Read Ninia Yali YOSUA 22 Bible Online

YOSUA 22 - Ninia Yali bible

YOSUA 22

¹Airoho dulug Yosua en unggul unuk Ruben on mel Gad on mel Manasye fomane Ik Yordan foma timur fil on anyo mel wol-enepfagdeg,

² aren it enobam uruk kwit de, “Hit de TUHAN amingming angge Musa anyo en melale henobahasi ale anyo di ale su ale mun-mandoho duruhup. Ne, hiren de an den wene melale henobaharuk on oho holoho neg duruhup.

³Li eiya fam de hiren henori ap Israel amu on etma enemu neg dukwag ulug embeseruk katuhup fug. Hit de henakni TUHAN Allah en Awene melaleg anyo dik-demdoho hole folug duruhup.

⁴Aireg ma re hit henakni TUHAN Allah en sali hweag-esasi ale higitdoho re, it henori Israel enap amu on etma fam de enobam hambuge fesesi. Anggere, ketia re hit henebe wilayah hiren on Ik Yordan foma mo lahaik waharuk fil endam at Musa en hit og-hesasimu etmano lakiek.

⁵Wene melaleg Musa hit hweag-hesasi on anyo holoho neg duruk kamuhup en de furoho kahale fahat dakiyug. Wene melaleg aire: Henakni TUHAN Allah fam henenda hundig deheg, At enda boruk ale neg muko deheg, At awene melaleg omano furoho holoho neg deheg, At ebe fam dipdoho neg deheg, henendaman nim henaheime henoluk fam en nim abirangge fam At obahet neg deheg, duruk kamuk, ulug hweag-hesasi anyo,” ulug hweag-esebag.

⁶Ai en at Yosua en lowag ulug fano ebagdeg, it enebe sombandoho wilayah iren on fam lowag ulug monde feseruk kwit de wene duhup ale ulug su enobam febag, “Ketiare hit dung ahepdeg de hit henebe sombandoho lauk kwit, henowam mel, perak, emas, tembaga, mel bosiemanggen mel sum bogsum mel, hwelalug laluhup. Hiren deloho hwelauhup angge etma re henori hit henunggul unuk on fam oho yohwan-esakiyug,” ulug hweag-esebag. Airoho ebag ma re unggul unuk Ruben on mel, Gad on mel, Manasye on Ik Yordan foma timur fil wereg on anyo mel de ap Israel amu on etmano enobahalug de o Silo Kanaan fam etmano en de it enanggwenang fam o Gilead etmano laul ulug lebag. Ite enebe kwenang ai fam de TUHAN en wene melaloho Musa fene en hweag-esebag aleroho welatfag. (Unggul unuk Manasye on foma minggiroho re kwenang Ik Yordan foma fil etmano Musa en og-esebag ma hwelebag, ne unggul unuk Manasye on fomane on de kwenang Ik Yordan foma barat fil omano Yosua en it enunggul unuk amu on nim seberoho og-esebag ma (...)

⁷

⁸

⁹

¹⁰It enunggul unuk Ruben, Gad, Manasye foma Ik Yordan foman mo lahaik waharuk fil on anyo mel, Ik Yordan foma fil en barat fil etma o Gelilot aik lebagdeg, iren de mezbah misig eke hum-ham on ebe yit-yat on ik horogma eta witfag.

¹¹Ap homi Israel on fomane en enesanggo holduk men de it enunggul unuk on fomane omano en uruk kwit de, “Ap enunggul unuk Ruben, Gad, Manasye Ik Yordan ikman mo lahaik waharuk fil on mel en de o Gelilot Ik Yordan horogma wilayah niren on fam etmano mezbah eke wiroho unduhuk fehesa,” urukmu holfag. Holfagdeg de it enebe abirangge o Silo kabog-debagdeg iren de it enunggul unuk Israel amu on Ik Yordan ikman mo lahaik waharuk fil wereg on ai enowarik laul ulug duruk katfag.

