Read Ninia Yali 2 TIMOTIUS 4 Bible Online

2 TIMOTIUS 4 - Ninia Yali bible

2 TIMOTIUS 4

¹At Allah Kristus Yesus inim inil hanim fam nele omamne fam wene su hweag-hutuk kahi.

²Allah wene hweag-isil noruk kamin. Anggoloreg kweleg, anggolo eleg kweleg, di salim su salim hesangge hweag-esauk kamin. “Yu o,” ukwag ulug hweag-eseheg, siag duruk esalug bet-enebeheg, hele sakoroho komo-enebeheg, duruk kwit, henda fano fam hweag-esauk kamin.

³It ap wene wirik wene anyo holduk ale, “Nenerim,” ulug, sali horog aik waruhu. Ne, horog aik waharuk halug, it ap ai en, “Wene ke on uruk mu esaul?” ulug, enesanggo holdil lauk kwit, wene ai enahayeg boruk on neg, uruk on enapma kuruk kamuhup.

⁴It ap homi ai anyo re, ebe wene halug kwaniroho embeselug, wene mulik neg dindildil lauk kamuhup.

⁵Hat neg de, henda kahal-dalug lamin. Siahap hobaharuk kweleg, henda hambukdoho wereg lit, weheg, Fano Wene hweag-isil noruk karuhun, ulug, unduhuk hobahausa anyo, higitdoho hweag-isil laheg, duruk kamin.

⁶Wam Allah obahet waruhuk ulug wepdoho foruk anyo hagdoho, an nowaruhup ulug, mun wepdoho nobahausa ma, an lahakuk huli horog aik waha.

⁷Nit demdoho bolug mutlug lauk kahe anyo hwelowag ulug, wal-heheg duruk kahe anyo re, an mundoho wal-heheg duruk katihik. “Hulu ai fam buroho inaik lakiek,” ulug, hweag-esauk halug, buroho inaik lauk anyo hag, an mun onggombi huli inaik wahi. Nit wene demdoho bolug mutlug lauk kahe anyo re, an mundoho dipdoho[3] foroho latihik.

⁸Ne, ketia at Tuhan en it ap homi fano duruk halug, onggo kware-kware henaho hag mahkota wan-debeseruk anyo, o ahae fotog fam an eke wan-nobahaku en nobahasi mu, wereg o. Tuhan en wene ebe en-enepuk on wereg ma, an namu wan-nobahaku fug o. Ite, di ap homi su ap homi at enam aik wam no ulug, nangno-hauk on anyo abirangge wan-debesehu. Ap homi at apma fesehuk ulug, nenowe enam aik waharuk kwit, ap homi eneluk wereg on inim, waratswa on nim, eneko enewene bilinggik waruhu mu, ulug, nele omamneroho hweag-hirihi.

⁹ Folo-folo nea waruhun en boruk kamin. Ap Demas kwenangma on duruk ale enda disireg, nobahalug, o Tesalonika lasi. Ne, ap Kreskes o Galatia laheg, ap Titus o Dalmatia laheg, duruk kweleg,

¹¹ ap Lukas amu neg de ninim wereg lahe. Ap Markus anyo ninim duk ale fanoreg ma, waharuk kwit, hondohweil waruhun.

¹² Ap Tikhikus anyo o Efesus monde ferihik mu,

¹³ hat waharuk kwit halug, nasum hol sum dagma wan-duruk on o Troas ap Karpus obam embeselug waharihik angge anyo inim, nambuku hwililipdeg on inim, ne, eke nambuku domba ahap fungguleg on hwililipdeg on ai along on deg ma, ai nim, abirangge og-naplug waruhun.

¹⁴ Ap Aleksander bosie tembaga fam di angge su angge buhun-duruk on anyo en, nit wene hweag-esauk kahe on anyo mun erim neg boruk kwit, siag alongdoho nobahasi mu, hat oho siahap hobahauk no kahaleg lamin. At napsi anyo re, Tuhan en onggo higitdoho og-uruhu o.

¹⁶Atam nawene balukwag ulug, nori eke wahausa fug mundoho fotog-neausa famen, at Tuhan neg de ninim wereg lit, nenda aho ware nobahasi. An Fano Wene hweag-esauk kamag ulug, unduhuk nobahasi anyo re, eke belabe ferihik fug. Abirangge it ap homi dagma holduk eleg on mundoho holukwag ulug, “An hweag-esamin,” ulug, inatuk kweleg, Tuhan en neg nenda aho ware nobahasi. Nenda aho ware nobahasi mu, siahap nobahaul bousa anyo, wam maro ambilikmen delduk hag, del-napsi. Ne, nori fotog-neausa anyo Allah en siag enobam fouk no, hweag-utuk kahi.

¹⁸Siahap nobahaul bousa anyo, abirangge embeselug, Tuhan en enahap wendaroho at apma feserukmu boholma etma nobahaik lahu. At airoho nabuhu mu, unuk mundoho leho welamag, ulug, amin.

¹⁹ Hwe Priskila ap Akwila inim, ap Onesiforus omalikisi nim, dang-debeseiyug, ulug, hweag-hirihi.

²⁰ Ap Erastus o Korintus etma bok atsi famen, ap Trofimus ouk disi mu, o Miletus etma wereg kweleg waharihik.

²¹O sanim waruhu li em owan waharuk eleg kweleg, folo-folo nea waruhuk, boruk kamin. Ap Ebulus mel, Pudes mel, Linus mel, Klaudia mel, ne, Allah omaliki mel, abirangge en dang-habehesa o.

²²Tuhan hinim wereg ma, fahat-husug laruhu o. An Paulus en balihi.