Read Ninia Yali 2 TESALONIKA 1 Bible Online

2 TESALONIKA 1 - Ninia Yali bible

2 TESALONIKA 1

¹ Nori, nerekwi. Hit Yesus omaliki o Tesalonika kabog-duruk kahep on anyo an Paulus inim, Silas inim, Timotius inim en wene eke hweag-hesak. Nenakni Allah, Tuhan Yesus Kristus hinim hundig mu, dang-henebehe.

²Nenakni Allah, Tuhan Yesus Kristus inim enenda hundig en og-heseheg, hit henenda seroho welamuhup ulug henebeheg, henepuk kamag.

³Nori, nerekwi. Hit henenda Kristus fam dip-deberuk kahep on anyo en henenda wirik ail laheg, ne, ketia nenenda henenda hundig enepuk kahep ai, hum ail laheg, duruk mu, Allah dang-duruk kahe ai, embesouk fug aleroho nenepuk mu, di salim su salim henobahet Allah dang-duruk kahe.

⁴Hit airoho duruk kahep ma, siahap henebeheg, anggin on henobam foruk kweleg, henemurururoho weheg, duruk kweleg, henenda mun hambukdoho wereg lit, henenda Kristus fam dip-deberuk kahep fam, nit Yesus omaliki di o su o kabog-duruk on kumu isil noruk kwit, henebug hweag-esauk kwit, nenawinog atuk kahe.

⁵Allah en ap homi ayo wiroho en-nenepuk kwit, siag eleg, fano neg ayo wiroho en-nenepuk enegdeg ma howag ulug, hit Allah apma welamuhuk ulug ak-dauhup fam siahap henepuk kweleg, wauk kahep ma, Allah en, “Hit fanoreg ma, napma welamuhup fano,” hweag-hesahu.

⁶At Allah enda wenggeleg dipdoho duruk on deg ma, it anggin on hit henobam henobaharuk anyo, onggo aren it anggin on enobam fesehu.

⁷At Tuhan Yesus boholman enam aik waharuk kwit, it boholma yonggo noruk on malaikat along on inim, indok ambulbul inim walug wambik waruhureg, it ap homi, “Allah nenerim,” beheg, Tuhan Yesus duruk katsi wene Fano Wene wa fug angge welaheg, duruk on siag onggo enobam feseik waruhu. Feseik waharuk kwit, ketia anggin on henobam wereg anyo, fobik nit ninim nenenda seroho nenobahaku.

⁹ Ai salim nit at omaliki obahet eneg on anyo en at ebe leho feheg, ne, nit hweag-hesauhuk fam demdoho boruhup on it demdoho boruk on mundoho hinim en, “Yehei!” ulug, yanderurukmu, dukwag ulug, waruhu. Waharuk halug, it, “Allah nenerim,” boruk on inim, Fano Wene wauk eleg on inim, Allah along humdeg ma, ap homi yanderebag etmano en at Allah en, it minggiroho feseruk kwit, “An nil hanim dia welamuhup fug,” ulug, muko wilibi feseheg, siag onggo mundoho mundoho enobam welamag ulug, feseheg, duhu.

¹¹At Allah en, hit fano dil noruk kamuhup ulug, heneyonggo fesi mu, at besi ale higitdoho dukwag ulug, henebeheg, hit fano on neg dul boruk kahep on anyo duk ale henebeheg, henenda Kristus fam dip-deberuk kahep ma, duhuk boruhup anyo higitdoho duhup en, omamneap henebeheg, duruk kamag ulug, henobahet somban neg uruk kahe.

¹²Airoho duruk kwit, nenakni Allah inim Tuhan[1] Yesus Kristus inim enenda hundig en henepuk mu, hiren Tuhan Yesus unuk leho feheg, ne, aren hit leho henobahakeg, duhup.