Read Ninia Yali YOSUA 5 Bible Online

YOSUA 5 - Ninia Yali bible

YOSUA 5

¹O Amori on raja abirangge Ik Yordan foma fil mo obuk uruk fil wereg latfag on omano mel, ne it raja o Kanaan fam ik Laut Tengah anyo elan-elan wereg latfag on abirangge nim en holduk men de ap homi Israel on nindig-aik waharuk li em de Ik Yordan anyo TUHAN en firog debesi. Ulug urukmu enesanggo holfagdeg iren de ap homi Israel on fahet enakol en enowag elek duruk katfag.

²Eta li em TUHAN en Yosua diroho hweag-etfag, “Helep bilibuk on fili maho folug ap Israel on enahap bal-enepuk kwit din,” ulug hweag-etfag.

³Hweag-etfag ma Yosua en de TUHAN en hweag-etfag ale higitdoho debelug ap Israel on duk unuk Bukit Penyunatan ai famen enahap bal-enepfag.

⁴ Ap Israel o Mesir en wilibik watfag on lei kwe lauk men de mundoho waratfag on ai enahap baleg on famen it leimu empat puluh tahun leil watuk kwit endag-atfag on omano enomalik ap misig oho eke enahap baleg latfag fug. Ne, tahun empat puluh on anyo ahaebog aik lauk li em, ap on neg o Mesir en wilibik waharuk li dog yabuk ale on deg latfag on etmano iren TUHAN ele fam holoho debag fug mu mundoho waratfag. Ai fam de At TUHAN en hombuk baloho ebag higitdoho re, it ai o kwenang hesiligmu di angge su angge mun wereg neg deg ma TUHAN en it enambu-enombasi fam abug og-esebag ma anyo inil howag ulug hweag-esebag fug.

⁷Ai fam it enomaliki abirangge enahap baleg eleg latfag. It enebe ket endag-atfag on ai at Yosua en enahap bal-enepfag.

⁸It anyo mundoho enahap bale fesebag ma yebil ahumbut atuk nangnoroho enobam saboma bok welatfag.

⁹TUHAN en Yosua fam diroho ebag, “Nukoho su salim de Mesir enemingming angge wereg ma, enelitno henepuk katswa on anyo yoho elehap deberuk kahi,” ulug hweag-etfag ma, o eta unuk de Gilgal[1] soalfag on ai ketia oho unuk ai uruk.

¹⁰ O Gilgal donggoma o Yerikho horogma etma o sabo saloho wereg lit bigalem ai tanggal empat belas salim hupmu kwe soni Paskah mot-duruk kwit esetfag.

¹¹Likia re kirim-keram o Kanaan fam en gandum anggen baloho nebag on aire roti fituk angge ragi eleg angge weraho on mel, gandum lelengag deg on mel nebag.

¹² Nebag ma nukoho ai salim neg bohol man manna boholman belabik waharuk ale bal aheg, ap homi Israel on manna nauk katfag ale anyo mun aheg, debag. Ne, ai huli en de it anyo o Kanaan fam en anggen yihig on anyo nauk katfag.

¹³Eke salim de Yosua o Yerikho horogma etma aik lebagdeg duruk men de fetagdoho etano at olohotma ap eke enggarog pedang on fangdoho unduhukmu hebag. At Yosua ebe ap anyo horogma aik lebagdeg hein og-hauk kwit de, “Hat aure niron a, ite selei ahun on a?”

¹⁴Ulug hein og-hebag ma, ap anyo en onggo uruk kwit de, “An de haron oho fug, ne haselei on oho fug, An de henowe Panglima Tentara TUHAN wahi,” ulug hweag-etfag. Airoho urukmu holfagdeg de folo-folo etano Yosua en alukwe belabeg sahaun ulug ap anyo apne webag. Yosua en uruk kwit de, “An sure nakni Hat hamingming angge deg lahimu re, An den Nakni Hat hobahet nanggig ale eke hapmin?” ulug ebag.

¹⁵Ai ulug hein og-hebag ma, ap Panglima Tentara TUHAN ai en onggo uruk kwit de, “Hasepatu nonggolin; kwenang hat unduhuk welahenma diare ousama welahen,” ulug hweag-etfag ma Yosua en higitdoho asepatu nonggolfag.