watul ulug mutlug waharuk on etmano re o eta fam en along bal-atuk karuhu; ne at ebe ap homi humdoho inil hanim en awene baluk eleg kweleg de binggi watuk kamuhup fug.