Read Ninia Yali YOSUA 8 Bible Online

YOSUA 8 - Ninia Yali bible

YOSUA 8

¹TUHAN en Yosua fam uruk kwit de, “Hautsi tentara abirangge kabog-debeselug de, it inim seberoho o Ai etma lakiek. Henda sebe ulug hakol duk fug! An den de hun raja Ai ahun ai enggikmen halongap hobahaikohon lahi. Omaliki melal-enepuk on mel, obam kota etma mel, at anggwenang mel de haren deloho sebelmihin.

²Raja Ai on ai mel o Ai ebe mel de haren atam o Yerikho mel enowe raja mel fam debeserihin etano hagdoho debeseiyug. Famen de ketia au on fam neg de di angge su angge mel enowam mel de hit henangge on amag ulug hwelakiyug. O kota aire ambol fil en fetagdoho enowarik kuluhup anggere fik-fouk diek,” ulug hweag-etfag.

³Hweag-etfag ma re Yosua anyo autsi tentara enebe abirangge nim seberoho o Ai laul ulug fik-fouk debag. Aren de enemurururoho weim yapuk on mun ebe on neg enebe 30.000 en eneko re o hup anggo mon-enepfag,

⁴monde feseruk kwit de it fam wene diroho melale fesebag, “O kota ai ebe atlumu fil salik laluhup, famen de yatdoho la fug; airoho dulug de bin kul ulug fik-fouk deg nu.

⁵An nim it an nautsi nim de o kota ai fam horogdoho etma aik laul. Ne, it ap o Ai on nit nim weim yapul ulug wilibik waharuk halug de, nit nenebe atam duruhuk hagdoho sombandoho lit-esa wamul.

⁶Iren de nit mug-neneplug waharuk men neg de o kota embeselug yatdoho hag aik wamlusa, ne iren boruk kwit de atam duswa hagdoho enakol en heiye lauk bolusa.

⁷Airoho duruk li em eta hit henebe saleg welamuhup angge anyo wilibik waharuk kwit de o kota ai sebelik kwiyug. Hit henakni TUHAN Allah en hit henobam og-hesahu lit deg.

⁸Airoho sebelik kwik watlug de, o kota ebe TUHAN en melale nenobahasi hagdoho harep fisariyug. Hiren duhup alere airoho duhup,” ulug melale fesebag.

⁹Airoho ulug de Yosua en it etano monde fesebag ma re it anyo o Ai en mo obuk uruk fil, o Ai dulug Betel dulug etma salik lebagdeg etma nangno hauk kwit welatfag. Famen de Yosua re it ap homi Israel on en enobam sabo salegma etmano nohobag.

¹⁰Hubet-habet de Yosua inatfagdeg ap esan lohwaleg on anyo kabog-dik wamag ulug melal-enepfag. Ai en de at Yosua nim it ap homi melal-enepuk etmano nim en de ap esan lohwaleg anyo og eneplug de o Ai lebag.

¹¹Ap esan anyo re Yosua inim seberoho re o kota Ai sokole lohon kwik lauk on anyo wereg fil lebagdeg de, it enebe o il emberim utara fil etma it Israel on dulug o kota ai dulug de donggo eke wereg ma etma o sabo saloho nohobag.

¹²At Yosua en de ap enebe esan humon 5.000 en de o kota Ai en mo obuk uruk fil, o Ai dulug Betel dulug bul etma salik lowag ulug mingming enepfag.

¹³Ai fam de it ap weim yabik lebag on aire enebe diroho eratfag: It enebe inindip kabog-durukmu hagdoho anyo re o kota ai en utara fil etma febag, ne ap esan foma fil de mo obuk uruk fil etma fesebag, ne at Yosua neg de hup anyo fam o donggoma etma lebag.

¹⁴Airoho lebag ma at raja en Yosua autsi omano esebagdeg de aren folo-folo aleroho fik-fouk debag. At ebe nim at omaliki inim de o Ik Yordan donggoma atam it ap Israel on enowarik watfag fil omano watfag. At de fobik it Israel on en ambol fil en nenowarik wamlusa anyo wongdoho debag.

¹⁵Yosua autsi mel en de enepenendoho re enambol sombandoho lebagdeg de it enebe heiye re o lei birim deg ma etlema lebag.

¹⁶O kota Ai fam ap on enebe abirangge re Yosua autsi mel mug-eneplug lowag ulug yonggo febag. Famen de it anyo en Yosua autsi mel mug-eneplug lauk men neg de o kota fam omano en yit-yatdoho lebag.

¹⁷Ap o Ai on enebe ap on neg de ap Israel on mug-eneplug lakoho enebe abirangge wilip atuk kwit de, o anyo kahaleg wereg on mel eleg angge husoho embeselug lebag.

¹⁸Ai en TUHAN en Yosua fam uruk kwit de, “O kota aire An den ketia hat fam og-hutuk kahi anggere, haren fit ai lekore o Ai fil etma bil hakin,” ulug hweag-etfag. Ma Yosua re TUHAN en melale febag ale etano higitdoho debag.

