Read Ninia Yali IBRANI 1 Bible Online

IBRANI 1 - Ninia Yali bible

IBRANI 1

¹Endam atam at Allah en nenombasi at enda boruk ale eneluk amag ulug, hweag-esauk kwit, it Allah wene hweag-esauk katfag on nabi omano fam, eke salim eheg, ai en eke salim eheg, eke diroho deheg, suroho deheg, humdoho duruk kwit, nenombasi anyo wene hweag-esauk katfag famen,

²ketia o ahae fotogdoho su fam at Allah en Amloho fene en nit hweag-nesasi. Ne, Amloho anyo fam, at Allah en di o su o di angge su angge mundoho wal-debag. Eke, at Allah en, “Di angge su angge mundoho Namloho en onggwareg hwalduk kamag,” ulug, eneko unduhuk febag.

³Amloho anyo en, Allah ebe leho lit, seleg helag-felag angge hag duruk ai deheg, ne, Akni ebe obabut higitdoho neg deheg, duruk. Ne, Amloho anyo aireg lit, di angge su angge wal-debag anyo mundoho at ele omamne fam foroho lit wereg. Ne, aren di siag su siag nit duruhuk inim, duhuk anyo inim, mundoho horoho elehapdoho fesoukwag ulug, debesesireg, “An mun debeserihikdeg hwalduk karuhuk ulug nonggwareg unduhuk nobahasi,” ulug, at boholma lendi leho lit, mun along wereg Allah enggik bekit fil lehoma hweria atsireg, wereg.

⁴Ai disi halug, Allah enggik bekit fil hweria atsi ai halug, it boholma yonggo mon-enepuk on malaikat omano enunuk sebeleg hag deg kweleg, Amloho unuk leho wereg hag, it malaikat sebeleg kweleg, Amloho anyo mun leg atsi.

⁵ Nunggwelug? Ite, at Allah en uruk kwit, “Yoho an den endag-habihi angge re, hat de an Namloho welahen,” ulug, airoho malaikat fahet eke ebag fug.

⁶ Ite, Allah en Amloho wandeba on o kwenangma suma mondorik waikoho lit, Allah en uruk kwit, “An namingming angge boholma yonggo mon-enepuk kahi on malaikat omano mundoho en at Namloho mot-duruk kwit, apne wauk kamag,” ebag.

⁷ Ne, at Allah en it boholma yonggo mon-enepuk on malaikat omano fahet uruk kwit, “An Allah en nayonggo boholma mon-enepuk kahi on anyo o hol hag lauk kamag ulug debeseheg, ne, namingming angge indok ambulbul ulog duruk hag duruk kamag ulug debeseheg, duruk kahi,” ebag famen de,

⁸ at Amloho anyo fahet neg uruk kwit, “Allah ao! Hunuk bogdeg lit de, di ap su ap hapma wereg kweleg, mundoho-mundoho leho welaruhun.[1] Ne, it hapma wereg on[2] enewene henda mun wenggeleg fam neg dipdoho biling-esauk karuhun.

⁹It enenda wenggeleg fam dipdoho neg duruk esalug de, henda deheg, ne, wene melale feseruk kweleg, sahaloho folug siag duruk esalug de, herim beheg, duruk katihin ai fam, hat oho, Namloho, it ap homi enahayeg deg lit, ap unduhuk feseruk kwit, ununggulmu ahalue hililduk anyo hag, an Hakni Allah en nahayeg hobam hobaharuk kwit, hat hori sebeleg kweleg, airoho leho hobaharihik,” ulug, ebag.

¹⁰ Ne, ekenim Amloho fahet uruk kwit, “Hat Namloho enowe Tuhan, o walhilmu kwenang su indip wal-duk fug mu, haren wal-dirihin. Ne, bohol oho hat henggik en neg buhun-dirihin.

¹¹Bohol kwenang inim ai sum mining atuk mu, embeseruk hag, ai higitdoho eleg aruhu famen, hat neg de heitog mundoho welaruhun.

¹²Sum siag atuk halug, hwililipdoho embeselug, obalma keron ahamdoho wan-dauk anyo hag, bohol kwenang su, airoho aham-debehun famen, hat neg de mun heitog aham-duk fug angge welahen on deg ma, mo lahakeg wambeheg duruk kweleg, mundoho holuk welaruhun,” ulug, ebag famen,

¹³ “It hinim weim kahaleg on haselei on al bereloho hapma fesouk fug kweleg, hat ninim leho welamuhuk en, nenggik bekit fil huraik watmihin,” ulug, ebag ai, Allah en it malaikat eke misiham airoho hweag-etfag fug. Ite, Amloho neg de dukwag ulug hweag-etfag ma, hauk kahe.

¹⁴Ai halug, it malaikat mundoho ai keroho ulug wereg behep? Eleg, ite, iren ap homi eneheime ninil hauk kahe fug on anyo hag wereg lit, Allah obahet duruk mu, ap homi enahap wendat-enebuhu en eneko fesesi anyo, let-enepuk kamuhup ulug, Allah en yonggo mon-enepuk.