Read Ninia Yali YOSUA 4 Bible Online

YOSUA 4 - Ninia Yali bible

YOSUA 4

¹Nindig-aik lebagdeg it ap homi anyo enebe mundoho ik foma fil wereg kweleg TUHAN en Yosua fam uruk kwit de,

²“It ap homi etmano enunggul unuk domog en de enebe misig heg neg ap nisanggo en en-enebin.

³It ai fam melal-enepuk kwit de helep Ik Yordan ahummu it ap imam on unduhukmu etan de helep nesanggo en wowag ulug hweag-esakiyug. Iren de helep etma harulug lalug de o hup atmisimu hit henobam sabo saloho noholuhupmu etma huli walug lakiyug, ulug hweag-esakiyug,” ulug hweag-etfag.

⁴Airoho ebag ma re at Yosua en ap momaleg on nesanggo en etano wol-enesebagdeg,

⁵it fam uruk kwit, “Hit de Ik Yordan bik-bulmu hit henakni TUHAN Allah en Peti Sali Wareg Wene anyo olohotma eta lakiek. Lalug de hit henebe domog en de etan helep misig heg walug de ebe seberoho re nesanggo en hit henunggul unuk Israel on fam henunggul seberoho deg lahep etano hagdoho wakiyug.

⁶TUHAN en disi ale omano fahet ap homi enunggul unuk au en de helep eta fam en enenda ebet hauk kamuhup. Fobik en lahe hit henomaliki en hein og-hesauk kwit, helep etma re hit fam indip keroho fahet deg ulug hein og-hesauk mu re,

⁷TUHAN en Peti Sali Wareg Wene anyo walug Ik Yordan baloho nindig-atuk li em de ik anyo bal-atsi ulug hweag-esauk kamuhup. Helep eta fam de o dian atsi ale ai fahet ap homi Israel on ebet-enesauk karuhu,” ulug hweag-esebag.

⁸Airoho hweag-esebag ma re it ap nesanggo en etano en de Yosua en melal-enepfag ale anyo debag. TUHAN en diroho duhun ulug melaloho Yosua og-etfag ale higitdoho re, iren helep nesanggo en Ik Yordan bik-bulmu en webag, ne webag alere seberoho re it Israel on enunggul unuk seberoho deg ale etanoroho webagdeg de it enobam sabo salegma walug lebag.

⁹Ik Yordan bik-bulmu etano en oho re it imam Peti Sali haroho unduhuk latfag ma etano fik-furoho helep nesanggo en witfag. (Helep etare ketia huli en eta wereg.)

¹⁰It ap imam omano re Ik Yordan bulmu eta unduhuk weregman neg de ap homi anyo wene TUHAN melaloho Yosua fene og etfag on etmano debag. Airoho wene diroho diyug airoho diyug ulug Musa en Yosua hweag-etfag ale higitdoho debag. It ap homi Israel on anyo folo-foloroho neg Ik Yordan baloho nindig-atfag.

¹¹It anyo enebe abirangge foma fil neg nindig-atfag ma re it imam Peti Sali Wareg Wene bearulug lauk on anyo it enalukwema lauk katfag.

¹²At Musa en wene melaloho hweag-esebag ale higitdoho re, it enunggul unuk Ruben on mel Gad on mel Manasye on fomane mel en ap dog sehen anggen on de it dam Ik Yordan baloho nindig-atfag.

¹³It enebe abirangge re 40.000 en angge ap neg dog yabukoho enesehen sin-sen nindig-atfag. TUHAN olohotma neg de it anyo ik dahaloho re o Yerikho horogma donggo doaleg on fam nindig-atfag.

¹⁴Nukoho ai salim de ap homi Israel on Yosua ap lohon ap debelug alongdoho leho foukwag ulug debebag. At ebe oluk wereg latfag li mundoho etma fam de iren Musa along bolug leho foruk katfag hagdoho iren at Yosua oho along bolug leho foruk katfag.

¹⁵Ai en TUHAN en Yosua fam de,

¹⁶it imam Peti Sali haroho welatfag on etmano Ik Yordan ahummu nen wilibik wamagdoho hweag-esowag ulug hweag-etfag.

¹⁷Hweag-etfag ma re Yosua re TUHAN en ebag ale etano higitdoho debag.

¹⁸It ap imam anyo ik elanma aik laharuk li re ik anyo nikangge obale kwe wirig atuk katfag aleroho wirig atfagdeg fu lehebag.

¹⁹Ap homi Israel on de tanggal 10 bigalem keram on fam Ik Yordan foma fil aik lebagdeg ne it enebe re o Gilgal o Yerikho en de mo lahaik waharuk fil etma enobam sabo salfag.

²⁰Etan de helep Ik Yordan ahummu en webag angge omano Yosua en helep huhul owag witfag.

²¹Airoho wiri febagdeg Yosua en ap homi omano abirangge fam uruk kwit de, “Fobik en helep oma fahet henomaliki en nunggwe fahet deg ulug hein og-hesauk halug de,

²²it hweag-esauk kwit, ap homi Israel on de Ik Yordan kwenang iringgig angge fene nindig-aik waharuhuk ulug hweag-esauk nu.

²³It fam dindil esauk kwit de nit nenakni TUHAN Allah en de Ik Yordan anyo nit fahet dereng debesimu re nit abirangge ik foma fil aik waharuhuk, aire At TUHAN ik Laut Gelagah nit fahet dereng debebag hagdoho disi.

²⁴Ne, aire ap homi o kwenangma on mundoho en TUHAN de along humon wereg ulug enoluk atuk kamuhup. Ai fam de li mundoho-mundoho etma fam hiren henakni TUHAN Allah along bolug leho foruk kamuhup,” ulug hweag-esebag.