Read Ninia Yali YOSUA 6 Bible Online

YOSUA 6 - Ninia Yali bible

YOSUA 6

¹O kota Yerikho anyo fam ap homi Israel on kwik wam no ulug de sokole log on anyo sok hembisoho lare febagdeg sok fam de ap enebe ning-nangdoho kahaleg welatfag. Hweap misig oho eke wilip aheg, kwik laheg, duruk katfag fug.

²TUHAN en Yosua fam uruk kwit de, “Ketiare An den o Yerikho ai inim, ap raja o ai fam wereg on nim, ap sehen seneg on tentara ambolbolnaha deg on nim de hat og-hutuk kahi.

³Hat nim hat hautsi sehen seneg on tentara nim de henebe lohwalug de o kota aire nukoho folfalik en eta fam, nukoho misig fahet de henenggik misiham heg maseriyug.

⁴Ap imam sabiren on de enebe domog en bohweap trompet walug lauk kwit, ite Peti Sali anyo walug lauk kweleg alukwema lauk kamuhup. Ne, nukoho sabit on fam de it imam omano bohweap fururuk kweleg, hat nim it tentara inim de henenggik sabirenam maseruhup.

⁵Ai en it imam en bohweap trompet ele yatdoho fururuk kweleg, it tentara re enele amitmit hum-ham ale duhupmu re kota ai fak lehet lilibug duhu. Airoho dil lauk em de hit henebe abirangge re bekit o kota ai fam kwik lakiyug,” ulug hweag-etfag.

⁶Airoho hweag-etfag ma re at Yosua en it imam etmano wol-esebagdeg hweag-esauk kwit de, “Peti Sali anyo hamboheiyek; ne hit henenggelegman ap enebe sabiren de bohweap trompet walug it dam Peti ai alukwema lauk kamlusa,” ulug hweag-esebag.

⁷Hweag-esebagdeg Yosua en it autsi tentara omano o kota anyo maserukoho enebe lohwalukwag ulug hweag-esebag ma, it ap enalukwema enalong baloho lauk on erareg enap etmano Peti TUHAN Awene Sali wareg anyo alukwema it dam lauk katfag.

⁸At Yosua en melal-enepfag ale anyo higitdoho re, it enalong baloho kwe wauk kamag ulug fesebag on anyo dam, it imam bohweap fururuk on anyo enalukwema laukmu re, it enombolim de it imam Peti Sali bearulug lauk katfag on anyo lauk katfag, ai en ahaebogdoho re it enambol fil enalong baloho lauk kamag ulug fesebag on anyo lauk katfag. It airoho lauk kweleg de bohweap trompet ele re fu-ril neg lauk katfag.

¹⁰At Yosua en eneg ale duk eleg kweleg de it tentara omano en enele amit-mit deheg, enele dem misig ulug oho eke mareheg, duk fug ulug melale-fesebag.

¹¹Airoho neg at Yosua en autsi tentara omano Peti Sali ai walug o kota anyo enenggik misiham fam maserulug de sombandoho enobam sabo salegma etmano lalug etma nohoukwag ulug hweag-esebag.

¹²Likiare, hubet-habet Yosua inatfagdeg, enenggik bireneg angge on it imam nim tentara mel anyo lohwaloho kota anyo maseruruk kwit de, nukoho keram on fam enebe lohwaloho lauk kwit maserebag ale etanoroho maserebag: Atam dam de it enalukwema enalong baloho lauk on anyo lauk katfag, ai en de it imam enebe sabiren angge bohweap furil lauk on etano, it enombolim de imam Peti Sali bearulug lauk katfag on etmano lauk katfag, ai en ahaebog de it enambol fil enalong baloho lauk kamag ulug fesebag on etmano lauk katfag. It airoho lauk kweleg de bohweap trompet de ele fu-faril neg lauk katfag.

¹⁴Nukoho bireneg on ai fam de o kota ai enenggik misigam neg maserebagdeg de sombandoho enobam sabo salegma lebag. Airoho neg nukoho hundig-hundig etmano duruk men de nukoho folfalik en debag.

