Read Ninia Yali FILEMON 1 Bible Online

FILEMON 1 - Ninia Yali bible

FILEMON 1

¹An Paulus Kristus Yesus wene hweag-isil lauk kahi anyo fam sabu het-napswa ma, wereg lit, nare Timotius ninim en hweag-humuk. Hat Filemon nenere ninim duruk kahen on inim,

² Yesus omaliki hat hobam kabog-duruk on inim, hwe Apfia nenerek mel, weim anggen hereroho yapuk hag, ap Arkhipus Allah eyabuk duruk anyo hinim, hit abirangge dang-henepuk kahe.

³At nenakni Allah Tuhan Yesus Kristus inim, enenda hundig en og-heseheg, henenda hwerie henobahakeg, duruk kamag ulug, somban uruk kahe.

⁴Filemon ahwi! Hat Allah omaliki henda hundig enepuk kahen ale mel, ne, Tuhan Yesus demdoho boruk kahen ale mel, an holduk kahi mu hundig-hundig somban uruk kwit, nakni Allah dang-duruk kahi.

⁶Hit demdoho boruk kahep fam Allah omaliki hinim welahep on henenda misig debelug wereg lit, “Airoho napsi,” ulug, fag-fag atuk kahep fam, Kristus hinim hundig lit, fano on debesehuk boruk anyo, ekenim heneluk amuhup en, somban uruk kahi.

⁷It demdoho boruk on Allah omaliki henda hundig en debeseruk kwit, enenda fanoap debeseil lauk kahen fam, nenda hwerie nobaharihin mu, nahayeg humon boruk kwit, dang-habihi, nare.

⁸Aireg ma, an Kristus ninim hundig lit, howe anyo en, hat eke duruk karuhun ulug, nele omamneroho hweag-hom ale fano famen,

⁹hat an nenda hundig humon wereg ma, nele sakoroho hweag-hom ale napuk. An Paulus anyo ap mun sobal atihik on.[1] Ne, Kristus Yesus ele walug yonggo lauk katihik fam sabu het-napswa ma, ketia suma wereg ma,

¹⁰ at Onesimus enda Kristus obam dip-debesi mu, ebe an namloho hag aheg, an at akni hag aheg, duruhuk. Duruhukdeg, at ebe wahun en ulug, hweag-hutuk kahi.

¹¹Atam, at hinim dil lauk ale alemaroho deg latsi famen, ketia neg de, hat oho, an oho, ninim duk ale mun fano atsi mu, hauihik mu, ulug, hweag-hirihi.

¹²Ketia hea wamag ulug, hakit mondorik wahi ai. Ne, at ebe waharuk kwit, an nenda inim lit-halug waharuk.

¹³An Fano Wene hweag-esauk katihik fam sabu hetdoho kwelap-enepukmu suma welahi mu, at hat hobalma an ninim fahat-nusug welam ale fano famen, ninim welaruhu fano berihik famen,

¹⁴hat akni anyo en, “Yu o,” hweag-nutuk eleg ma, fano nobahakuk berihin halug, hendan bolug en, “An nabuk hag,” nele omamne fam hweag-hitmin fug.

¹⁵Ketia hat hakit waharuk ai, ap enamingming angge hag waharuk de fug. At atam longgo isi ai, we nukoho misiham hag hobahalug longgo isi ane? Ne, ketia neg de, hat hare enda hundig humon welamag ulug waharuk mu, mundoho mundoho wakiyug. At ninim ai, nenda mun hundig famen, hat hamingming angge deg ma, ne, at oho Kristus ninim nenenda hundig wereg lit, hea waruhu mu, fotog-ha fug, nare.

¹⁷Aireg ma, hat ninim higitdoho demdoho boruhuk mu, “Nare Paulus at,” ulug, an hobam og-nabuk ale boruk kahen anyo hag, at oho wakiyug.

¹⁸Atam hinim wereg lit, eke siahap habeheg, hangge eke weheg, disi halug, at hweag-om fug. An nonggwareg deg ma, an at hweag-nuruhun.

¹⁹“At Paulus en hweag-utuk eleg kweleg, lisu balsi,” behen ha no, wene misig ai, an nonggwareg nenggik fam neg lisu balihi. An den wene hweag-hitihik fam henda demdoho berihin ai, nombaleg angge hag hobam wereg ma, eke su inim hobam fele fug famen, fehi.

²⁰Yehei, nare. Hweag-hitihik ale demdoho duruk kahen halug, “Su Allah en enda wenggelfag fam duruk,” bolug, nenda nahayeg nabukwag ulug, at ebe wakiyug. Ninim Kristus omaliki neg welahe ma, nenda aho ware nobahaukwag ulug, hweag-hirihi.

²¹An lisu balduk kahi su anyo neg duruk karuhun bolug, hweag-hirihi fug. Ite, foma hat henda hundig en wenggele folug, ekenim ebenaheg duruk karuhun ai boruk kwit, hweag-hirihi.

²²Wene hweag-hirihi ai, duruk kwit, hit an nobahet somban uruk kahep anyo Allah esanggo hole folug, an henekit waruhuk en, holuhu demdoho boruk kahi mu, og-naplug watlug, nohokuk en o eke fik-fouk nobaharuk kamin.

²³ Ap Epafras Kristus Yesus wene hweag-esauk katsi fam sabu hetdoho kwelap-enepukmu suma ninim wereg lit, dang-hapuk.

²⁴ Ne, an nautsi ninim duruk kahe on anyo, ap Markus mel, Aristarkhus mel, Demas mel, Lukas mel, nit mundoho en dang-hapuk kahe.

²⁵At Tuhan Yesus Kristus helaheg en fahat-husug laruhu. An Paulus Timotius ninim en mun hweag-herehe, naut. An Paulus en balihi.