Read Ninia Yali 2 TIMOTIUS 3 Bible Online

2 TIMOTIUS 3 - Ninia Yali bible

2 TIMOTIUS 3

¹Namloho yei! Fobik o ahae fotog fam anggin mun nikdoho henobam aik waruhu anyo, holuk aruhun en hweag-hirik.

²Ai li em duhup ale anyo re, ap homi enenda kibu on welaheg, uang neg enenda dil laheg, enenda leho fahat-dil laheg, yande-nabukwag ulug, winik-wonog il laheg, enori siahapdoho feseil laheg, enaknisi enisingasi enele furoho holuk fug angge noruk kaheg, haperoho noruk kaheg, Allah wene sahaloho feil laheg, duruk kamuhup.

³Airoho dil noruk kwit, enowe enaut enelaheg beheg, enenda sako ukwag ulug inim wene mareheg, mun duk fug alereg lamuhup. Ap homi enebug baldil laheg, duk ale enepuk halug, sebeloho fouk fug angge hesangge dil laheg, enolok ahe uaroho dil laheg, ap homi mun enowatul ulug dil laheg, fano duruk ale enerim beil laheg, duruk kamuhup.

⁴Ap homi lal-enebeheg, enenda wenggeluk fug angge hesangge dil laheg, an neg beil laheg, Allah enda boruk eleg on enenda nauk halug hesangge dil laheg, duruk on ai neg dil lauk kamuhup.

⁵Ne, ai dil noruk kwit, hit Allah wene demdoho bolug, mutlug lauk hag, it oho enahap fam Allah omaliki hag dahup famen, enenda neg de Allah en fano enepuk ale “Nenerim,” ulug, uruk kamuhup. Ap homi aireg on ai ahaye enepuk kamek.

⁶It ap ai en olma kul ulug, enele saki-sakoroho hweag-esauk kwit, kuruk esalug, it homi enenda nauk halug mutlug lauk kwit, siag duruk katswa fam, enenda anggin wereg anyo, enele sakoroho hweag-esauk kwit, enenda aham-enepuk.

⁷It homi ai en hundig-hundig, “Wene hweag-nesakiek,” uruk famen, Allah en uruk wene anyo wa fug angge wereg.

⁸ It ap Yanes Yambres inim en, “Musa wene nenerim,” ulug, ebag anyo hag, it ap ai Allah en uruk wene anyo, “Nenerim,” ulug, uruk. It enenda siag neg wenggelduk mu, nit wene demdoho bolug duruk ale ketia duruk eleg.

⁹It ap Yanes Yambres nim dil lebag ale enam atfag anyo hag, it ap ai, enenda hesangge enapeleg wereg lit, il noruk anyo ap homi abirangge inil hanim fam fag atuk halug, eke nim duhup fug.

¹⁰Hat neg de, an wene hweag-eseheg, dil laheg, duhuk ale nenda wenggeleheg, nenda at Yesus Kristus fam dip-debelug, demdoho beheg, siahap nobaharuk kweleg, nenda hambukdoho welaheg, ap homi nenda hundig enebeheg, siahap nobaharuk famen, nenda hambukdoho wereg lit weheg, dil lauk mu neauihin anyo.

¹¹ Ne, an o Antiokhia inim, Ikonium inim, o Listra inim, wereg ma, siahap-biahap napuk kweleg, nenda hambukdoho wereg lit, wauk katihik hag, ketia napuk halug, wauk kahi ale mel, hat holuk. An etma wereg ma, napuk kweleg, nenda hambukdoho wereg lit, wauk kweleg, Tuhan en nahap wendatsi, ai along.

¹²Di ap homi su ap homi Kristus Yesus inim hundig lit, Allah wene furebelug dul boruk halug, siahap biahapdoho feseil lauk kamuhup o.

¹³Aireg ma, famen, it ap homi siag duruk on mel, seiale uruk on mel, siag ekenim humon dil lauk kwit, it it lal-dauk kamuhup famen,

¹⁴hat Timotius neg de, di wene su wene, “Su demdoho,” ulug, hwelauihin anyo, bug-bagdoho foroho lamin o. Sa mel en hweag-hutswa anyo holukdeg.

¹⁵Allah ebag wene lisu baleg anyo furebelug, Kristus Yesus demdoho boruk halug, nenahap wendat-nenebukwag ulug, neneluk nenepuk wene anyo, hat dotdeg lit, holuk atihin anyo ebetuk kwit, bug-bagdoho foroho lamin.

¹⁶Allah en ebag wene abirangge lisu baleg Allah Aheime ap enendama debeseruk kweleg, balfag. Debeseruk kweleg, balfag ma, wene baleg su anyo famen, ap homi hweag-eseheg, enele amu on il noruk anyo hwal-enebeheg, siag duruk halug, komo-enebeheg, ne, fano neg duruk kamag ulug, melaloho hweag-eseheg duruk kamag ulug, baleg wereg.[2]

¹⁷At Allah ebag ale lisu baleg og-nesasi anyo re, nit Allah omaliki wereg lit, at Allah obahet di ale su ale fano duruk kamag ulug, higit hagatdoho nenobahasi.