Read Ninia Yali IBRANI 10 Bible Online

IBRANI 10 - Ninia Yali bible

IBRANI 10

¹Allah en wene melaloho Musa hweag-etfag anyo dil lauk ai, ebe on fug kweleg, we fobik Allah en nigon fanoap nenebuhuk bebag ale anyo ahut wal-heheg duruk mu, di tahun su tahun sapi kambing waroho hundig-hundig Allah og-ereheg neg, duruk famen, it Allah obahet dul ulug, wam waroho og-irik lauk anyo fanoap enebuk fug alereg kweleg duruk.

²Fanoap enebuk alereg kweleg duruk kalep man, wam waroho Allah og-utuk ale mun debelug, fobik eke duruk kalep fug. Ne, it ap homi en wam waroho Allah og-utuk kwit de, “Nenesiag anyo elehapdoho folug, fanoap nenebeheik,” ulug, enenda seroho lauk kalep man, enesiag ebereg lalep fug famen, sapi kambing enamep fam nenesiag elehapdoho fouk fug alereg. Aireg ma, wam waroho Allah og-ereheg neg duruk anyo fam, ap homi en, “Nenesiag elehapdoho foruk eleg,” ulug, di tahun su tahun hundig-hundig ebereg wereg.

⁵ Ai halug, at Kristus o kwenangma suma wambik waikoho lit, Akni Allah hweag-utuk kwit, “Hat di angge su angge hat hobahet foruk anyo inim, howam waroho og-hutuk anyo inim, hendaman, Nerim, boruk kahen famen, an nebe ap homi enahap hagdoho wan-dowag ulug, fik-foukdoho nobaharihin.

⁶Sapi kambing waroho indok nowag ulug yaleheg, ne, ap homi enesiag elehapdoho foukwag ulug, hobahet wam waroho feheg, duruk ai, hat hahayeg boruk eleg kweleg duruk mu, hauihik.

⁷Ao Nakni Allah! An nobahet, Airoho duhu, ulug, Allah wene fam wereg anyo higitdoho, Hat berihin ale duhuk en, an welahi,” ulug, hweag-etfag.

⁸Kristus en Allah hweag-utuk kwit, “Di angge su angge hat hobahet feheg, wam waroho og-hereheg, sapi kambing waroho indok nowag ulug yaleheg, ap homi enesiag elehapdoho hobahet wam waroho feheg, duruk on mundoho ai, hat hahayeg bouk fug angge herim boruk kweleg duruk,” ulug, hweag-etfag ai, Musa wene melalfag ma, duruk kweleg, ai hweag-etfag.

⁹Ai en, “Hat berihin ale duhuk en, an welahi,” ulug, hweag-etfag. Ai halug, at Allah en it atam duruk katfag anyo elehapdoho folug, obalma fobik amu on duruk karuhu en feik wahasi.

¹⁰At Yesus Kristus anyo en at Allah en at duhu ulug bebag ale higitdoho duruk kwit, at ebe nukoho misiham waratuk kwit, Allah og-itsi ai fam, nit nenesiag mundoho elehapdoho folug, nenebe fanoapdoho Allah obahet neg eneko nenobahasi.

¹¹ It ap imam Yahudi on mundoho likia hupmu hundig-hundig ap homi enobahet duruk kwit, ap homi enesiag elehapdoho fouk fug alereg kweleg, sapi kambing anyo on neg waroho Allah og-ereheg, unduhuk lit, duruk famen,

¹² at Kristus neg de, nit abirangge nenesiag mundoho elehapdoho feikoho, “Enobahet wararuhuk,” ulug, at ebe nukoho misiham Allah og-itsireg, Allah enggik bekit fil huraik lahasi.

¹³Huraik lahasireg, Allah en at aselei on inim minggirig on al bereloho apma sebele fesoukwag ulug, nangno-hauk kwit wereg.

¹⁴Ai halug, at Kristus nenobahet waratuk kwit, ebe misiham katukdoho Allah og-itsi ai fam, nit nenesiag elehapdoho folug, fanoapdoho Allah obahet neg eneko nenobahasi.

¹⁵Airoho nenobahasi ai fahet, at Allah Aheime en hweag-nesauk kwit,

¹⁶ “An Tuhan Allah en fobik duhuk wene nigon keron wenggeloho abug hweag-hesahuk, ulug, ihi su. An den, Diroho diyug, airoho diyug, ulug, nawene melaleg hweag-esauihik ai, ebereg welamuhup en, enendama wenggel-eseheg, ne, it enapeleg am no, enendama lisu hag baloho feseheg, duhuk,” ulug, hweag-nesebag.

¹⁷ Ai en, eke hweag-nesauk kwit, “It Allah wene sahaloho folug, siag duruk esalug, an ebereg welaruhuk fug,” ulug, Allah Aheime en hweag-nesauk.

¹⁸Aireg ma, Allah wene sahaloho folug, siag duruk kahe anyo mundoho apeleg apdoho fesi mu, niren nenesiag elehapdoho foukwag ulug, ekenim waroho Allah og-om fug ale atsi.

¹⁹Aireg ma, nori, nerekwi. Nit Ambe Mun Amu Enegma nenenda seroho lahe ha ale fano atsi.

