Read Ninia Yali YOSUA 7 Bible Online

YOSUA 7 - Ninia Yali bible

YOSUA 7

¹TUHAN en ap homi Israel on fam melale feseruk kwit de, di angge su angge o Yerikho fam en mundoho luluhun esauk kwit etma re, dem misig ulug oho eke wahup hayog ulug hweag-esebag. Famen de wene melaleg ai dipdoho debag fug. Ap misig eke unuk de Akhan ai en wene melaleg ai sahaloho debag fam TUHAN olok ap homi Israel on fam febag. (Hun Akhan ai akni re hun Karmi ne omba re hun Zabdi enunggul unuk Yehuda on fam en de unggul unuk agdohore Zerah on.)

²Eta li em de Yosua en ap fomane o kota misig eke o Betel en mo lahaik waharuk fil o Bet-Awen horogdoho, o Ai etma mon-enepfag. Ap etma re o etma inil hwalik lowag ulug mon-enepfag. It dukwag ulug mon-enepfag ale anyo mundoho debelug de,

³sombandoho watfagdeg Yosua hweag-irik watfag. Iren uruk kwit de, “O Ai aire nit nenebe abirangge en bin kwehe ha fug alereg, we ap enebe dua, tiga ribu en hagdoho neg monde fesehun. O kota aire mun dotdeg anggere ap tentara abirangge mon-enebuk fug,” ulug hweag-etfag.

⁴Ai ebag ma re o etma bin enowatul ulug lebag on de ap enebe tiga ribu en lebag, famen de it anyo yeik enowaroho somban esebag.

⁵Ap Ai enap en de it Israel on lebag on anyo o kota Ai kwik laukmu sokole fam etman mug-eneplug de bosie on kwenangman habulug waukmu etma huli feseik lebagdeg de, it etmano enesahalimu en de ap enebe tiga puluh enam en angge duk hebema etman binggi enowatfag. Ai fam de ap homi Israel on enenda si ebagdeg enakol neg atfag.

⁶Yosua nim it ap homi anyo melal-enepuk on enowesi omano nim enahummu mun siag en de, enesum mun miyog-mayog esebagdeg de, fong waroho belahwi lahaboho ulug deg ul enunggulmu febagdeg, nukoho hundig hup hundig de TUHAN en Peti Sali Wene wareg anyo alukwema enerohole belabeg sahaun uruk kwit enenda wat-dauk katfag.

⁷Yosua en TUHAN fam uruk kwit de, “TUHAN Allah nakni! Nunggwelug nit Haren og-neneplug Ik Yordan foma fil suma waharihin? Ap homi Amori on fam og-esamin ulug og-neneplug waharihin a? Nit waramag ulug dirihin a, nit de Ik Yordan foma fil etlema welalaman de fano!

⁸TUHAN nakni! Ap neneselei on en de Israel on yeik enowaroho mon-enebik wahesa. Ketiare an den keroho imin?

⁹Ap homi Kanaan on mel, ap homi amu on o kwe suma wereg on mel en de wene atsi ale ai fahet enesanggo holukohoreg. Ne, iren de nit hukdoho kwelabe nenobahalug nit abirangge nenowaruhup lit deg! Airoho dil lauk em Hat Halong welahen ale anyo il bale fahat-daroho re nangginehen ha alereg?” ulug hweag-etfag.

¹⁰Airoho ebag ma TUHAN onggo Yosua fam uruk kwit, “Inamin! Haren airoho kwenangma halukwe belabeg sahaun-duruk kwit duruk kahen ale aire we alemaroho hag!

¹¹Ap homi Israel on siag dehesa. An den wene melale feseruk kwit, wene sali An nim it nim wat-wat atuhuk on ai dipdoho duruk kamag ulug hweag-esauihik, famen de iren dahandoho duswa! Di angge su angge luluhundoho elehap duruk on ulug omano it hwelausa. Iren wausareg de enam am no ulug de it enengge on sahalimu etma heraho fousa.

¹²Ai fam de iren eneselei on weim yapuk alere hambuk hausa fug ai. It ai ap eneselei on en enowaroho monde feseik wahausa aire it enebe oho re mun elehap enebukwag ulug unggum enobam atsi mu re, Di angge su angge wa fug, ulug irihik on etma owan elehapdoho fouk eleg kweleg de An hit hinim lauk karuhuk fug.

¹³Yosua, ketiare inamin! Inatlug de ap homi Israel on ai enebe eneko horoho fahat dalug An wereg ma aik wamulsa en fik-fouk dukwag ulug hweag-esakin. An nebe Ap homi Israel on enakni TUHAN Allah anyo wene su on it hweag-esahuk: Yaho hit ap homi Israel on! Di angge su angge hiren lilibugdoho elehap dukwag ulug An den melal-henepihik on etmano hit foroho welahep. Hiren di angge su angge etma hwik-esauk kweleg de it heneselei on onolohotma henebe hambukdoho kahaluk fug alereg lamuhup, ulug hweag-esahuk anggere, sono iren fik-fouk dukwag ulug melale feseiyug.