¹⁵Nukoho sabit on fam de it enebe hubetdoho mo owan lahabik waharuk kweleg inatfagdeg, enenggik sabirenam o kota anyo enebe lohwaleg deg ale etanoroho maserebag. We nukoho sabit angge ai fam neg de o kota enenggik sabirenam fam maserebag.

¹⁶Enenggik sabirangge fam it imam omano en trompet fu hil lauk em de, it ap esan lohwaleg anyo enamitmit dukwag ulug it ap homi abirangge anyo fam Yosua en ele eneg ale debag. Yosua en uruk kwit de, “O kota sure TUHAN en hit mundoho og-heseheik!

¹⁷O kota ebe abirangge inim, di angge su angge ilonggoma wereg angge nim de TUHAN obahet foruk on hagdoho foruk kwit abirangge luluhun diyug. We hwe Rahab, hambena duruk on ai nim ne at unggul unuk on mel at ahain elekwe on mel neg de, aren ap niron o inil hwalik waharuk li em let-enepsi ale anyo fahet enoluk welamag ulug embeseiyug.

¹⁸Hiren luluhun dukwag ulug deg on etman eke hwela fug. Ne, hiren hwelahup halug de Israel on henobam sabo salegma henebe alemat aheg, anggin-fanggin henobam aheg, duhu.

¹⁹No perak mel, emas mel, tembaga mel, bosie on en mel, TUHAN obahet eneko foruk on ulug abirangge etma mel, TUHAN angge on forukmu fohup on etma hwelahup fug,” ulug hweag-esebag.

²⁰ Airoho hweag-esebag ma re imam omano en trompet ele furebag. Airoho fururukmu it ap homi Israel on en enesanggo holfagdeg de, it enele amit-mit humon sup urukmu re, o kota elehet anyo lilibug-lalabag debag. It Israel on tentara etmano enebe abirangge lahabagdeg de, o kota anyo kwik lauk kwit kwenang anyo sebelik kwebag.

²¹O kota ai ilonggoma angge abirangge, sobal on, sauwe on, ap inim homi inim, karog fam binggi enowatfag. Iren endag-dauk katfag angge, sapi, domba, keledai mel oho abirangge watfag.

²²It ap biren inil hwalik lebag on etano fam Yosua en uruk kwit de, “Hwe hambena on anyo obam laluhupdeg de, hiren at obam sali wat-utuhup aleroho re at ebe nim, at ahain elekwe on nim og eneplug wilibik wamluhup,” ulug hweag-esebag.

²³Ai ebag ma re it ap inil hwal biren etano lebagdeg de, hwe Rahab ebe mel, akni isinga mel, ori-erekwi mel, at unggul unuk on en enahain elekwe amu on mel, walug wilibik watfag. Hwe Rahab ahain elekwe on ai enebe abirangge re og eneplug wilibik watfagdeg de obale balohoma it Israel on enobam sabo saleg horogma feseik watfag.

²⁴Airoho dulug de tentara Israel on en de o kota abirangge nim di on su on etma wereg angge nim han yalduk kwit de emas, perak, tembaga mel bosie mel neg de yalfag fug. No etare walug watfagdeg de di angge su angge TUHAN angge on kabogdoho forukmu etmano feik watfag.

²⁵ Famen de hwe hambena duruk katfag on Rahab anyo mel, ne ap homi at unggul unuk on en at ahain elekwe on mel neg de, at Yosua en enoluk fesebag, aire ap biren angge at Yosua en o Yerikho inil hwalik lowag ulug mon-enepfag ma aren it let-enepfag on ai fahet debag. (At hwe Rahab ai ambiangma on de ketia huli en nim it Israel on enesahalimu wereg.)

²⁶ Eta li em de Yosua en ele huli baloho wilibi foruk kwit de, “Ap sa en o kota Yerikho su nikangge wiruhu halug de ap ai TUHAN ahururung obam aruhu. Ap sa en o oboule fohu on aire omalik wandeba on nale fohu; ne ap sa en o sokole humon kwik waharukmu ai wiruhu on de omalik elabo on nale fohu,” ulug ebag.

²⁷TUHAN ebe Yosua inim wereg ma, o kwenang etma fam Yosua unuk bogdeg latfag.