Read Ninia Yali TITUS 1 Bible Online

TITUS 1 - Ninia Yali bible

TITUS 1

¹ Namloho Titus yei! Nit abirangge wene demdoho boruk kahe anyo fam, namloho ebe on hat deg ma, it ap homi Allah en momal-enepsi on enenda demdoho boruk wene anyo saharuruk kaheg, ne, nit wene wauk kahe anyo, “Su demdoho hihi,” ulug, beheg, dukwag ulug, an Paulus Allah en Yesus Kristus amingming angge apdoho ayonggo mon-enepuk on rasul unduhuk nobahasi anyo en, hweag-hirihi. Allah seiale uruk eleg, demdoho neg uruk on anyo en, “Mundoho eneluk welamuhup,” ulug, o su wal-duk fug angge wenggeloho febag anyo, nabukwag ulug, nenda ebereg wereg lit, hweag-hirihi. Nenda ebereg wene ai re walhilmu wenggeloho febag famen, “Ai salim enam aruhu,” bebag anyo, an ketia ebe wene hweag-esauk kamag ulug, nenahap wendatuk on Allah en unduhuk nobahasi anyo hweag-esauk kweleg, wene neneluk nenebuhu wene ai inim hweag-esauk fam enam atsi. Nenakni Allah nenahap wendatuk on Kristus Yesus enenda hundig en og-hereheg, henda hambukdoho fano welamag ulug, habeheg, duruk kamag.

⁵An duk fug angge waharihik anyo deheg, ne, o sili domog ekema ekema Allah omaliki hwalduk kamag ulug, “Ap ai on unduhuk fesehun,” ulug, hweag-hitihik anyo unduhuk feseheg, duruk karuhun en, hat o Kreta etma wereg kweleg, an waharihik anyo.

⁶ Allah omaliki hwal-enepuk on unduhuk fesehun anyo re, ap homi enele enobam foruk eleg on halug, enohwesi misig neg oho on[1] halug, enomaliki endag-enepswa on anyo, ap homi en, “Ap su enomalikisi en we hesangge dil lauk kwit, enesingasi enaknisi enele sahaloho foruk famen, komo-enepuk eleg,” uruk eleg on, enomaliki Allah wene demdoho bolug duruk on halug neg, unduhuk fesehun fano.

⁷It ap homi fahat-enesug lamuhup on ai re, Allah eyabuk hwalduk on deg ma, siag duruk halug, ap homi enele enobam fesouk no, fano neg dil lauk kamag. It wenggelduk on neg dela beheg, enolok folo-folo wilibeheg, ahalue wenenebo duruk on homoroho nenggeg, yeik yabeheg, ap homi eneuang hwelakoho lal-enebeheg, ap ai on duruk on halug de, unduhuk fesouk fug.

⁸Ite, ap bobag esag-enepuk on halug, fano duruk ale ahayeg boruk on halug, enda wereg on halug, siag duk fug angge mun fano halug, Allah wene furebelug duruk on halug, duk ale neg duruk kweleg, enda hambuk debelug, bok atuk halug, ap ai on unduhuk fesehun fano.

⁹Wene wirik wene ai, it holduk on demdoho boukwag ulug, melaloho hweag-eseheg, ebe wene wauk ale enerim boruk anyo wowag ulug, wene hwaloho hweag-eseheg, duruk kamag ulug, ebe wene anyo fam nenenda dip-debelug wauhuk ai, it higitdoho enenda dip-debelug, bug-bagdoho foroho halug neg, unduhuk fesehun fano.

¹⁰Wene, “Yu o!” ulug, wenggeluk fug angge wereg lit, enele ahalue dep-dep il noruk kaheg, ap homi lal-enebeheg, duruk ai re, it enebe humdoho famen, it enahap baleg on demdoho bousa anyo neg de, alongdoho duruk on it.

¹¹It ap ai enenggali aikoho angge fahet, di angge su angge hwelahuk ulug, wene hweag-esa fug on famen hweag-hesauk kwit, ap eke owe aut inim abirangge enebusel sahal-fahal enebil lauk mu, enele mun elehapdoho fesein.

¹²Ap ai on suni felalduk on eke en uruk kwit, “It ap o Kreta seiale uruk kwit, maro omamne en senggel-enepuk hag duruk. Enenggik koreg lit, enambilik nauk ale neg, singsinga deg enap wereg,” ulug,

¹³felalsi anyo re demdoho felalsi. Aireg ma, it ap ai, wene demdoho bousa anyo mun hambukdoho foroho lit, welamag ulug, ap homi Yahudi enewene indip bilingguruk on inim, it ap Allah uruk wene embeselug, enenda hesangge wenggele folug,

¹⁴“Diroho dahup airoho dahup,” il noruk wene anyo mel, “Furebehup ousa,” ulug, hele omamne fam mun komo-enebin.

¹⁵It ap homi enenda fano wereg on halug, it inilmu di angge su angge fano neg hauk. Ne, it demdoho bouk fug angge siag neg duruk on ai, duk ale enendama wenggelduk ai siagdeg ma, it inilmu di angge su angge siag on neg hauk.

¹⁶It ap ai seiale wene uruk kwit, “Allah neneluk o,” uruk famen, it dil lauk fam, “Allah nenerim,” boruk kwit, uruk ale enegdeg ma esauk kahe. Allah wene holuk fug angge sahaloho feil lauk kwit, fano eke duk fug alereg ma, siag neg duruk mu, ahaye enepuk kamul.