Read Ninia Yali 2 TIMOTIUS 2 Bible Online

2 TIMOTIUS 2 - Ninia Yali bible

2 TIMOTIUS 2

¹Namloho hat neg de, Kristus Yesus ninim hundig mu, Allah enda hundig en, omamne hapuk kweleg, hambukdoho wereg lit, dil lauk kamin.

²Ap homi humdoho inil hanim fam, di wene su wene hweag-hitihik ale holdihin anyo, it ap fano oho folug, ap homi furoho hweag-esa alereg esauihin halug, hweag-esauk kamag ulug, hweag-esauk kamin.

³Siahap nobaharuk kweleg, nolokdoho wereg lit, wauk kahi hag, hat Kristus aut sehen foroho on ebe on hag wereg lit, nambieg higitdoho wauk kamul.

⁴Ap eke en, “Nowe weim hweag-nitsi on ahayeg howag,” ulug, di duruk su duruk embeselug, weim apuk ale neg enda ebereg lit, dil lauk anyo.

⁵Ne, ap eke, “Sa dam onggo hwelamisi?” ulug, wal-hauk kwit, “Airoho din,” ulug, wene melaleg higitdoho duruk eleg halug, onggo hwelak lauk eleg.

⁶Ap yabuk enggik omamne amurururoho wiri foruk halug neg, anggen yihig keram on bal-dahu.

⁷An hweag-hutuk kahi su re, di wene su wene enegdoho hahun en Tuhan en holugap habuhu mu, fureberuk kamin.

⁸At Allah en Daud omba Yesus Kristus waratlug laukmen, oluk apdoho unduhuk fesi wene anyo re, an Fano Wene hweag-esauk kahi hag, higitdoho ebetuk kamin.

⁹An wene ai at hweag-esauk kahi fam siahap nabil wahausa wahausa ambiangma, “Ap mun siag duruk on,” ulug, bosie manggen sabu hetdoho kwelap-enepuk mu, kwelabe nobahausa famen, Allah wene neg de sabu het-duk fug ale deg ma, saharil lauk.

¹⁰Aireg ma, it ap homi Allah momal-enepsi on enenda Kristus Yesus fam dip-debelug, demdoho boruk esalug, enahap wendare folug, mundoho inim leho welamag ulug, siahap nobaharuk kweleg, it enobahet nolokdoho wereg lit, wauk kahi.

¹¹Nit at ninim, waratuhuk halug, at ninim, neneluk amuhuk.

¹² Siahap nenobaharuk kweleg, nenolokdoho wereg lit, wauk halug, at ninim, leho wereg lit, ap homi fahat-enesug lamuhuk. Niren at fotog-esauk nesalug, aren oho nit fotog-nesahu.

¹³“Niren uruk ale wereg kweleg, amu duruk kahe famen, aren uruk ale neg de, amu atuk eleg uruk ale, higitdoho duruk.” ulug, uruk anyo re mun dik demdoho.

¹⁴Wene hweag-utuk kahi su, ap homi en ebetuk kamag ulug, hweag-esauk kamin. Wene dorangge fahet suahal uruk anyo fam, fanoap dauk fug. It holduk on anyo enolok atuk mu, “Airoho duk fug,” ulug, Allah il hanim fam hele omamne fam hweag-esauk karuhun en, hweag-hirihi.

¹⁵Ap eke yabuk fano wutuk kwit, akol boruk eleg anyo hag, hat Allah uruk wene hweag-esauk kwit, hendaman wenggeloho amu on nim, dopnoroho hweag-esa fug angge, at ele neg furoho hweag-esauk healug, Allah en ahayeg habukwag ulug, duruk kamin.

¹⁶Wene fureg eleg angge ahalue dep-dep il noruk fam, fanoap dahup fug, siag duk ale neg enebuhu mu, embesehup.

¹⁷It ap yebil hwenanggo misigmu indip dil lauk kwit, enebe fene humdoho saharuruk anyo hag, it ap ai enele airoho saharil noruk. Wene ai il noruk anyo re, ap Himeneus mel, Filetus mel en, il noruk.

¹⁸It ap ai, Allah en uruk wene anyo fotog-esalug, “Ap homi waratlug laukmen, endam eneluk apdoho unduhuk fesesi,” ulug, uruk kwit, it demdoho bousa anyo foma enenda aham-enepuk famen,

¹⁹ o wirig ili oko lisu baleg wereg hag, Allah duhuk wenggelfag anyo, mun furoho wenggelukwag ulug, uruk kwit, “An nomaliki halug de nolukdeg lahi.” Ne, “Di ap homi su ap homi abirangge en, An Allah omalik, uruk halug, it siag duruk anyo embeseruk kamag,” ulug, ebag ma, it ap ai re airoho duruk famen, Allah en, “Duhu,” wenggelfag ai, o anduli belabeg hambukdoho wereg hag, mun hambukdoho welaruhu.

²⁰O humon wirigmu etma waruk eke bosie emas on mel, perak on mel, ai on neg buhundoho wereg fug. Ite, foma e on mel, kwenang on mel, buhundoho wereg. Waruk buhun-bahan on halug de, amu ale eke duhuk ulug, eneko wereg. Ne, siag on hag halug neg de, we hesangge duruk on wereg.

²¹Aireg ma, ap misig eke waruk horeg mun fano wereg hag, at asiag embeseruk halug, at akni en di angge su angge mun alongdoho duruk kamag ulug, akni obahet eneko wereg.

²²Ap sauwe enenda nauk anyo hag, hat airoho hapuk halug, embeselug, longgo uruk kamin. Fano on halug neg duruk on mel, enenda demdoho boruk on mel, ap homi enenda hundig enepuk on mel, enenda misig sebereg wereg inim, it ap homi enenda fano fam, “Nenakni Allah,” ulug, uruk anyo hinim en duruk ai on neg mutlug lauk kamin.

²³Ap morue en wene al wil noruk fam, suahal uruk anyo, hat embeseruk kamin.

²⁴Hat Tuhan amingming angge halug, yeik yabeheg duruk ai re, ousa. Ite, di ap homi su ap homi abirangge hele sakoroho uruk kwit, wene hweag-eseheg, siahap hobaharuk famen, onggo hweag-esa fug angge bok neg welaheg, duruk kamin.

²⁵It hinim minggirig wereg lit, wene amu on il noruk anyo embeselug, ebe wene eneluk amag ulug, Allah en debesouk angge fahet duk no, hele sakoroho hweag-esauk kamin.

²⁶Allah en airoho debeseruk halug, Iblis boruk ale duruk kamag ulug, sabu yepdoho debesesi angge fahet enenda wereg atlug, sabu anyo lol-dalug, wilibik lauk kamuhup.