Read Ninia Yali 1 TIMOTIUS 1 Bible Online

1 TIMOTIUS 1 - Ninia Yali bible

1 TIMOTIUS 1

¹ Namloho Timotius yei. At nenahap wendatuk on Allah nim, nenenda ebereg lahe on Kristus Yesus anyo inim en, wene melaloho hweag-nitsi fam, an Paulus Yesus Kristus ayonggo rasul unduhuk nobahasi on anyo en, wene nit abirangge demdoho boruk kahe anyo fam en an namloho neg atihin mu, wene eke hweag-hirik. At nenakni Allah inim, Kristus Yesus inim enenda hundig en og-hereheg, helaheg en fanoap hobahakeg, ne, henda we wongdoho fano welamag ulug, habeheg, duruk kamuhup.

³An Makedonia lamin ulug, lauk kwit, “Hat o Efesus eta welamin o,” hweag-hitihik anyo re, “It ap homi wene mulik bilinggeheg, ondoho indip bilinggeheg, bok am fug angge lit-halug laheg, duruk esalug, nenenda demdoho boruk fam Allah en nenebuhu wenggelfag anyo, neneluk amag ulug nenepuk eleg ma, we alemaroho wene indip heraruruk kwit, saling-kwaling uruk mu, furebouk fug o,” ulug, hweag-eseheg, ne, it ap homi foman wene amu on il noruk anyo, “Hweag-esauk ousa o,” ulug, hweag-eseheg, duruk karuhun, ulug, “Eta welamin,” ulug, hweag-hitihik anyo.

⁵Nit wene melaloho hweag-esauhuk wene ai, it enenda fano fam ap homi enelaheg beheg, fano wenggel-atuk halug neg deheg, enenda mun Allah fam demdoho beheg, duruk kamag ulug, hweag-hitihik anyo.

⁶Nit wene hweag-hutuk kahe su re, duk ale deg kweleg, ap homi foman embeselug, wene eleg aruhu on neg alemaroho bilingguruk.

⁷It ap ai, “Allah wene melaleg lisu baleg hweag-esauk on welatmin,” boruk famen, it uruk ale nim, ne, enele omamne fam, “Ai airoho hahup,” ulug, uruk anyo nim, ai enenda we hesangge enapeleg wereg lit, uruk.

⁸Allah wene melaleg lisu baleg anyo higitdoho duruk kamul ulug, wauk kahe halug de, fanoreg ma hauk kahe.

⁹Allah wene melaleg anyo re, ap siag duk fug angge enenda fano wereg esalug, hweag-esebag fug. Ite, it ap Allah wene melaleg sahalduk on mel, enobabut mun siag on mel, Allah along bouk fug angge wereg on mel, it siag duruk on mel, enenda furebouk fug angge hesangge dil noruk on mel, inisinga enakni enowatuk on mel, ap homi hesangge enowatil noruk on mel,

¹⁰homi hesangge enepuk on mel, ap ap enepuk on mel, ap homi enomaliki herag-enepuk on mel, seiale uruk on mel, enobam seiale dopno-esauk on mel, ai duruk on abirangge Allah wene wirik on wereg kweleg, amuroho duruk halug, enobahet at melaloho hweag-esebag.

¹¹Allah wene wirik wene anyo re, nit apne wauk kahe on leho wereg on Allah anyo en Fano Wene an hwalduk kamag ulug, hweag-nitsi anyo neg.

¹²An nomamneap napuk on Tuhan Kristus Yesus anyo en, “Ap su eke duruk kamag ulug, unduhuk fohuk halug, furoho neg duruk karuhu,” besireg, yabuk eke an duruk karuhu ulug, unduhuk nobahasi mu, dang-duruk kahi.

¹³ At atam nele siag at hweag-ereheg, nolokdoho wereg lit, at ele wauk on enowatil laheg, at siahapdoho feil laheg, duruk katihik famen, demdoho bouk fug angge we napeleg wereg lit, duruk katihik mu, Allah nelaheg bolug nobaharuk katsi.

¹⁴Kristus Yesus ninim hundig mu, fanoap nobahakeg neg duruk kwit, an Allah wene demdoho boukwag ulug, nabeheg, ne, ap homi enenda hundig enebeheg, dukwag ulug, napsi.

¹⁵“Ap homi siag duruk on anyo enahap wendarukwag ulug, Kristus Yesus o suma wambik wahasi,” ulug, uruk anyo re, wene demdoho deg ma, demdoho bolug, wahup fano. “Ap homi siag duruk on,” uruk ai, it siag duruk on sebeleg hag wereg kweleg, an neg de siag mun alongdoho siag duruk on welatihik famen,

¹⁶at nelaheg bolug nobahasi. Fobik it ap homi eneluk mundoho welamuhup bebag on anyo en enenda at obam dip-debelug, demdoho boruk fam wauk kamuhup anyo wal-heheg duruk kamuhup anyo an nebe. Niren Yesus Kristus siahap deberuk kahe famen, onggo folo-folo og-nesauk eleg, furebelug og-nesauk anyo siag alongdoho duruk on an nebe anyo fam enam amag ulug, nelaheg bolug nobahasi.

¹⁷Ne, ketia, namloho. Di o su o, ap homi atam welatswa on nim, ketia wereg on nim, fobik welamuhup on nim, Nenakni unuk bogdeg raja waratuk eleg mun eitog oluk wereg on, ninil hauk eleg on Allah amu wereg on unuk mundoho leho motdeg welaruhu. Amin.

¹⁸Ne, Timotius namloho ahwi! Atam it ap nabi on en hat honggwareg fahet uruk kwit, “Fobik diroho duruk karuhu,” ulug, uswa hag, an den higitdoho melaloho hweag-hirihi. Henda demdoho bolug, wauk ale inim, fano wenggel-atuk halug neg duruk ale inim, mun akni atlug, wene hweag-hirihi on ebetuk kwit, dil lauk kamin. It ap foma enenda fano wenggel-atuk anyo sahaloho folug, amu on dil noruk mu, kapal helep fam dung-duruk kwit, lilibuk-lalabag duruk hag, it demdoho bolug wausa wene anyo airoho wororogdoho embeseswa ma, ulug, hweag-hirihi.

²⁰It ap Himeneus nim, Aleksander nim, airoho duswa ma, an den Allah unuk siahapdoho foruk on enakol boukwag ulug, enebe Iblis enggikmu-ap debeserihik.