Read Ninia Yali YOSUA 23 Bible Online

YOSUA 23 - Ninia Yali bible

YOSUA 23

¹Li anunuroho ap homi Israel on etmano o liog lombukdoho neg wereg latfag; ite eneselei on en eke siahap enebuk fug angge neg weregman neg de eta li em Yosua ebe nun sobal atfag.

²Airoho deg latfagdeg de at Yosua en ap homi Israel on abirangge mel, it enowesi kaindeg mel, it melal-enepuk on mel, enawene katukdoho bilingguruk on mel, ap sehen foroho on enowesi perwira mel, wol-enepfagdeg uruk kwit, “An ketiare mundoho sobal ahi.

³Hit henalahasikdoho henakni TUHAN Allah en di ale su ale ap homi enunggul unuk abirangge suma fam debesesi ale hiren mundoho hauhup. Hit henobahet disi on de At henakni TUHAN Allah amu en neg disi.

⁴Kwenang it ap di enunggul unuk su enunggul unuk wereg kwe etma oho, ne kwenang it ap enunggul unuk an den enalong elehapdoho feserihik kwe oho, aire kwenang ebe mo lahaik waharuk fil de Ik Yordan ikman de dil-dil mo obuk uruk fil de Laut Tengah on anyo fam diahan deg ai. Abirangge etma re hit henangge on amag ulug an den mundoho yohwan hesauihik.

⁵Hiren lahe ap homi enunggul unuk ai on hinim weim yabik lahup halug de, At TUHAN Allah hit henakni anyo en sali hit henobam hweag-hesasi hagdoho re ap homi etma enowaroho mon-esahup, ne hiren it enowarik lahup halug de it enebe hit fahet enakol en heiye lahup.

⁶Ai halug de, hiren Buku Wene melaleg Musa en anyo fam baleg aleroho neg fik-furebelug duruk kamuhup en de kahale fahat-dakiyug. Wene melaleg wereg on ai misig ulug oho eke dahandoho duk fug.

⁷Airoho duruk kamuhup fam de hiren ap enunggul unuk hit henesahali kwe wereg on nim sahali-fahali amuhup fug. Hiren de it ap homi etma enenggembu dewa unuk uruk kamuhup fug, ite ai unuk fam hombuk balduk kamuhup fug. Eke kembu dewa etma fam hiren henerohole belabeg apma sahaun eheg, obahet deheg, duruk kamuhup fug.

⁸Hiren indip duruhupdeg duruk kwit neg ketia huli welahep ale airoho re, hiren TUHAN obam dipdoho neg duruk kwit welamuhup.

⁹Ap homi enunggul unuk humon etmano re At TUHAN en hit fahetdoho muko wilibi fesesi; iron etman ap misig en oho eke hit hinim weim yabuk alereg on eke deg lamuhup fug.

¹⁰ Hit henakni TUHAN Allah anyo en sali hweag-hesasi aleroho re, Aren hit henobahet weim yapukmu re ap hit henesahalimu en misig en de ap hum-hamdoho enalong elehap debeseruk kamuhup.

¹¹Aireg ma re, hit henakni TUHAN Allah fam henenda hundig duruk ale fahet ebereg wereg lamuk.

¹²Ne, hiren dipdoho duk eleg angge ap enunggul unuk hit henesahali kwe wereg on nim aham faham uruk eheg, ne hiren it on og enebeheg, duruk kamuhup halug de,

¹³hit henakni TUHAN Allah en de ap homi enunggul unuk ai on hit henobahet muko wilip enebuhu fug anggere wenggel-hakiyug. Ai fam en ahamdoho re it aire hit fahet de mun il wereg laruhu, iren de hit fam de sapna leho on mel, sabu yepdeg on mel, hag deg lamuhup. Iren de hit fam anggin anggoloroho howag ulug henobaharuk kamuhup; It aire hit henahabimu fetnangge wareg on mel ite alog hinilmu mel hag deg lamuhup. Hit henebe ouk-bouk hauk kwit de, hiren misig ulug oho eke o kwenang obale mun fanoma hit henakni TUHAN Allah en og-hesasimu su eke welamuhup fug.

¹⁴Ketiare an nebe waratuk ale ahi. Ne, hit henakni TUHAN Allah en de mun fano angge og-hesahuk ulug sali wat-hesasi on anyo mundoho og-hesasi ale aire hit henemu domog en de heneluk deg. Aren sali wat-hesasi on etma abirangge re mundoho dip-debesi, misig ulug oho eke dahan debesi fug.

¹⁵Famen de Aren sali wat-hesasi on etmano domog hit henobam dipdoho neg disi hagdoho re, Aren de hit henobam dik-demdoho henowaruhuk ulug debehu.

¹⁶Henakni TUHAN Allah en wene melaleg hiren holoho duruk kamag ulug hweag-hesasi on anyo sahsale folug, hiren lahe kembu ilah amu on fam obahet dik laheg, kembu etma apne weheg, duhup halug de, TUHAN olok atlug hit unggum henobam henobahaku. Li misiham neg hit henebe abirangge o kwenang mun fanoma henakni TUHAN en hit og-hesasimu oman eleg amuhup,” ulug hweag-esebag.