Read Ninia Yali YOSUA 24 Bible Online

YOSUA 24 - Ninia Yali bible

YOSUA 24

¹Yosua en de ap homi enunggul unuk Israel on mundoho o Sikhem kabog-debesebagdeg de, it ap kaindeg mel, melal-enepuk on mel, hakim unggum katukdoho kong-duruk on mel, ap sehen seneg on enowesi perwira mel at akit wamag ulug hweag-esebag. Hweag-esebag ma re it anyo Allah wereg ma lebag.

² Lebag ma at Yosua en it abirangge anyo fam hweag-esauk kwit de, “Ap homi Israel on enakni TUHAN Allah anyo en hit henobam hweag-hesauk ale su henesanggo holiek, O indik-endam etma re hit henambu-henombasi re Ik Efrat foma fil etlema wereg lit de, kembu dewa fam apne wauk katswa. It enesahasalimu etman ap misig eke re hun Terah it Abraham nim Nahor nim enakni ai welatsi.

³ Airoho weregman de An den at Abraham hit henambu ai Ik Efrat foma fil etleman wauihikdeg de, aren o Kanaan kwenang fam etma fene lowag ulug mingming dirihik. An den de at ambiangman ondoho on hum-hamdoho og itihik. Kirim-keram de Ishak og itihik,

⁴ ai en de at Ishak fam de omaliki ap angge biren, enebe re Yakub ha Esau ha og itihik. At Esau fam de An den o Edom etman dom-dom etma at angge on amag ulug og itihik, famen de Yakub, hit henomba aire omaliki nim seberoho re o Mesir oko lausa.

⁵ Ai en de An den Musa nim Harun nim mon-enepihik mu re it ap homi Mesir on etma enobam anggin-fanggin humon debeserihikdeg, ai en hit o etman og-heneplug wilibik waharihik.

⁶ An den de hit henambu-henombasi etma o Mesir en og eneplug wilibik wahariharukmu, Mesir enap en it enangge kereta dog yapil lauk angge fam inim, ne tentara kuda emberimmu lahalug weim yapuk on nim, en mug-eneplug wahausa. Ne, it hit henambusi-henombasi ai Laut Gelagah wereg ma eta aik wahausareg de,

⁷An den let-nenebukwag ulug iren An wol-napswa. Airoho uswa ma re An den it Mesir on dulug it Israel on dulug anyo re heik deberihik, ne it Mesir enap anyo re An den ik laut en sale feserihik mu re it enebe abirangge obuk uswa. An den ap Mesir on fam debeserihik ale etma fahet de hit mundoho henoluk deg. Hit henebe re li anunuroho o iliangge leimu etma welatuhup.

⁸ Airoho weregman de An den hit og-heneplug de o it ap homi Amori on enanggwenangma Ik Yordan ikman mo lahaik waharuk fil etma og-heneplug waharihik. Iren de hit hinim weim yabik lausa, famen de it fam en hit henalong amag ulug An den henobaharihik. Hiren de it enanggwenang anyo del dauhup, ne An den de en enebe mun elehap deberihik.

⁹ Airoho dirihikmen de at Balak hun Zipor amloho raja Moab on anyo en hit hinim weim yapsi. Ne, aren de hun Bileam hun Beor amloho anyo en hit hururung henebukwag ulug ap mon-enepsi.

¹⁰Famen An den de at Bileam enda besi ale airoho dirihik fug mu re, aren hit fanoap henobahasi. Airoho at Balak fam en An den hit henahap wendare henobaharihik.

¹¹ Ai en de hit henebe Ik Yordan baloho re o Yerikho fam aik waharuhup. Ap Yerikho enap en de hit hinim weim yabik lausa, ne it ap Amori, Feris, Kanaan, Het, Girgasi, Hewi, Yebus enap en oho airoho hit hinim weim yapswa. Famen de it mundoho ai fam en An den hit henalongap henobaharihik.

¹² Hiren it enowarik laul ulug lauk li re, An den de it enenda nong-hong debeselug enakol debeseruk katihik mu re raja Amori on biren etano oho re hit fahet enakol en heiye wilipswa. Hit henasehen nim ne hit henenggarog nim along fam hit henalong atuhup fug.

¹³ Kwenang An den hit og-hesauihik mu aure hit mun anggilik anggoloroho hauhupdeg hwelauhup fug. Ne, kota An den hit og-hesauihik mu etma oho re hiren wituhupmu re fug. Famen de ketiare hit etma welahep, ne hiren neg e anggur anggen mel, zaitun anggen mel etma hiren yatuhupdeg hagdoho nauk kahep, uruk,” ulug hweag-esebag.

¹⁴Airoho ebagdeg Yosua en ele ambiangma uruk kwit de, “Aireg anggere, ketiare TUHAN along bolug leho foruk kamek. Henenda mun bekit fam ne dipdoho neg duruk kwit At obahet neg duruk kamek. Kembu ilah it henombasi en o Mesopotamia en nim o Mesir en nim apne wauk katfag on ai fam apne wauk kam fug. We TUHAN obahet neg duruk kamek.

¹⁵Hiren lahe TUHAN obahet neg duruk ale henerim halug de, kembu ilah amu on endam it henambusi-henombasi en apne wauk katfag on obahet neg duruk kamuhup a, ite kembu ilah it ap Amori on enanggwenang de hit ketia welahepma oman apne wauk katswa on etma fam obahet duruk kamuhup a, ulug aire yoho su salim nit de su on obahet neg duruk kamuhup ulug katukdoho iek. Famen de nit an mel an nahain elekwe on mel de we TUHAN amu obahet neg duruk kamuhup,” ulug ebag.

