Read Ninia Yali 1 TIMOTIUS 6 Bible Online

1 TIMOTIUS 6 - Ninia Yali bible

1 TIMOTIUS 6

¹Allah unuk inim, nit wene hweag-esauk kahe anyo inim, siahapdoho fouk no, wam kumbi ililoho neg foroho wereg hag, it ap homi enamingming angge ai re, airoho, “Nenaknisi,” ulug, enele holduk kwit, enelong boruk kamag.

²Ne, it ap homi enamingming angge anyo en eneknisi Yesus demdoho bolug omaliki atswa halug, “Nit oho demdoho bolug Yesus omaliki welahe ma, ninim higitdeg,” ulug, enele sahaloho folug, sebele fesehup ousa. Ite, it anyo en, “Nenaknisi eneyabuk wiri feseruk kahe ai re, ap homi enemu on de fug. Nit ninim, higitdoho demdoho boruk kahe ma, nenenda hundig o,” ulug, eke nim enobahet humdoho dil noruk kamag.

³Wene hweag-hutuk kahi on su, komo-enebeheg, hweag-eseheg, duruk kamin. Ap misig eke wene wirik wene Tuhan Yesus Kristus wene anyo inim, nit Allah wene furebelug mutlug lauk ale hweag-hesauk kahe anyo inim, erim boruk kwit, amu on hweag-esauk halug,

⁴aren, “An noluk,” ulug, leho fahat-dil lauk famen, apelegdeg kweleg, we hesangge il lauk. At ap ai anyo wene, “Su aireg ma, ai direg ma,” ulug, uruk kwit, suahal eheg, ne, wene dorale fahet yeik yabeheg, duruk ale ai re, ahayeg beil noruk. At airoho dil lauk halug, it ap foma Allah uruk wene anyo mun enepeleg wereg lit, siag neg wenggelduk anyo en, “At uruk anyo neg holuhuk, hweag-nesauk mu,” ulug, nerim herim eheg, “An along, hat along,” eheg, yeik abeheg, at siag boruk kwit, abug baldil laheg, inim suahal eheg neg duruk. It ap ai, “Allah wene furebelug dil lauk nesalug, nenenggik wereg dahuk,” ulug, boruk famen,

⁶nit neg de Allah wene furebelug, dil noruk kwit, “Foroho welahe ai neg fano,” ulug, nenenda seroho wereg nesalug, onggo along on wahuk neneluk.

⁷Nenesingasi enehummen endag-atuk kwit, nenangge walug wilibik waharuhuk fug mu, waratuk kwit oho, eke walug lahuk fug.

⁸Aireg ma, nenasum wan-dauk on eke mel, nenesiburu nauk on dorangge mel wereg halug, “Su mundoho,” ulug, ai fam nenenda seroho welamul.

⁹It ap, “Nenenggik werehap daul,” ulug, boruk halug, Iblis en, “Iyale aha,” ulug, enenda kahalduk kweleg, bak sabu yepdeg apelegdeg lit, hesangge elagma lauk mu, anggolop ketnogdoho watuk hag, it ap ai airoho fetagdoho siag duruk. Ne, “Su an nebe fam siahap dauk kahi,” ulug, bouk fug angge enenda hesangge nil laheg, dil lauk fam kobogdoho bule wamburuk kwit, enebe mun wat-dahup.

¹⁰Siag-biag indip de, uang neg enenda beil noruk ai. It ap homi foman, “Uang nenda o,” ulug, heraril noruk kwit, wene demdoho bousa anyo, fotog-esalug, kwe amu on kwanirulug lauk mu, ap fit fam daloho wat-dalug, ouk hauk anyo hag, it ap ai airoho at dauk.

¹¹Hat neg de, Allah amloho deg lahen ma, duruk ale ai on wehen ha no, ahayeroho longgo uruk kamin. Fano halug neg deheg, Allah wene furebelug deheg, henda demdoho beheg, ap homi henda hundig enebeheg, ai on duk ale halug neg mutlug lauk kamin.

¹²Nit demdoho bolug, mutlug lauk kahe anyo, hat oho mutlug lauk karuhun ulug, mun wal-heheg duruk kamin. Ne, holuk mundoho welaruhun en, hayonggo fesi mu, hat demdoho berihin mu, ap homi abit inil hanim fag-dirihin anyo, mun hwelag lahun.

¹³ Di angge su angge eneluk enepuk on indip de, at Allah inim, ne, at enda bebag ale Pontius Pilatus il hanim fag-disi on Kristus Yesus anyo inim, inil hanim fam nele omamne su hweag-hutuk kahi.

¹⁴Wene melaloho hweag-hutswa anyo, eke belabe feheg, duk fug angge, aldoroho foroho ma, Tuhan Yesus Kristus enam aik wamag ulug, furoho foroho lit, dil noruk kamin.

¹⁵Allah en “Ai salim ename feik waruhuk,” ulug, wenggeloho febag anyo higitdoho ename feik waruhu. Nit mot-duruk kahe on mun omamne wereg on ai Allah. Ap homi enowe fahat-enesug on raja mundoho enakni inim, di ap su ap enenuk wereg on Tuhan inim, ai at neg.

¹⁶At waratuk eleg mundoho oluk wereg on at. At weregma etma seleg humon deg ma, ap homi en at akit yambeg ik la fug alereg. Ap homi en atam at ebe inil hauk katfag fug mu, ketia oho inil hauk eleg neg. “At unuk mun leho ma, di ap homi su ap homi at apma neg sebe ulug, at ele neg holduk kamag,” ulug. Amin.

¹⁷It ap homi o ketia enenggik wereg on wereg esalug, ai fam enenda leho fahat-dauk kwit, di angge su angge eleg aruhu angge fahet enenda ai ebereg welam no, hweag-esauk kamin. Ite, nit nenahayeg bohuk en, Allah en di angge su angge bulel-baleldoho og-nesauk anyo fam, enenda mun ebereg welamag ulug, hweag-esauk kamin.

¹⁸Enenggik wereg on en ap homi enelaheg bolug let-enepuk kam hag de, fanoap debeseil noruk kwit, enenda fano en neg, enengge wereg on fam it eke enengge eleg halug, og-esauk ale neg, enahayeg beheg, duruk kamag ulug, hweag-esauk kamin.

¹⁹Ai duruk halug, sono o ebe wurukwag ulug, yoho o anduli hambukdoho belapuk anyo hag, it fobik eneluk mundoho on hwelahup anyo, enenda firig welam no ulug, “Nenebuhu neg,” bolug, enangge fano hun-dowag ulug, eneuang andog-dauk hag, ketia di fano su fano dil noruk kamag, ulug, hweag-esauk kamin.

²⁰Timotius ahwi! Wene furoho uk fug angge ahalue dep-dep il laheg, seiale wene famen, “Wene keron su o,” il waharuk fam suahal eheg, duruk anyo on de, furebouk fug. Ite, hat hwalduk karuhun, ulug, unduhuk hobahausa anyo neg, furebelug duruk kamin.

²¹Wene ai on il noruk fam, ap homi foma demdoho bolug wausareg, Allah wene demdoho bousa anyo fotog-esalug, kwe amu on fam kwaniroho lauk. Ketia mundoho hweag-hirihi. Nenakni Allah hinim wereg ma, fahat-husug laruhu, namloho e! An Paulus en balihi.