Read Ninia Yali YOSUA 3 Bible Online

YOSUA 3 - Ninia Yali bible

YOSUA 3

¹Likia sekandoho re Yosua nim ap homi Israel on abirangge inim, hubet habet inatfagdeg, o Sitim it enobam sabo kemah saloho welatfag ma etmano embeselug Ik Yordan ikma lebag. Lebagdeg ik dahaloho nindig-amuhuk en ulug li nangno hauk kwit enobam sabo saloho welatfag.

²Eta nukoho henahan welatfagdeg, it ap Israel on enowesi melal-enepuk on etmano en ap homi Israel on enobam sabo kemah saleg kwe etmano mundoho maseroho lebagdeg,

³wene melaleg su hweag-isil lebag, “Hiren hauk men lahe it imam etmano Peti Sali Wareg Wene henakni TUHAN Allah en wat hesasi on yohwareg on anyo harulug laukmu esalug de, hiroho o sabo saloho welahepma oma embeselug lakiyug. Lauk kwit de Peti ai ombolim lahup,

⁴famen de Peti ai horogdoho la fug; walug laukmu ombolim lauk kwit il yatdoho satu kilometer en hagdoho lakiyug. Airoho duhup fam de, hit de o kwe etma waharuhup fug mu henapeleg deg ma anggere, kwe di laul ulug fureberuk kamuhup,” ulug hweag-isil lebag.

⁵Yosua en ap homi Israel on hweag-esauk kwit de, “O sono re TUHAN en mun along on duhu anggere hit henebe eneko horoho fahat dakiek,” ulug hweag-esebag.

⁶Ai hweag-esebagdeg Yosua en it ap imam omano fam de Peti Sali wareg wene anyo ap homi Israel on enalukwema it dam bearulug lowag ulug mingming-enepfag. Iren de Yosua en melal-enepfag ale anyo higitdoho debag.

⁷TUHAN en Yosua fam hweag-utuk kwit, “Yoho su en de hat ap humon apdoho hobaharuk kahi ai fam de ap homi Israel on mundoho en halong bolug leho hobaharuk kwit de An Musa ninim welatihik hag hat ninim oho hinim wereg anyo fureberuk kamuhup.

⁸Ketia re it imam Peti Sali wareg wene bearulug lauk on ai fam mingming enepuk kwit de, it enebe ikma aik lil lauk kwit de, it enebe ik ai ahummu kwik lalug ik elanma hopdoho unduhuk lamag ulug hweag-esakin,” ulug hweag-etfag.

⁹Hweag-etfag ma, Yosua en ap homi Israel on wol-enepfagdeg hweag-esauk kwit, “Henakni TUHAN Allah en hit hweag-hesauk ale su holik manik.

¹⁰Hit lauk li em de TUHAN en it henaselei on ap Kanaan on Feris on, Het on, Hewi on Girgasi on, Amori on, mel Yebus on mel muko wilibi feseruk karuhu. Ne, Peti At TUHAN o bohol kwenang wal-debag on anyo en Sali wareg anyo hit henalukwema Ik Yordan baloho lauk lire, Allah mun oluk wereg on anyo hit henesahalimu wereg ma hinil haluhup.

¹²Ketiare hiren ap nesanggo en hit henunggul unuk Israel on en enunggul unuk domog etmano en de ap misig heheg momal-enebiek.

¹³Fobik it imam Peti TUHAN ele Sali Wareg Wene harulug lauk on ai eneyog Ik Yordan ahummu sobit hauk li em etare, ik il omamneroho waharuk on aire bal-atmisi; ik ebe eleruk fil en wirig aik waharuk on aire obale misigmu eke yenggelmisi, eheik,” ulug hweag-esebag.

¹⁴Eta li em de li anggen yihig balduk li em, ne eitogdoho re Ik Yordan aire ik fu waharuk katfag. It ap homi Israel on anyo Ik Yordan baloho nindig-amul ulug enobam sabo wiroho welatfag ma etano embeselug lauk li re it imam de Peti Sali wareg anyo walug it dam lauk katfag. Ne, it imam omano eneyog Ik Yordan ahum fam bal hauk li re,

¹⁶etano li em neg Ik Yordan il omamne anyo bal-atfag. Ik eleruk fil yit-yatma etma re ik ebe o Adam kota eke o kota Sartan en foma fil wereg on ai fam etma yenggelfag. Ne, ik anyo ambut fil wirig atlug ik Laut Mati fam kwelabik lauk katfag on de mun baloho dereng ebag, ma re ap homi Israel on de o Yerikho amig higitdoho etma kwenang iringgig angge fene nindig-atfag. It imam Peti Sali Wareg Wene bearulug lauk katfag on anyo re Ik Yordan bulmu etano unduhuk men neg ap homi Israel on anyo abirangge Ik Yordan foma fil neg nindig-aik lebag.