Read Ninia Yali IBRANI 11 Bible Online

IBRANI 11 - Ninia Yali bible

IBRANI 11

¹Nit Allah nenenda demdoho boruk kahe ai ebe re, nit di angge su angge nenenda dipdeg wereg anyo, dik-demdoho dip-uruk mu, hahuk, beheg, ne, ninil hauk kahe fug famen, ebe demdoho wereg, ulug, beheg, duruk kahe ai.

²It atam nenombasi anyo, Allah hweag-esebag wene anyo, demdoho neg boruk mu, esalug, Allah en ahayeg enobam feseruk katfag.

³ O bohol kwenang anyo ninil halug, at Allah en at ele fam wal-debag demdoho boruk kahe. Ai halug, ninil hauk kahe anyo, ninil hauk kahe fug on famen Allah en wal-debag boruk kahe.

⁴ At ap unuk Kain anyo en angge Allah obahet feik watfag anyo siag hag kweleg, at Habel neg de, Allah demdoho boruk kwit, angge waroho Allah obahet feik watfag ai, Allah en fano bolug, wauk kwit, ahayeg obam febag. Ne, at Habel ebe waratfag famen de, enda Allah demdoho bebag ai, “An diroho dirihik,” ulug, hweag-nesauk hag wereg.

⁵ Ap Henokh mel Allah demdoho bebag fam waratfag fug. Ite, Allah en oluk kengge boholma walug lahabag. Ne, Allah en walug lahabag ma, ori en at ebe hweahabag fug. Walug lahauk fug mu, “Allah ahayeg howag ulug duruk katfag,” ulug, Allah wene fam lisu baleg.

⁶Ne, Allah demdoho boruk eleg halug, Allah ahayeg ha on duk fug alereg. Di ap homi su ap homi Allah akit horog aik laul boruk anyo en, “Allah demdoho wereg, ne, aren nit at heraril lauk kahe nesalug, onggo og-nesahu,” ulug, demdoho boruk kwit, akit lauk kamag.

⁷ Ap Nuh mel, Allah en “Fobik airoho duhuk,” ulug, husumbi hweag-etfag anyo owan enam am fug mu, ha fug angge wereg lit, “Su demdoho duhu en hweag-nereheik hihi,” ulug, akol boruk kwit, ohwe omaliki inim enahap wendarukwag ulug, e kapal witfag. Allah demdoho boruk kwit debag ai fam, it ap homi siag duruk on Allah en siag onggo fesehu ulug, enoluk apdoho fesebag. Ne, at Nuh neg Allah demdoho bebag ai fam, Allah en at Nuh fanoapdoho febag.

⁸ Ne, at Abraham mel, at Allah en, “Kwenang eke hat hwalduk karuhun en og-huruhuk mu, lakin,” ulug, hweag-etfag ma, at Abraham wene ai hole folug, “Hweag-nereheik ai higitdoho og-nuruhu,” demdoho bolug, “O ai kema lahuk?” ulug, apeleg deg kweleg, obam en wilip-atfag.

⁹ “Kwenang eke og-huruhuk,” ulug, abug hweag-etfagma etmano kwik waharuk kwit, “O su re fug. Allah en o sili amu on eke anduli belabeg kweleg, mundoho welaruhu on wal-duhuk enda wenggele folug, wal-debag anyo, an hwalduk karuhuk en og-nuruhu,” demdoho bolug, nangno-hauk katfag. Ai en, Ishak Yakub inim oho hwelowag ulug, abug hweag-esebag ma, it inim ap bohon hag, o sabo kemah wireheg duruk kwit, da nohweil, ya nohweil, dil noruk katfag.

¹⁰

¹¹ At Abraham sobal deg kweleg, ohwe Sara ibili welatfag ma, omaliki enderuk fug alereg kweleg, at Abraham endaman, “At Allah en uruk ale dipdoho duruk mu re, abug hweag-nitsi ai neg nabuhu,” ulug, demdoho bebag ma, omalik enderukwag ulug, Allah en debebag.