¹⁹At Yosua en airoho enggik bil hauk kweleg etano, ap esan herahoma hou saleg latfag angge anyo folo-folo wilipuk kwit de, o kota anyo bin kwik watfagdeg, iren sebelfag. Ai en iren bekit harep fisatfag.

²⁰It Ai enap anyo enembolhan inil fu ha lauk men de, hobu mondoko bohol fam lahabegma hebag. Yosua nim ap esan fomane nim omano en oho hobu anyo hebagdeg de ap esan foma etmano en o kota anyo bin kwehesa bebag. Ai fam de Yosua nim ap esan foma anyo nim enalukwe hebeloho lauk kwit de ap Ai on anyo enowarik lebag. Ne, ap Israel on o Ai fam etma kwebag on etmano oho waharuk kwit de enalukwe fil en enowatul ulug watfag ma re, it ap Ai enap omanore bul nobong-hobongma atfagdeg enebe heiye wilibuk fug ale atfag. Ap it on en de misig on oho eke koloroho wilip atfag fug, enebe abirangge re it Israel on en binggi enowatfag.

²³We raja Ai on ai neg de watfag fug, ebe oluk senetfagdeg de Yosua wereg ma walug lebag.

²⁴Airoho it Israel enap esan anyo en ap eneselei on it mug-eneplug o lei birim-birim angge durukmu watfag on etmano abirangge enowatfagdeg de, it anyo sombandoho re o Ai lebagdeg ap homi o etma wereg on etmano abirangge binggi enowarik lebag.

²⁵At Yosua en de fit anyo belabe fouk eleg angge Ai fil bilig lit neg weregman de ap homi Ai on etmano abirangge enowatfag. Nukoho ai salim neg de ap homi o Ai on de enebe ap et homi et seberoho re 12.000 en enowatfag.

²⁷Enowam mel enangge di angge su angge o etman hwelebag on mel de, TUHAN en Yosua fam hweag-etfag ale higitdoho re ap homi Israel on en it enangge on amag ulug hwelebag.

²⁸Yosua en de o Ai anyo harep fisatfagdeg airoho luluhundoho olun embesebag ma ketia huli nim wereg.

²⁹Raja kota ai welatfag ahun anyo re e unduhuk on fam borebebagdeg embesebag ma o hupmu huli welatfag. Mo obuk uruk li etano re Yosua en ap wareg anyo wag lalug de o kota sokole kwik lauk on olohotma etma hwik-esa lakiek ulug mingming enepfag. Airoho debag ma re obale etano fam de helep hum-hamdoho balu lahapfag. Helep etma re ketia huli en eta wereg.

³⁰ Ai en Yosua en de it ap homi Israel enakni TUHAN, Allah obahet mezbah misig eke Dom Ebal fam witfag.

³¹ Mezbah aire wene diroho diyug airoho diyug ulug ap homi Israel on enobahet ebag ale Buku Musa TUHAN amingming angge en anyo fam baleg ale anyo higitdoho witfag. Buku ai fam baleg lit de: “Mezbah misig eke helep on no bosie on fam en laleg eleg angge fam,” ulug baleg latfag. Mezbah ai emberimmu re ap homi Israel on en de TUHAN endama ahayegdoho ulug waroho yal-utuk on mel, TUHAN en fanoap nenobahaukwag ulug waroho og-utuk on mel, yalfag.

³²Etan de, it ap homi Israel on anyo inil kumureg kweleg de Yosua en helep omano fam TUHAN Awene melaleg Buku Musa en anyo baleg on etmano lisu bale febag.

³³ Ap homi Israel on mel, it enowesi melal-enepuk on mel, sehen seneg on enowesi perwira mel, wene katukdoho balduk on hakim mel, ne ap bohon it enesahalimu wereg on mel, de Peti TUHAN Wene Sali wareg anyo foma-foma unduhuk lit de enelukwe re it ap Imam Lewi enap Peti Sali anyo hareg wereg on fil deg lit unduhuk latfag. Ap homi etmano en fomane re Dom Gerizim fil enalukwereg lit unduhuk latfag, ne fomanere enambol Dom Ebal fil deg latfag. At Musa TUHAN amingming angge anyo en ap homi Israel on hweag-esauk kwit de, “Hiren lahe TUHAN en fanoap henobaharuk karuhuk ulug abug hweag-hesasi on anyo fahet fanoap nenobahaukwag ulug duruk ale li aik waharuk em halug de airoho duhup,” ulug hweag-esebag.

³⁴Ai en de at Yosua en ele hum fam Wene melaleg Buku wene melaleg ai fam baleg on abirangge omano bilinggebag, etma re fanoap enepuk ale fahet nim enobam hururung debeseruk ale fahet on nim et bilinggebag.

³⁵Musa en wene melaloho hweag-esebag on etmano re Yosua en abirangge ap homi Israel on, ap inim, homi nim, enomalik doron nim, ne ap homi bog on it enesahali kwe wereg on nim, etma kabog-debag on etmano fam biling-esebag.