²⁰At Yesus ebe waratuk kwit Allah og-itsi ai fam, sum bul hwiliroho suknig anyo ilonggo fil, oluk mundoho wereg lit, kwe keron yag-nisil ousa alongdegma etma kwik lasi.

²¹Nit Allah ahainelekwe nenobahet imam leho on fahat-nenesug wereg ma,

²² niren, “Yesus amep fam nenesiag elehapdoho folug, nit fanoapdoho nenobahasi,” ulug, nenenda se aheg, ik il wirik on fam nenebene horoho nenobahakeg, nenepsi mu wereg lit, nenenda bekit atlug, Yesus obam nenenda mun hambukdoho dipdeg lit, Allah akit horog aik kukohon.

²³Allah en, “Airoho henebuhuk,” ulug, wene abug hweag-nesebag anyo dipdoho duruk mu, airoho nenebuhu wene demdoho bolug, ebereg lit, fag-duruk kahe ai, embesouk fug angge bug-bagdoho foroho welamul.

²⁴Ne, nit nit nenda hundig boruk kwit, let-let deheg, fanoap debeseheg, duruk kamag ulug, nenenda aho wat-wat atuk kamul.

²⁵At Tuhan waruhu salim horog aik waharuk nenelukdeg ma, it ap homi foman nit Allah wene uruk mu, ninim kabog-duruk eleg anyo hagdoho duk fug angge, kabog-duruk kwit, ekenim nenenda ngetdoho aho waroho komo-komo atuk kamul.

²⁶Nit ebe wene neneluk atlug en, deg kweleg, siag duk ale nenenda wenggele folug dil lauk nesalug, nenesiag elehapdoho foukwag ulug, amu on eke waroho Allah og-om fug alereg.

²⁷ Aireg ma, Allah en nit ayo wiroho ene nenobahalug, siag onggo nenamelmel nenepuk on nenobam nenobahakeg, indok olok nigon fam at Allah inim minggirig wereg on elehapdoho fesehu anyo nit nim nenobahakeg, nenebuk no ulug, nenakoldoho welamul.

²⁸ Ap eke Musa wene melaleg anyo sahaloho folug duruk halug, ap biren henahan en, “Airoho duruk mu hauhuk,” uruk esalug, ap anyo elaheg bouk fug angge, waramag ulug, waroho foruk katfag.

²⁹ Aireg ma, ap eke en eyog en al bereloho foruk anyo hag, Allah Amloho seram beheg, Allah wene abug hweag-nesebag anyo demdoho boukwag ulug Yesus amep hililsi anyo, along eleg beheg, at nenelaheg en fanoapdoho nenobaharuk on Allah Aheime anyo inim siahap biahapdoho feheg, duruk halug, Allah en embesehu behep? Mun eleg! At siag disi higitdoho Allah en siag onggo mun nigon obam foruk karuhu boruk nu!

³⁰ “Ap siag duruk on fahet amororo wauk ai, hiren fug famen, an den neg debesehuk,” ulug, ebag inim, ne, eke, “An nomaliki enawene bilinggoho ayo wiroho en-enebuhuk anyo, Enakni Tuhan an den neg,” ulug, ebag anyo inim ai, ebe misig Allah anyo neg ebag nenelukdeg.

³¹Allah oluk wereg anyo en nit siag duruk mu, enggik en wat-nenebuk no, nenemelmel boruk kamul.

³²Hit atam Allah wene holduhupdeg henenda ket selehap henepsi mu wereg kweleg, anggin-fanggin alongdoho henobam henobaharuk kweleg, henenda hambukdoho wereg lit, wauk katuhup anyo, ebetuk kamek.

³³Hit foma hummen henunuk siahapdoho bilip-henebeheg, siahap biahapdoho henobahakeg, henepuk katswa. Ne, it foma airoho enepuk mu esalug, “Nit it ninim nenebukwag,” boruk kwit, inim seberul ulug duruk katuhup.

³⁴Henori foma sabu hetdoho kwelabe feserukmu welatswa anyo enelaheg boruk kwit, let-eseheg, ne, henangge deloho herahausa halug, “Nit de nenengge amu fano on mundoho welaruhu on ekema wereg neneluk,” bolug, “Hwelowag fano,” ulug, henahayeg beheg, duruk katuhup.

³⁵Ai halug, ketia siahap henepuk kweleg, wene demdoho bolug wauhup anyo henenda hambukdeg lit, foroho welahep halug, onggo humon hwelahup angge re, embesouk fug.

³⁶Allah en boruk ale furoho duruk kahep halug, hit og-hesahuk ulug, abug hweag-hesebag anyo hwelahup en, siahap henepuk kweleg, henenda hambukdeg lit, wauk kamek.

³⁷ Allah en uruk kwit, “At waruhu ai re anunuroho welatlug waruhu fug. At folo-folo waruhu mu, it an nomaliki fanoapdoho feserihik anyo, an demdoho boruk kwit, an nobam dip-nobaharuk halug, enoluk mundoho welamuhup famen, it eke en sombandoho embeseruk halug neg de, an nahayeg enobam fesehuk fug” ulug, ebag ale Allah wene fam lisu baleg wereg.

³⁹Airoho famen de, it ap demdoho bolug, ai en sombandoho wene wausa anyo embeseruk halug, Allah en elehapdoho fesehu ai on hag welahe fug. Ite, nit Allah demdoho boruk kahe halug, nenahap wendareg on welahe.