¹² Abraham Allah demdoho bebag[9] ai halug, at ap misig anyo en, omalik enderuk fug angge wareg hag welatfag famen, ombasi re sohwalanggen boholma humdoho wereg anyo inim, ik laut inggi wenahauk fug aleroho wereg anyo inim, hagdoho at Abraham ombasi saha ebag.

¹³ It ap Allah en, “Kwenang eke og-hesahuk,” ulug, abug hweag-esebag omano mundoho en, demdoho boruk kwit, “Nit nenobam o kwenangma suma femdoho welahe fug. Nit ap bohon hag neg welahe,” ulug, fag-dulug, laulmu o yatman fu hauk kwit, nenahayeg boruk kahe anyo hag, iren wene anyo dip-uruk mu, ha fug angge warail lebag famen, “Og-nesahu,” ulug, demdoho bebag ai fam, o ebe on yatman fu hauk kwit, enahayeg boruk katfagdeg, warail lebag.

¹⁴Ap homi airoho uruk fam, enenggwenang amu ketma welamuhupmu nangno-hauk kwit, uruk, enegdeg ma esauk kahe.

¹⁵It ap ai, enobam indipmen embeselug, wilibik watfag anyo, enenda meneni wenggelduk kalep man, enambol somban debelug, enobam indipmu la ale deg lalep famen, airoho bebag fug.

¹⁶Ite, it enendaman, “Nit nenobam ebe on boholma hwelag lela e!” bolug, warail lebag ma, Allah en it enenda bebag higitdoho enobam ebe on o kota enobahet fik-foukdoho fesebag ma, Allah en, “Iren, Allah Nenakni, ulug, hweag-nutuk halug, nenggali eleg,” boruk.

¹⁷ Allah en Abraham abut balmin ulug, hweag-utuk kwit, “Hamloho an nobahet waroho indok yalin,” hweag-etfag ma, at Abraham en, “Hat hamloho Ishak su famen, hombasi humdoho saha uhup, ulug, hweag-nitsi,” ulug, demdoho bebag famen, “Allah en ap waratuk men, enoluk apdoho unduhuk fesouk alereg ma, airoho oluk apdoho unduhuk fohu,” ulug, boruk kwit, “Namloho ilahambi su deg kweleg, Allah obahet warikohon,” bebag ai halug, wal-heheg, Abraham en amloho Ishak anyo Allah og-etfag man, Allah en oluk apdoho unduhuk febag ma, wareg mangge webag ma hauk kahe.

¹⁸

¹⁹

²⁰ At Ishak en oho Allah demdoho boruk kwit, “Fobik Allah en fanoap henepuk karuhu,” ulug, Yakub Esau inim wene abug hweag-esebag.

²¹ Ne, at Yakub oho waratmin ulug duruk kwit, “Allah en duhu wene hweag-nesasi anyo duhu neg,” ulug, demdoho bolug, Yusuf omaliki enemu hundomog ahayeg enobam fesebagdeg, andomuk fam dimireg lit, Allah unuk mot-debag.

²² Ne, Yusuf oho waraikohoreg ma, Allah en wene hweag-esebag anyo demdoho boruk katfagdeg, hweag-esauk kwit, “Hit Israel on o Mesir oma welamuhup fug. Wilibik lahup angge re, wilibik lauk kwit, an nowag inim walug lahup,” ulug, oluk wereg lit, wene demdoho bebag fam, wene melaloho hweag-esebag.

²³ Musa akni isinga mel, Allah en ebag ale demdoho bolug, enamloho Musa endag-atfag ma, ebe orohole mun fano hebagdeg, ap enowe raja anyo en enomaliki doron enowarukwag ulug, wene melalfag anyo fahet enakol bouk fug angge, bigalem henahan enam dauk kweleg, herako foroho latfag.

²⁴ Ai en, fobik Musa anyo sauwe atfagdeg, Allah demdoho bebagdeg, “Nakni raja ahaloho anyo amloho hweag-nom ale an nerim,” bebag.

²⁵Ne, aren, “Ap siag duruk kwit, enahayeg wereg on enapma welaruhuk ai nerim. Ite, it Allah omaliki anggin-fanggin enobam feseruk anyo, an inim nobam nobaharuk kamag,” bolug, momal-debag.

