Read Ninia Yali 1 TIMOTIUS 5 Bible Online

1 TIMOTIUS 5 - Ninia Yali bible

1 TIMOTIUS 5

¹It ap sobalon halug, hele omamne fam bet-enebuk fug. “Su naknisi hag deg ma,” ulug, enenda aho ware feseruk kamin. It ap sauwe on ai, hat hautsi hag,

²it homi sobalon ai re, hisingasi hag, ne, it homi duhum on ai re, hautsi hag deg ma, henda siag eberuk fug angge wereg lit, wene hweag-esauk kamin.

³It homi sohwe on enomaliki hwal-enepuk on demdoho eleg ma, halug, hat furebeseruk kamin.

⁴Ai famen de, homi sohwe on enombalosi enomaliki wereg esalug neg de, it anyo en Allah wene higitdoho dukwag ulug, enesingasi enombalosi it dam let-enepuk kamag. It hwal-enepuk katswa anyo onggo ketia it enaknisi enesingasi hwal-enepuk kamuhup. Airoho duruk halug, Allah ahayeg boruk.

⁵Hwe eke sohwe on omaliki let-duruk on demdoho eleg halug, hwe ai ebe demdoho sohwe on anyo en, “Allah en let-napuk kamag,” ulug, endama ebereg lit, hupmu hubet Allah heng-deheg, somban eheg, duruk famen,

⁶it homi sohwe enenggik duk fug angge wereg lit, “Nenahayeg haul, ulug, ai neg dil lauk kamul,” ulug, boruk on halug ai, eneluk wereg famen, waratswa hag wereg.

⁷Homi sohwe airoho duruk halug, ap homi enele enobam fouk no, wene su re hundig-hundig hele omamne fam komo-enepuk kamin.

⁸Ai famen, ap misig eke at eyog indip kwe wereg on hwal-enepuk eleg ai, siag famen, at omaliki neg hwal-enepuk eleg halug, ai re, it ap homi demdoho boruk eleg on ai re, siag doron hag famen, ai neg de siag humon duruk. At demdoho besi anyo re, fotog-esasi mu, wereg.

⁹Hwe eke ondoho kweleg, 60 tahun duruk eleg halug, unuk baluhup fug. Ite, ahun misig oho kweleg,[7] waratuk kwit, sohwe foruk halug,

¹⁰“Di fano su fano debeseil noruk,” uruk halug, omaliki furoho hwal-enepuk katsi halug, ap bohon bobag-enepuk halug, it demdoho boruk on Allah omaliki enapma sebe ulug enobahet duruk halug, it anggin enobam atuk on let-enepuk halug, di fano su fano duruk ale, “An nonggwareg en duruk katmin,” ulug, duruk on halug, unuk baluhun fano famen,

¹¹it homi sohwe owan duhum on esalug neg de, enenuk baluhun fug. It homi ai, enenda nauk halug, Kristus wausa anyo fotog-esalug, ap amu on hwelauk ale wenggeluhup angge re, enenuk baluhun fug.

¹²It atam, “Kristus mutlug lahuk,” ulug, momalswa on anyo fotog-esauk kwit, siag duhup.

¹³Mulahe neg nohweil noruk kwit, enenggik omamne elehap dil noruk. Ai neg dil noruk ai re fug. Ite, hunhun ale enembilik atogma walug noruk kaheg, ekema enam aheg, dil noruk kwit, wene uk ale siag on hesangge il noruk.

¹⁴Aireg ma, it homi ai duhup fam, it ninim minggirig anyo en nenenggali ware nenobahauk no, it homi duhummu sohwe feseruk on anyo re, enehunsi hwelaheg, enomaliki endag-enebeheg, enobam fano wereg laheg, duruk kamag ulug, fano neg boruk kahi.

¹⁵Homi sohwe foma neg de, Iblis mutlug lauk kamuhuk ulug, enambol sombandoho lauk famen,

¹⁶hwe enda demdoho boruk on anyo en isinga sohwe wereg halug, it Yesus omaliki anggin enobam fesouk no, at sohwe omaliki anyo en enisinga let-duruk kamag. Ne, it homi sohwe on famen, enomaliki eleg halug neg de, it Allah omaliki en let-hauk kamag.

¹⁷ Allah en uruk kwit, “Sapi en gandum ahap ibildil lauk mu, eke na no ulug, ambilik sabu het-duhup ousa.” Ne, eke, “It ap yabuk wutuk on anyo yabuk onggo higitdoho og-esauk kamuhup, ai fano,” ulug, ebag ale lisu baleg wereg ma, it ap Allah omaliki hwalduk on en Allah omaliki fano fahat-enesug lit, Allah wene hweag-eseheg, komo-enebeheg, furoho duruk halug, onggo og-esauk kamuhup ulug wereg kweleg, ekenim dopnoroho og-esahup ai fano.

¹⁹ Ap biren ane, henahan en a, “Airoho duruk mu, hehe,” ulug, uruk eleg kweleg, ap misig en neg ap Allah omaliki hwalduk on eke ele obam dopno hauk halug, at ele holuhup ousa.

²⁰Ap misig eke en siag neg duruk halug, it ap homi enekol boukwag ulug, hummen komoriyug.

²¹An anyo Allah nim, Kristus Yesus nim, boholma yonggo noruk kamag ulug, eneko fesebag on malaikat omano nim, inil hanim an wene su omamneroho hweag-hirihi. An wene hweag-hirihi su abirangge duruk kwit, hat hinim hundig on halug, embeseheg, ne, ap homi enemu on halug, neg hweag-eseheg duruk kam fug. Ite, ap homi abirangge eneluk atlug duruk kamag ulug, hweag-esauk kamin.

²²Allah eyabuk duruk kamag ulug, unduhuk feseruk kwit, enunggul sebeluhuk ulug, folo-folo duk fug. It eke siag duruk fam hat inim dopno-da fug angge, hat henda fano horeg mun amu eneg welamin.

²³Hahum ouk habeheg, hebe hundig-hundig homamne eleg aheg, hapuk mu, hat ik neg nauk kam fug. Ite, anggur ahalue dorangge nim, nenggeg duruk kamin.

²⁴Ap foman siag duruk ale fahet wene owan bilinggik la fug mu, enam aheg, ne, ap foman siag duruk ale fahet wene bilingguruk men neg, enam aheg, duruk.

²⁵Ai hagdoho, ap foman fano ale duruk mu, ap mundoho enoluk atuk. Ne, it foman fano ale duruk anyo enameg fug famen, heraho lit welam fug alereg.