Read Ninia Yali YOSUA 9 Bible Online

YOSUA 9 - Ninia Yali bible

YOSUA 9

¹Wene Yosua nim ap homi Israel on inim enalong atuk kwit it raja sebele feseruk ale anyo o abirangge sahail lauk kwit, raja Ik Yordan foma fil mo obuk uruk fil wereg on mel dom kwe en dom indip kwe etma wereg on mel donggo kwe ilihig-wirihig etman ik Laut Tengah huli etman de Dom Libanon huli en il emberim fil etma huli; o etma re it raja Het on, Amori on, Kanaan on, Feris on, Hewi on, Yebus on etman holfag.

²Raja eta enele misig seberoho maho febagdeg de inim seberoho Yosua mel, ap homi Israel on mel, dog yabuhuk ulug ebag.

³Famen de ap homi it ununggul unuk Hewi on o Gibeon wereg on en de Yosua en o Yerikho fam inim o Ai fam inim debesebag ale fahet enesanggo holfag.

⁴Airoho holfagdeg de iren de Yosua il oman dulug laluhuk ulug de enangge keledai fam de karung bulal on mel, ikwag ahap on fam wirig on anggur ahaik hwenangguruk on ulug de mun siag on mel, webag. Ne, enebe nauk on ulug kwemangge re, iren roti keng deg on mun huplu doung deg angge fouk debag.

⁵Iren de enesum de mun denel heg lauk angge wan-debag, ne enesepatu re mun endam on seleben debag angge wan-debag.

⁶Airoho debelug lebagdeg de Yosua akit o Gilgal obam saboma lebagdeg iren at nim ap homi Israel on fam nim uruk kwit, “Nit de nenobam indip yit-yatman de nenaknisi hit ninim nenele sali watul ulug wahe,” ebag.

⁷ Airoho ebagman de it ap Israel on en uruk kwit de, “Nunggwelug niren hit nininim nenele sali watul? Ebe hit henobam welahepma re horogdoho suma wereg lahep on lit deg!” ulug ebag.

⁸Ai ebag ma iren uruk kwit de, “Nit de nenakni haren di ale diek ulug hweag-nesamihin on etma re nenenda fano en dul neg,” ulug ebag ma, Yosua en hein og-esauk kwit de, “Hit de sa mel? Ne, henobam indip de keman?” ulug hein og-esebag.

⁹Ebag ma iren onggo su hweag-etfag, “Nenakni nit wahe alere o mun yit-yatma en wahe. Aire nit holduk men de TUHAN Allah nenaknisi hiren apne wauk kahep on ai en o Mesir fam abirale debag ale etma nim,

¹⁰ ne, eke TUHAN en raja Amori on biren o Ik Yordan ikma en mo indip fil etma wereg on, hun Sihon raja Hesybon ahun ai nim, hun Og raja Basan on o Asytarot wereg on nim fam debesesi ale etma holduhukdeg wahe.

¹¹Nit nenowesi melal-nenepuk on mel, ne ap homi nit nenobam etma wereg on mel en de nit de nenaknisi hit henapma sebeik wahe ulug enelugap debeik laluhup en de siburu kwemangge dug nesausareg suma lakiek ulug mingming nenepswa ma wahe. Aireg ma re nenaknisi henenda mun fano fam nit ninim hit nim nenele sali watul.

¹²Nenaknisi hiren oho nenasiburu roti kwemangge dia hakiek. Nit nenobam en wiliplug waharuk li em de roti oma re ahanhan deg latsi. Famen de ketia hakiek! Mundoho kelog disireg huplu doung disi angge.

¹³Ne, ikwag ahap on fam wirig angge anggur ahaik hwenangguruk on oma re niren hwenanggoho yohwatuk li em de ket deg latsi, famen ketiare furiek! Mundoho forisi angge. Nit nenesum wandeg lahe on mel nenasepatu mel de kwe yaron waharuk men mundoho denel heg lasi suma,” ulug hweag-esebag.

