Read Ninia Yali 2 TESALONIKA 3 Bible Online

2 TESALONIKA 3 - Ninia Yali bible

2 TESALONIKA 3

¹Nori, nerekwi. Wene mundoho hweag-hesauhuk famen, ambiangma eke su hweag-hesak. Nit nenobahet somban uruk kamek. Somban uruk kwit, nit Tuhan awene hit weregma etma kwik lasi mu, fano wauhup hag, airoho folo-folo saha ail lauk mu, it eke en fano wowag ulug, somban uruk kamek.

²Ne, it ap homi mundoho Kristus wene demdoho boruk eleg ma, it ap enolok on, mun siagdoho dil noruk on anyo en nit siahapdoho nenobahauk no, nenakni Allah en nenahap wendarukwag ulug, nenobahet somban uruk kamek.

³Ai famen, at Tuhan en dipdoho neg duruk. Aren omamneap henobahakeg, at mun siag on en siahap henebuk no ulug, fahat-henesug welaheg, duhu.

⁴Hit duruk kamuhup wene melaloho hweag-hesauk kahe anyo, mundoho duruk kahep nenolukdeg famen, ekenim duruk kamuhup en Tuhan en henepuk karuhu, ulug, demdoho boruk kahe.

⁵At Allah en hit mundoho enda hundig henepuk anyo inim, siag henobam henepuk kweleg, henenda elek duk fug angge wauk kamag ulug, Kristus en henenda hambuge henobaharuk anyo inim, hit ekenim furebehup en Tuhan en henepuk kamag.

⁶Ne, it henori henerekwi Yesus omaliki eke en enenggik koroho hesangge noruk kwit, wene “Diroho duruk kamek,” ulug, komo-henepuk katuhuk anyo duruk eleg esalug, hinim noruk kam fug.

⁷Ninim wereg lit, nit nenenggik koroho hesangge dil noruk katuhuk eleg, henolukdeg ma, dil lauhuk anyo hit higitdoho dil noruk kamek.

⁸Ninim wereg lit, henesiburu onggo eleg, we nauk katuhuk fug. Nit waharuhukdeg, hit anggin on ekenim henobam henobahake ha no ulug likia hupmu dil neg lauk kwit, nenobalowag lahaik wambuk duruk kwit, onggo baloho neg nauk katuhuk anyo henoluk.

⁹Henengge heng-henebehe ha alereg famen, nit dil lauk fam nenehut wal-heheg, hit higitdoho duhup ulug, duruk katuhuk.

¹⁰Ninim wereg lit, “Ap eke yabuk wutuk ale erim halug, siburu og-om fug,” ulug, hweag-hesauk katuhuk anyo.

¹¹Wene airoho hweag-hesauhuk anyo famen, “Ap homi it on eke enonggwareg eneyabuk wit-da fug angge koroho wereg lit, ap amu on en ale fahet neg asingsing dil noruk,” ulug, hweag-nesausa ma, nenesanggo holduhukdeg, hweag-hesehe.

¹²It ap airoho duruk ai eneyabuk furoho wit-dauk kwit, it enesiburu on neg nauk kamag ulug, Tuhan Yesus Kristus unuk hombuk baloho, “Henolukdoho welamek,” ulug, melal-enepuk kahe.

¹³Ne, hit neg de, nori, nerekwi, fano debeseil lauk kwit, henerim bouk fug angge, duruk nu.

¹⁴Nit wene lisu baloho hweag-hesauk kahe on su, ap eke en duruk ale, “Nerim,” boruk halug, ap ai furebeiyug. Enggali amag ulug, hinim noruk kam fug.

¹⁵Ai famen de, selei on hagdoho debouk fug. Ite, “Nenere, nenerek Yesus omalik deg ma” ulug, komo-duruk nu.

¹⁶Tuhan en henenda seroho fano welamag ulug, nenepuk on anyo en di ale su ale fahet henenda seroho henobaharuk kwit, henebe abirangge fahat-henesug lamag.

¹⁷An lisu balduk kahi on mundoho eneg angge howag ulug nunuk balduk kahi mu, lisu su, “Aren bal-nesasi,” bohup en, an Paulus nenggik famen nunuk balihi su.

¹⁸At Tuhan Yesus Kristus henelaheg boruk mu, hit mundoho fahat-henesug welamag.