Read Ninia Yali YOSUA 21 Bible Online

YOSUA 21 - Ninia Yali bible

YOSUA 21

¹ Nukoho misig salim de it enunggul unuk Lewi on fam en enahain elekwe on ap neg omano o Silo Kanaan kwenang fam omano Yosua hun Nun amloho anyo mel, ne it ap enunggul unuk Israel on en ap neg abirangge etmano mel enekit lebag. Lebagdeg iren uruk kwit de, “At Musa fene en TUHAN en melale foruk kwit de, nit ap Lewi nenap nenobam, o kota nenebe wereg ma mel, ne enggela lei o kota etma horog kwe nit nenowam fahet nim, og nesowag ulug melale fesein,” ulug hweag-esebag.

³Airoho ebag ma re ap homi Israel on en de TUHAN en wene melaleg anyo muko debag. Kwenang it enonggwareg en on etmano en de, iren ap Lewi on fam kota memereg on mel enggela lei mel og-esebag.

⁴Kirim-keram o kota hwelebag on de it enunggul unuk Lewi on famen agdoho unggul unuk Kehat on anyo dag hwelebag. At Imam Harun ambiangma on en enahain elekwe on etmano fam de o bumbuk 13 en o wilayah Yehuda on mel, Simeon mel, Benyamin mel en on fam etmano en og-esebag.

⁵It enahain elekwe amu on unggul unuk agdoho Kehat on fam etmano re o kota num en angge wilayah Efraim on mel, Dan on mel, Manasye on Ik Yordan foma barat fil on mel en og-esebag.

⁶Unggul unuk agdoho Gerson on de o kota 13 en angge wilayah unggul unuk Isakhar on mel, Asyer on mel, Naftali on mel, unggul unuk Manasye Ik Yordan foma timur fil anyo mel fam en hwelebag.

⁷Unggul unuk agdoho Merari on fam enahain elekwe on etmano re kota ebe nesanggo en angge wilayah unggul unuk Ruben on mel, Gad on mel, Zebulon on mel fam en hwelebag.

⁸Airoho ap homi Israel on en kota omano mel kwenang etmano enggela lei mel helep anggen fam enenggik wal-heheg[9] ap Lewi on fam TUHAN en Musa fene en wene melale-etfag ale higitdoho yohwan-esebag.

⁹It ununggul unuk Lewi on fam en unggul unuk agdoho Kehat on anyo mel ne imam hun Harun ambiangma on mel dam enobam kota hwelebag; it ai fam de o kota 13 en nim kwenang enggela lei inim og-esebag. It enunggul unuk Yehuda nim Simeon nim en de it enobam bumbuk soho en hwelebag, o etare: Libna, Yatir, Estemoa, Holon, Debir, Ain, Yuta, Bet-Semes, Arba mel o ebe unuk de hun Enak akni unuk fene soaleg on ai. Kota aire ketia unuk Hebron o ebe along baloho febag ma Yehuda andom fene fam etma. Yabuk kwe inim o sili dot-doron nim de Kaleb hun Yefune amloho angge amag ulug og etfag. Unggul unuk Benyamin on fam en de iren o kota ohwan hwelebag, kota etare: Gibeon, Geba, Anatot, Almon.

²⁰Unggul unuk agdoho Kehat on ai fam en enahain elekwe amu on etmano re o kota num en nim kwenang enggela nim og-esebag. Unggul unuk Efraim on fam en de it ai o kota ohwan hwelebag, o etare: Bet-Horon, Kibzaim, Gezer, Sikhem o kota along baloho febag on Efraim andom fam etmano nim og-esebag. Unggul unuk Dan on fam en de it o kota ohwan hwelebag, o etare: Elteke, Gibeton, Ayalon, Gad-Rimon nim. Unggul unuk Manasye on barat fil wereg on anyo en de o kota biren hwelebag, o etare: Taanakh mel de Gat-Rimon mel.

²⁷It enunggul unuk Lewi on fam en unggul unuk agdoho amu on ekere Gersom on ai. It enunggul unuk agdoho Gerson on ai fam de o kota 13 en nim, kwenang enggelangge nim et og-esebag. Unggul unuk Manasye mo lahaik waharuk fil wereg on anyo en de o kota biren og-esebag, o etare: Beestera mel Golan o along balegma ulug o Basan fam etma febag on anyo mel hwelebag. Unggul unuk Isakhar on fam en de o kota ohwan hwelebag, o etare: Kisyon, Dobrat, Yarmut, En-Ganim mel. Unggul unuk Asyer on en de it o kota ohwan hwelebag, o etare: Misal, Abdon, Helkat, Reboh mel. Unggul unuk Naftali on en de it o kota henahan hwelebag, o etare: Hamat-Dor, Kartan, Kedes o aire along balegma ulug o Galilea fam etma febag on anyo mel hwelebag.

³⁴It enunggul unuk Lewi on fam en unggul unuk agdoho misig ekere Merari on, it ai fam de o kota nesanggo en nim de kwenang enggelangge et og-esebag. Unggul unuk Zebulon on en de o kota ohwan hwelebag, o etare: Yokneam, Karta, Dimna, Nahalal mel. Unggul unuk Ruben on en de it o kota ohwan hwelebag, o etare: Bezer, Yahas, Kedemot, Mefaat mel. Unggul unuk Gad on en de o kota ohwan hwelebag, o etare: Mahanaim, Hesybon, Yaezer, Ramot, o aire along balegma o Gilead fam etma febag on anyo mel hwelebag.

⁴¹Aireg ma re kwenang it ap homi Israel on enanggwe atfag ma ai en de o kota re 48 en nim kwenang enggelangge wilibig on maseroho wereg on mel ap Lewi on fam og-esebag.

⁴³Airoho TUHAN en de ap homi Israel on fam kwenang abirangge hombuk baloho abug it enambu-enombasi fam hweag-esebag on etmano og-esebag. O kwenang ai fam sebelik kwebagdeg de ap homi Israel on de yugdoho etma welatfag.

⁴⁴Airoho debag ma re TUHAN en it enambu-enombasi fam sali hweag-esebag aleroho re kwenang ai fam de At TUHAN en along baloho forohoma re enakol eleg angge enambong seroho welatfag. It enaselei on misig eke ulug on oho it fam kahaleg hag ale duruk katfag fug, aire TUHAN en it fam enalong ap debesebag ma atlug.

⁴⁵TUHAN en de sali hweag-esebag on etmano misig eke dahan debebag fug mundoho dip debebag.