Read Ninia Yali 1 TIMOTIUS 2 Bible Online

1 TIMOTIUS 2 - Ninia Yali bible

1 TIMOTIUS 2

¹Wene atam hweag-hitmin behi anyo hweag-hirikohon. Di ap homi su ap homi abirangge enobahet Allah heng-deheg, somban eheg, ap homi enobahet hweag-ereheg, let-hapuk anyo fahet dang-deheg, duruk karuhun en, hweag-hutuk kahi.

²It ap enenuk bogdeg pemerintah inim, it ap yain-kain abirangge inim, fano hwal-nenepuk kweleg, nenenda wereg atlug, Allah furoho mutlug lauk kwit, nenenda we seroho welamag ulug, enobahet inim somban uruk kamin.

³Airoho duruk halug, nenahap wendatuk on Allah ahayeg boruk mu, fano neg.

⁴Aren di ap homi su ap homi abirangge enahap wendareg lit, wene aren uruk wene anyo, “Eneluk alep aho!” ulug ebet-enepuk.

⁵At Allah misig neg wereg. Ne, ap homi nim, Allah nim, bulmu on enobahet yonggo mondotuk on ap atfag on misig Kristus Yesus at neg.

⁶At di ap homi su ap homi mundoho loloho feselug, at ebe fam inili oko enonggo balsi. Ai disi anyo re, Allah en di ap su ap abirangge debesehuk ulug wenggelfag ale, fag aruhu sali horog aik wahasi mu, fag atsi

⁷ Allah en di ap homi su ap homi abirangge debesehuk wenggelfag anyo, it ap dagma on Allah uruk wene eneluk atlug, demdoho bohup wene anyo re, hweag-esauk kamag ulug, unduhuk nobahakeg, ne, di o su o hweag-isil noruk kamag ulug, ayonggo rasul unduhuk nobahakeg, disi. Wene ai re, seiale re fug. Dik demdoho hweag-hisihi.

⁸Aireg ma, it ap di o su o abirangge enolok beheg, suahal eheg, duk fug angge, Allah obahet fano eneg wereg lit, enenggik lahabe folug, somban uruk kamag ulug, “Yehei,” neg boruk kahi.

⁹ Ne, it homi enenda wereg halug, enesum enesili furoho wan-dauk hag, “Di homi su homi abirangge enenda wereg atlug, airoho enesum enesili hwaloho wan-dauk kalep aho!” ulug, boruk kahi. Eneruk a wiri folug, soaleheg, bosie emas amumulit on feheg, wirili hag angge mutiara amumulit on anyo neg wan-deheg, ne, enasum onggo humon anyo neg wan-deheg, duhup ai re, ousa.

¹⁰Ite it homi Allah wene wauk on en, enesum enesili furebelug wan-dauk hag, di fano su fano debeseil lauk anyo re, higitdoho furebelug debeseil lauk kamag.

¹¹It homi anyo re, enele eleg atlug, ap enapma hwerieg lit, wene hwelauk kamag.

¹² Hawa dam wal-debebag fug mu, Adam dam wal-debelug, ai en Hawa wal-debebag. Ai en Adam atam lalfag fug famen, hwe lalfag ma, ai fam siag debag ma, an den it homi en ap hweag-esauk kaheg, ap melal-enebeheg, duruk kamuhup fug uruk kahi. Ite, it enehunsi enapma enele eleg angge welamuhup.

¹⁵Hwe anyo siag debag famen, it[1] homi anyo enenda wereg lit, Allah wene demdoho beheg, ap homi enenda hundig enebeheg, ne, siag duk fug angge fano neg welaheg, duruk halug neg de, it enomaliki endag-enepuk kweleg, Allah en enahap wendat-enepuk karuhu.