Read Ninia Yali 1 TIMOTIUS 3 Bible Online

1 TIMOTIUS 3 - Ninia Yali bible

1 TIMOTIUS 3

¹“Ap eke en, An Allah omaliki hwal-enepuk on welaruhuk, boruk halug, at duhuk besi ai re fano,” ulug, ap homi en uruk ai re, demdoho uruk.

² Ap eke Allah omaliki hwal-enepuk on unduhuk fohuk boruk kwit halug de, ap homi enele at obam foruk eleg on halug, ohwe misig on halug,[2] onggwareg enda hwal-dauk on halug, enda wereg on halug, fi-furoho duruk on halug, bobag-enepuk on halug, ap homi fano hweag-esauk kam alereg halug,

³ahalue wenenebo enepuk on homoroho nauk eleg on halug, olok folo-folo laharuk eleg, enda lombukdeg on halug, yeik yapuk eleg on halug, uang neg enda boruk kwit, heraruruk eleg on halug, ap airoho on ai re Allah omaliki hwalduk on welaruhu fano.

⁴Ap eke Allah omaliki fahat-enesug on welaruhu ai re, along wereg halug, at omaliki eyog indipkwe wereg on furoho hwal-enepuk halug neg, unduhuk fohup.

⁵Ap eke en at omaliki neg, hwal-enepuk ale apeleg halug, Yesus omaliki jemaat Allah anyo keroho hwal-enepuk karuhu? Duk fug alereg.

⁶Ap owan ketia Allah momalsi halug, unduhuk fohup fug. Iblis enda leho fahat-dauk katfag ma, siahap debebag anyo hag, ap ai airoho enda leho fahat-dahu fam siahap debouk no, unduhuk fouk fug.

⁷Unduhuk fohup halug, siag duhu fam ap homi en abug uruk halug, bak sabumu anggolop ketnog uruk hag, Iblis en ap ai airoho enda laluk no, it ap dagma on en oho at duruk ale abug balduk kwit, “Ap ai abut wenggeleg on,” uruk on halug neg, unduhuk fohup

⁸Ne, it ap let-enepuk on anyo re, airoho at it enalong wereg lit, enele biren fug misig neg uruk on halug, e anggur anggen ahalue wenenebo duruk on homoroho nauk eleg on halug, uang hwelamin ulug, ap homi lal-enepuk eleg on halug,

⁹ne, wene heraho welatfag wene nenenda demdoho boruk kahe wene anyo foroho lit, enda fano wenggel-atuk halug neg duruk halug, ap ai on unduhuk fesehup fano.

¹⁰It ap let-enepuk on welamuhup ai, atam enebut bale feselug, enele enobam feseruk eleg halug neg de, unduhuk fesehup.

¹¹It enohwesi[3] airoho enalong wereg lit, wene hunhun ale walug noruk eleg halug, enenda wereg halug, di ale su ale enenggik omamneroho dil lauk halug, homi aireg on enehunsi let-enepuk on welamag ulug, unduhuk fesehup fano.

¹²It ap let-enepuk on ai re, enohwesi[4] misig oho on halug. Ne, enomaliki nim, at inim wereg on nim, hwal-enepuk kwit, wene furoho melaloho hweag-esauk on halug neg, unduhuk fesehup.

¹³It ap let-enepuk on dil noruk anyo, fano wenggeleg duruk esalug, enenuk wereg on welamuhup. Ne, nit nenenda Yesus Kristus obam dip-debelug, demdoho boruk kahe wene anyo, it enakol eleg angge wereg lit, hweag-isil noruk kamuhup.

¹⁴An folo-folo hea waruhuk en nenda fenggegdeg lit, wene su lisu bal-hutuk kahi famen, eke kwe bal-atuk kweleg, dihi ha no, Allah ahainelekwe wereg lit, nanggoho dil lauk ale holuk aruhun en, lisu su bal-hutuk kahi. Wene Allah en uruk wene o anduli hambukdoho belabeg ai, Allah mundoho oluk wereg on omaliki Yesus ebe fam kabog-duruk on anyo neg.

¹⁶Nit Allah wene demdoho bolug wauk kahe on, heraho welatfag wene anyo re, su. “At ap hag neg enam atsi mu, su Allah amloho boukwag ulug, Allah Aheime en ename fesi.[5] Ename fesi mu, boholma yonggo noruk on malaikat en, at ebe inil hausa. Ap homi Allah wene enapeleg on weregma at disi wene hweag-isil lausa. Di o su o it ap abirangge at demdoho bousa. Allah en boholma walug lahasi,” ulug, uruk anyo mun demdoho hehe.