¹²

¹³Airoho duruk kwit de it ap homi Israel on en de at Pinehas, Imam Eleazar amloho anyo it enunggul unuk Ruben mel, Gad mel, unggul unuk Manasye o Gilead Ik Yordan foma en mo lahaik waharuk fil wereg on anyo ha enekit mondotfag.

¹⁴At Pinehas ai inim de ap kaindeg Israel on enebe num en nim lebag, — it enunggul unuk ik foma mo obuk uruk fil wereg on omano ap misig heg unggul unuk domog en mon-enepfag, it aire enebe domog de enahain elekwe etmano fahet kepala wereg on neg lebag.

¹⁵Airoho lebagdeg de it anyo unggul unuk Ruben, Gad, Manasye o Gilead wereg on mel wereg ma etmano aik lebag.

¹⁶ Ai en de ap homi TUHAN omaliki etmano ininuk fam de it enunggul unuk Ruben, Gad, Manasye mel etano fam uruk kwit de, “Nunggwelug hiren Allah ap homi Israel on enakni fam mun kwasik deg ale su dehep? Hiren helep mezbah henemu wirehep ai fam de TUHAN awene sahaloho fehep! Hiren de At awene melaleg anyo higitdoho dehep fug!

¹⁷ Hiren de nit o Peor en siag duruk ale anyo wenggel-hauhup fug a? Etano li em de nit su re TUHAN omaliki at deg kweleg Aren ouk anggin-anggoloroho nenobam fesi anyo! Ne, ketia huli en de anyo ambiangma hauk kahe neg ai. Aire dotdeg hag dehen ulug duruk kahep a?

¹⁸Ketiare hiren TUHAN fam henambol yig-utlug duruk kahep au? Hiren yoho su salim TUHAN ele sahaloho duluhup halug de, sono re Aren ap homi Israel on abirangge fam unggum fesehu.

¹⁹Ne, hit henobam welahepma ai obale mun emereg ma hiren wene kabog-dulug TUHAN obahet durukmu ulug debouk fug alereg en duruk kahep halug de, o okore TUHAN obam fil TUHAN Obam Sabo saleg wereg fil suma manik. Nit nenobam etma heng-nenepluhup de fano, famen de nit nenakni TUHAN Allah obahet de mezbah mundoho wereg kweleg, mezbah amu on eke dopnoruruk ai fam de hiren TUHAN ele sahaleheg, nit nenele sahaleheg duluhup de fug.

²⁰ Akhan hun Zerah amloho di angge su angge mun elehapdoho foruk on anyo fahet TUHAN en wene melaloho hweag-nesasi on hole folug disi fug fam ambiangma keroho atsi no, ulug wenggel-hakiyug! Ap homi Israel on abirangge unggum nenobam atsi! Siag disi on de we at Akhan neg, famen de waratswa on de at amu neg de fug anyo!” ulug hweag-esebag.

²¹Airoho hweag-esebag ma re it unggul unuk Ruben, Gad, Manasye mo indip fil wereg on anyo en onggo uruk kwit de,

²²“Mun Along wereg on aire TUHAN amu neg! Mun Along wereg on aire TUHAN amu neg! Niren nunggwe fahet dehe ale aire At mundoho oluk deg, ne hiren oho keroho dehesa ulug aire henoluk amag boruk kahe! Niren lahe TUHAN ele sahaloho foul en ulug dehe halug ane, ite niren At obam demdoho bouk alereg fug en airoho dehe halug de, nit ketia eiyan waramul fano neg!

²³Niren TUHAN ele sahaloho folug mezbah au nit nenamu en waroho yalduk on yaldul en ulug mel, ne gandum ane ninim seberoho ulug waroho yalduk on ane, au emberimmu yaldul ulug behereg dehe halug de, TUHAN amu en neg nit unggum og nesamisi.

²⁴Nenori, Niren behe alere etare fug! Niren mezbah ai wirehe ale aire, niren nenenda boruk kwit de, fobik etma fam hit henambiangma on en nit nenambiangma on fam uruk kwit de, ‘Hit de TUHAN Allah Israel on aire hinim hinindip wereg fug!