¹⁶Ai ebag ma it ap homi Israel on anyo en onggo uruk kwit de, “Nit de kembu ilah amu on fam obahet neg dulen ulug TUHAN mun embeselug lahuk fug!

¹⁷TUHAN Allah nit nenakni ai en neg nit nenambusi-nenombasi feselaroho fesesi ne nit nenonggwareg oho re o Mesir en feselaroho nenobahasi. Nit de TUHAN mun along ale duruk katsi on etma ninil mundoho hauhuk. O kwenang nenapeleg kwe etma waharukmu TUHAN en neg kwe fam nenalong baloho og neneplug waharuk katsi.

¹⁸Ne, nit o kwenang su fam kwik wamul ulug waharuk li em ohore TUHAN en ap homi Amori on o suma wereg on muko wilibi fesesi. TUHAN aire nit nenakni Allah neg deg ma re, nit de TUHAN fam neg obahet duruk kamuhuk!” ebag.

¹⁹Airoho ebag ma Yosua en uruk kwit de, “Famen de TUHAN aire mun fano eneg horeg on deg lit At Ebe We Misig on deg ma re, hiren At obahet neg duruk ale dehep ha fug alereg. At de amu on nim eke ilit duk on eke wereg fug. Ne, hiren lahe At henombol yig-utlug kembu ilah amu on fam obahet duruk kamuhup halug de, Aren hit henesiag elehapdoho henobahaku fug. Ite Aren hit il henebuhureg de hit unggum henobam fohu. Atam Aren hit fam fano ale henepuk katsi fam en de, Aren hit elehapdoho henobahaku,” ulug hweag-esebag.

²⁰

²¹Ai ebag ma it Israel enap anyo enele uruk kwit, “Eleg! nit de kembu ilah amu on fam obahet duruk kamuhuk fug. Nit de we TUHAN amu neg fam obahet duruk kamuhuk!” ulug ebag.

²²Airoho ebag ma Yosua en uruk kwit, “Hiren, nit TUHAN obahet neg duruk kamuhuk ulug katukdoho ehep ale aire, hit henonggwareg hinil wereg lit ehep ai,” ulug ebag. Ai ebag ma iren de, “Demdoho nit nenonggwareg ninil hanim ehe,” ebag.

²³Ai ebagdeg Yosua en de, “Aireg halug de, kembu ilah ap enunggul unuk amu on en on henobam wereg on etma oko amumu feiyek, folug de, we hiren TUHAN Allah ap homi Israel on enakni ai fam neg dipdoho duruk kamuhup ulug, sali iek,” ulug hweag-esebag.

²⁴Airoho ebagdeg ap homi anyo en Yosua fam uruk kwit de, “Nit de nenakni TUHAN Allah, ai fam neg obahet duruk kamuhuk. Niren de Aren awene melaleg anyo furoho neg duruk kamuhuk,” ulug ebag.

²⁵Ai ebag ma nukoho ai salim o Sikhem etma Yosua en ap homi Israel on nim wene sali watfag; etman de aren wene melaleg mel, wene diroho diyug airoho diyug ulug on mel og-esebag.

²⁶Wene melaleg mel wene diroho diyug airoho diyug ulug mel etma re Buku Allah Awene melaleg anyo fam baleg. Ai en de aren helep humon eke webagdeg de, obale TUHAN fahet balohoma etmano e humon indipmu unduhuk febag.

²⁷Airoho debebagdeg aren ap homi mundoho anyo fam hweag-esauk kwit, “Helep aire nit mundoho en duruk ale fahet il neseheik. Di wene su wene TUHAN en isi on etmano mundoho re helep su olohotman ehe. Anggere, helep sure hiren Allah ele sahaloho folug dehep ha ale fahet, hit henobahet il wereg laruhu,” ulug hweag-esebag.

²⁸Airoho ebagdeg fotogdoho re Yosua en ap homi etmano enobam lowag ulug hweag-esebag; ma re it anyo mundoho enanggwenang domog lebag.

²⁹Ai en de at Yosua hun Nun amloho TUHAN amingming angge anyo, ebe umur 110 tahun deg li waratfag.

³⁰ Waratfag ma re at ebe anggwenang onggwareg en on o Timnat-Serah ap Efraim en andom kwe en Dom Gaas en emberim utara fil etma salfag.

³¹At Yosua ebe oluk wereg li em de, it ap homi Israel on de TUHAN obahet neg duruk katfag. Ne, at ebe waratfag ma oho re it ap melal-enepuk on At TUHAN en ap homi Israel on enobahet duruk ale inil hebag on etmano enoluk wereg lire it anyo TUHAN obahet neg duruk katfag.

³² Hun Yusuf wareg ap homi Israel on en o Mesir en walug watfag on anyo oho re, kwenang at Yakub en onggo uang perak on 100 en fam ap Hemor omaliki, hun Sikhem akni en on fam onggo balfag ma etmano salfag. Kwenang aire at Yusuf en ondohoma on fam belap-esebag.

³³Ai en de hun Harun amloho Eleazar anyo oho waratfag ma re o Gibea o kota aire o ap Efraim on endandom fil etma wereg on fam salfag. Kota aire at Eleazar amloho Pinehas anyo fam mundoho og etfag.