¹⁴Ai fahet de, Yosua ao, o sono hubet de it enebe enunggul unuk domog kumu enesahuk. Ne, An den lahe it ununggul unuk misig on eke waharukmu enobam eneg atuk halug de, it enunggul unuk ai on de enunggul unuk aegdoho deg ale etanoroho waharuk kamahup. Ne, An den lahe it enunggul unuk aegdoho deg on misig eke fam eneg atuk halug de it enunggul unuk aegdoho deg on ai fam en enahain elekwe deg ale etanoroho waharuk kamuhup. Ai en An den it misig on enahain elekwe waharukmu enobam eneg atuk halug de it enahain elekwe misig on ai fam enebe wereg ale etano ap misig-misig waharuk kamuhup.

¹⁵Airoho duruk men ap enobam eneg atuk on anyo en lahe di angge su angge wa fug ulug deg on etmano foroho halug de ebe abirangge nim, at ahain elekwe on abirangge nim, angge di angge su angge mundoho nim felelengdoho indok yal-enebuhup; aire aren wene sali wereg on anyo dahandoho deheg, ne it ap homi Israel on enesahalimu en kwasik humon disi ai fam duhup,” ulug hweag-etfag.

¹⁶Airoho hweag-etfag ma, likiakwe hubet-habet de, Yosua en ap homi Israel on anyo enunggul unuk domog heg enalukwema aik wamag ulug hweag-esebag ma re it enunggul unuk Yehuda on fam aik watfag.

¹⁷Airoho atfag ma re Yosua en it enunggul unuk Yehuda on anyo enunggul unuk aegdoho deg ale etano domog inaik wamag ulug hweag-esebag ma re, it enunggul unuk aegdoho deg on Zerah anyo fam aik watfag. Ai en it enunggul unuk aegdoho Zerah fam deg on anyo enahain elekwe domog inaik wamag ulug hweag-esebag ma waharuk men de hun Zabdi ahain elekwe on fam aik watfag.

¹⁸Airoho dulug de Yosua en de it Zabdi ahain elekwe on anyo ap enebe domog enalukwema inaik wamag ulug hweag-esebag ma inaik waharuk men de; Akhan hun Karmi amloho hun Zabdi omba anyo fam atfag.

¹⁹Airoho atfag ma Yosua en hun Akhan fam uruk kwit de, “Namloho, haren dirihin ale etma ap homi Israel on enakni TUHAN, Allah il hanim fag-dulug ebenamegdoho neg dian in. Eke herahauk fug, an hweag-nimin,” ulug hweag-etfag.

²⁰Ai ebag ma, Akhan en de, “Demdoho,” ebagdeg aren uruk kwit, “An den it ap homi Israel on enakni TUHAN, Allah anyo fam siag dirihik. An den dirihik alere ebe diroho su:

²¹Di angge su angge niren delik kuruhuk on etmano sahalimu en de, sum jubah misig mun ebe on o Babilonia en yihig angge eke nil hauihik, ai en perak de dua kilogram en hagdoho nim, ne emas kong misig setengah kilogram en alongdoho hagdoho nim hauihik. No etare an mundoho nenda nasimu re, an den wauihikdeg de, an nobam saboman kwenang apma etma heraho ferihik; no perak de mun apma hagdoho wereg,” ulug ebag.

²²Ai ebag ma re Yosua en folo-folo ap o hun Akhan obam saboma mon-enepfag ma lebagdeg duruk men de di angge su angge wa fug ulug ebag on etmano re abirangge etmano welatfag, ebe kwenangma herahoma re perak neg de mun apma sebeloho welatfag.

²³Wereg ma re iren munangge manangge omano walug de Yosua nim ap homi Israel on mundoho nim enekit walug watfag. Walug watfag ma re munangge manangge omano TUHAN olohotma febag.

²⁴Ai en Yosua nim ap homi Israel on abirangge nim en de hun Akhan anyo nim omaliki abirangge nim, owam sapi, keledai, domba mel, obam sabo mel, di angge su angge aren fahat dalug angge mel, perak nim sum jubah nim, emas herahabag angge etano mel abirangge seberoho og eneplug de o anggin-fanggin donggoma etma feseik lebag.

²⁵Feseik lebagdeg de Yosua en hun Akhan fam uruk kwit de, “Nunggwelug haren nit abirangge nenobam anggolo hweraniroho ai nenobaharihin? Ketiare TUHAN en hat hobam anggin-fanggin hobahaikohoreg!” ulug hweag-etfag. Ma re ap homi Israel on abirangge en de hun Akhan ebe nim at ahain elekwe on nim anyo helep hwik binggi enowatfag. Ne, angge di angge su angge mundoho mel, ne di on su on herahabag on omano mel, indokma mundoho yalfag.

²⁶Airoho debebagdeg de obalma etano iren helep hum-hamdoho balu lahapfag on ketia hulien nim etma wereg. Ai fam de obale eta fahet unuk de, Lembah Kesusahan ulug soalfag. Airoho debag ma re TUHAN olok anyo sayongno ebag.