¹⁴Ai ebag ma re ap homi Israel on en de wene anyo fahet TUHAN hein og-ha fug angge re ininim seberuruk kwit ulug de it ap Gibeon enap enasiburu dorangge nebag.

¹⁵At Yosua en de ap Gibeon enap ai mel ninim seberuruk kahe ulug ele sali watfagdeg de it enebe enowatfag fug. Ne, it ap homi Israel on melal-enepuk on etmano en ohore sali watfag on ai dipdoho uhuk ulug de enele hombuk balfag.

¹⁶Famen de mundoho sali ap Israel on mel, Gibeon on mel, ware folug etano nukoho henahanam welatlug de ap homi Israel anyo en o kota Gibeon mel, Kefira mel, Beerot mel, Kiryat-Yearim mel etma re it ap homi ai on enobam wereg ma aik lebag. Ai fam de ap homi aire enobam wereg ma re o Gilgal en de yatdoho wereg fug liren ulug enoluk atfag.

¹⁸Famen de ap homi Israel on enowesi melal-enepuk on etmano en it Israel on enakni TUHAN, Allah unuk fam hombuk balfag ma re iren ap omano enowaruk fug ale atfag. Ap homi Israel on abirangge en de wene anyo fahet de it enowesi melal-enepuk on etma no fam enele mul-mul ebag.

¹⁹Famen de it enowesi melal-enepuk on ai en onggo uruk kwit de, “Niren TUHAN, Allah ap homi Israel on henakni unuk hombuk baloho sali watuhukmu nangginoho duk alereg? Ketiare niren it fam eke siag alere debesoul fug.

²⁰Niren nenele sali waroho uruhukmu re niren binggi enowatul fug; ne niren nenele sali uruhuk on dahan debelug dulmen de Allah en nit unggum og nesahu.

²¹Aireg ma anggere niren it enebe enoluk fesoul, famen de it enebe neg de nit nenebe abirangge nenobahet e muhug feheg kahaleheg, ik hwenanggeheg, duruk kamag ulug fesoul,” ulug ebag. Wene dul ale ulug it enowesi melal-enepuk on etmano en ebag.

²²Ai ebagdeg ap Gibeon on ai Yosua akit wamag ulug wol-enepfagdeg, Yosua en uruk kwit, “Hit henobam de horog suma deg kweleg, nit nenobam yit-yatma ulug, hiren nit nunggwelug lal-nenepuhup?

²³Hiren airoho duruhup ai fam de Allah en hit unggum og-hesahu. Hit henunggul unuk on etma re nenamingming angge on neg atlug, o an nakni Allah obam fahet e wireheg, ik hwenanggeheg, duruk kamuhup,” ulug hweag-esebag.

²⁴Ai ebag ma iren onggo uruk kwit de, “Nakni airoho duruhuk ale aire, niren holduk men de At TUHAN Allah hat nenakni en apne wauk kahen on ai en Musa At amingming angge ai mundoho mingming duruk kwit de, nenakni hat hebe o kwenang su sebelik kwik waharuk kwit ap homi suma wereg on mundoho enowareheg, ne kwenang su abirangge nenakni hat og-hereheg, dukwag ulug mingming disi ale ai fahet nenesanggo holduhukdeg de, niroho nenowaruk ulug nenakol en de airoho duruhuk ai.

²⁵Ne, ketiare nit de nenakni hat halong on apma welahe, anggere haren diroho debesemin ulug fanoreg ma hamihin ale aire nenobahamihin neg,” ulug hweag-etfag.

²⁶Ai ebag ma re Yosua en debesebag on de su: Aren de ap homi omano alele oko fesebagdeg de it Israel on en enowatluhup fug ulug ebag.

²⁷Famen de it enebere enamingming anggeap debesebag alere ap homi Israel on enobahet inim ne waroho yaldukmu mezbah fahet inim e wireheg, ik hwenanggeheg, duruk kamag ulug debesebag. Airoho debesebag ma re ketia huli en de iren yabuk ai on neg At TUHAN obahet duruk kamag ulug eneko febag ma etma duruk kwit neg wereg.