Read Ninia Yali 2 TIMOTIUS 1 Bible Online

2 TIMOTIUS 1 - Ninia Yali bible

2 TIMOTIUS 1

¹Timotius ahwi! Hat namloho nenda hundig on deg ma, at Allah bebag fam, nit Kristus Yesus ninim hundig wereg lit, neneluk mundoho welamuhuk wene abug hweag-nesasi anyo, hweag-esauk karuhuk en, Kristus Yesus ayonggo rasul unduhuk nobahasi anyo, an Paulus en wene eke hweag-hirik.

² At nenakni Allah inim, Tuhan Yesus Kristus inim, enenda hundig en og-hereheg, helaheg en fanoap hobahakeg, henda hambukdoho welaruhun ulug, habeheg, duruk kamuhup.

³An hupmu hubet somban uruk kahi mu, uruk kwit, hat hobam ebereg neg welahi mu, nakni Allah dang-duruk kahi. An nombasi enenda siag ebet-ha fug angge wereg lit, enenda demdoho fam Allah obahet duruk katfag anyo hag an higitdoho duruk kahi.

⁴Hat oba yatihin anyo ebet-atuk halug, an nenda nahayeg hum amag ulug, “Hea wale aho!” boruk kahi.

⁵ Hat henda mun Yesus fam dip-deberihin anyo an noluk. Hombalo Lois mel, hisinga Eunike mel, atam demdoho bousa hag, hat oho demdoho berihin mu, nenda ebereg welahi.

⁶Aireg ma, an nenggik hunggul sebele hobaharuk kweleg, Allah eyabuk eke duhun ulug, unduhuk hobahasi anyo, indok nahul-atmin ulug duruk halug, e yaloho fisatuk anyo hag, ekenim ebetuk karuhun en, hweag-hirihi.

⁷At Allah en nenenda nenakol boruk kam on og-nesasi fug. Ite, siahap nenepuk famen, at omamne nenepuk kweleg, nenenda hwerieg lit, wauk on nim, ap homi nenenda hundig enepuk on nim, nenenda wereg on nim, og-nesasi.

⁸Aireg ma, Tuhan en nenobahet disi anyo fag-duk ale hakol bouk fug. Ne, an Allah wene hweag-esauk katihik fam sabu het-napswa anyo, hakol bouk fug neg. Fano Wene hweag-esauk fam, anggin-fanggin nenobam foruk halug, higitdoho wowag ulug, Allah omamne og-nesauk mu, an namu eleg. Nambieg higitdoho anggin hauk kamuhuk.

⁹At Allah en nenahap wendatsireg, nit at omaliki at obahet eneg on welamag ulug, nenayonggo fesi. Nit en eke dauhuk fam de fug. Ite, aren nenebuhuk ulug wenggelfag anyo, higitdoho enda hundig en, nenobaharuk kwit, nenahap wendatsi. At enda hundig en nenepuk anyo re, o su owan wal-duruk eleg kweleg, Kristus Yesus demdoho boruk fam, wahup, ulug, wenggeloho nenobahasi anyo, fag am fug angge welatsi famen,

¹⁰horog ketia neg de nenahap wendatuk on Kristus Yesus enam aik wahasireg, waratuk on nenobam sahalireg latsi anyo, elehapdoho folug, Fano Wene wauk fam nabelal-habelal nenebuhu wene anyo hum fam fag atsi.

¹¹ Wene Fano Wene ai di ap homi su ap homi fagdoho hweag-eseheg, di o su o ap homi hweag-isil laheg, duruk kamag ulug, ayonggo rasul unduhuk nobahasi.

¹²Unduhuk nobahasi mu, dil lauk kweleg, ap homi en anggin-fanggin nobaharuk famen, nenggali bouk fug angge welahi. An nenda ap sa obam dip-deberihik anyo re, mun nolukdeg. Ne, an duruk kamag ulug, unduhuk nobahasi anyo,[1] nenowe waharuk eleg kweleg, at sen-nasug lit wereg ma, eleg aruhu ai eleg. “Hweag-esauk karuhuk neg,” ulug, demdoho boruk kahi.

¹³Wene wirik wene hat wal-heheg duruk karuhun, ulug, hweag-hutuk katihik anyo, foroho lamin. Kristus Yesus ninim hundig wereg lit, wene ebe wene su demdoho beheg, ne, ap homi hinim hundig deheg, duruk kwit, foroho lamin.

¹⁴Ebe on hwalduk kamag ulug, hobahasi anyo, Allah Aheime nenendama wereg anyo en homamne hapuk kweleg, furoho hwalduk kamin.

¹⁵It ap o Asia wereg on, ap Figelus mel, Hermogenes mel, mundoho an fotog-nealug longgo uswa anyo, hat holuk.

¹⁶At ap Onesiforus neg de, an bosie sabu hetdeg kweleg, enggali en fotog-nea fug angge, hundig-hundig nenda aho ware nobaharuk katsi mu, at ahainelekwe nim Allah en enelaheg bolug, fanoe feseruk karuhu.

¹⁷At o Roma aik wahasireg, folo-folo hera-nabil noruk kwit, hweag-napsi.

¹⁸At o Efesus wereg lit, let-napuk katsi anyo, hat mun holukdeg ma, o ahae fotog salim Tuhan en elaheg en fanoap debehu.