²⁵Hakiek! Aren Ik Yordan au nit nenesahali mu bul fesi aire nit nim hit henunggul unuk Ruben, Gad, nim minggiroho welamag ulug fesi. Dik-demdoho, hit de TUHAN hinim de indip wereg fug,’ ulug hweag-esa ulug nenenda fituk kwit wirehe.

²⁶Anggere, niren mezbah wirehe on aire waroho yaldukmu fahet ulug mel, ne niren di on su on og utuk mu ulug mel de fug,

²⁷ite hit nim nit nim fahet eneg ale welamag ulug mel, de nit nenambiangma fobik on fahet mel. Nit oho re dik-demdoho TUHAN fam At Obam Sabo salegma Ebe enam aik waharukmu etmano, waroho yalduk angge mel, di on su on obahet foruk on mel, ne ninim hundig wereg lit ulug waroho foruk on mel feik lalug obahet duruk kahe boruk kamag ulug. Airoho duruk fam de it hit henambiangma on en de nit nenambiangma on fam uruk kwit hit TUHAN inim hinindip wereg fug ulug aire uruk kamuhup fug.

²⁸Anggere, niren boruhuk alere: Hit henambiangma on en lahe airoho uruk halug oho re, nit nenambiangma on en uruk kwit de, Mezbah au hinil hakiek! Nit nenambu-nenombasi en de mezbah TUHAN en anyo hagdoho wutswa on aure, waroho yaldukmu mel, ne di on su on obahet forukmu mel, fahet de fug, ite hit nim nit nim fahet eneg ale welamag ulug wutswa, ulug uruk kamuhup.

²⁹Demdoho beiyek, niren mezbah eke waroho yaldukmu ulug nim, ite gandum og utuk mu ulug nim, ite di on su on forukmu ulug nim, ite ninim seberoho ulug forukmu nim ulug, nit nenakni TUHAN Allah anyo en mezbah re O Sabo At ebe enam aik waharukmu olohotma anyo wereg kweleg, niren dopnoroho wiri folug duruk fam TUHAN ele sahaleheg, ne At obahet duruk ale boge feheg, duhuk fug lit deg,” ulug hweag-esebag.

³⁰Hweag-esebag ma re it ap enunggul unuk Ruben, Gad, Manasye mo indip fil on etano en dindiloho hweag-esebag on etmano Imam Pinehas nim it Israel on enowesi kaindeg num en Ik Yordan foma barat fil on etmano nim en enesanggo holfag.

³¹Holfagdeg at Pinehas Imam Eleazar amloho anyo en it enunggul unuk Ruben, Gad, Manasye timur on anyo mel fam uruk kwit, “Ketiare hiren TUHAN ele sahaloho dehep fug mu re TUHAN nit ninim wereg anyo nenoluk aha. Hiren de TUHAN en ap homi Israel on unggum fesouk no ulug enahap wendare fesehep,” ulug hweag-esebag.

³²Airoho hweag-esebagdeg de Pinehas nim it Israel on enowesi kaindeg nim anyo, lebag. Iren de ap Ruben on mel Gad on mel, Manasye on mel anyo re o Gilead etmano feselug lebagdeg sombandoho re o Kanaan lebagdeg, wene anyo ap homi Israel on fam hweag-esa lebag.

³³Hweag-esa lebag ma re ap homi Israel on oho re wene anyo fahet enenda yamuk ebagdeg iren Allah mit-mot debag. Iren de ap Ruben on mel, Gad on mel, enowareheg, enobam bumbuk elehapdoho feheg, dik lahuk ulug ebag on anyo sebele febag.

³⁴Ambiangma en de ap enunggul unuk Ruben, Gad, on anyo en uruk kwit, “Mezbah aure nit abirangge fahet TUHAN aire Allah ulug il kumu nenesauk,” ulug ebagdeg, iren mezbah anyo unuk “Il fu” soalfag.