²⁶Aren, “Fobik Allah en onggo og-nuruhu,” ulug, ebereg lit, “O Mesir di angge su angge obam loukdoho wereg su, along eleg. Ite, Kristus obahet duruk mu nunuk siahapdoho bilip-napuk halug ai, along!” ulug, wenggelduk katfag.

²⁷ At Allah ninil hauk kahe fug on, at Musa en il heheg hag debag ma, enda mun hambukdeg lit, Allah demdoho boruk kwit, at ap raja Mesir on olokdeg kweleg, akol bouk fug angge, o Mesir en embeselug, wilibik watfag.

²⁸ At Allah en ap homi enomaliki wandeba on enowatil lauk kamag ulug mondorik watfag malaikat anyo en it Israel on inim enowaruk no ulug, at Allah en hweag-etfag anyo, at Musa en demdoho bolug, soni Paskah esetuk kwit, sok foma-foma domba amep are deboukwag ulug melalfag.

²⁹ Allah demdoho boruk kwit, kwenang iringgig kwe lauk hag, it Israel on anyo ik yenggeleg Laut Merah nindig-atfag famen, it Mesir on en airoho nindig-amul ulug debag man, ik anyo en sal-enepfag.

³⁰ Allah demdoho boruk kwit, o Yerikho mase-mase lauk kwit, nukoho folfaligen debelug sabit angge lauk kweleg, helep fag wirig anyo meiyal-heg wambebag.

³¹ Hwe hambena on unuk Rahab mel oho, Allah demdoho bebagdeg, it ap o anyo inil lowatil lebag anyo, enda fano en dangdoho og-enepfag ma, fobik it ap Allah wene sahalfag on enowatuk kwit, at ili webag.

³² Ne, it ap Gideon mel, Barak mel, Simson mel, Yefta mel, Daud mel, Samuel mel, it Allah wene hweag-esauk katfag enap nabi mel, it mundoho airoho neg Allah demdoho bebag fam, along hag duruk katfag anyo, bilinggoho hweag-hesa ale fano famen, anunu am alereg ma embeseikohon.

³³ It ap ai, Allah demdoho bebag fam, it ap enunggul unuk amu on inim, dog apuk kwit, sebele feseheg, Allah enda boruk ale higitdoho neg dil lauk mu halug, Allah en abug hweag-esebag wene anyo dip-uruk mu weheg, olomene olok on singa omano en senggel-enebuk no ulug enambilik dopno-debeseheg,

³⁴ indok ambulbul olok humon deg kweleg, nahul-fahuldoho feheg, karog yaron fam enowatul ulug debag famen, iren ohwale fahat-dalug longgo eheg, maben atuk kweleg, enomamne apdoho feseruk mu heheg, ne, sehen anggen atlug, dog apuk kwit, ap enunggul unuk amu on sehen foroho enap muko wilibe feseheg,

³⁵ it homi foma enomaliki waratuk men, enoluk apdoho og-enebeheg, dil lauk katfag. Ne, it foma neg de, “Fobik nenoluk mundoho welamuhuk en unduhuk nenobahaku angge re, ninili oko fotog-nesa fug,” ulug, boruk kwit, enenda mun amu hag sahal-fahaldoho enowatuk kweleg, waraheg,

³⁶ it foma enunuk siahapdoho bilip-debeseheg, lal-fisog enowareheg, it foma bosie sabu fam enenggik eneyog het-debeselug, hetdegma kwelabe feseheg,

³⁷ it foma helep fam obagdoho enowareheg, foma gergaji fam enobahare kongdoho feseheg, foma karog yaron fam enowareheg, foma enesum eleg en domba kambing enahap fungguloho enesum hag wan-debelug, enenggik eleg angge noruk kweleg, ap enolok en, “Ap su siag,” ulug, siahap-biahapdoho lal-fal debeseheg, duruk katfag.

³⁸Ap su mun fano deg ma, kwenangma suma ap homi siag on enenggelegma welam ale siag deg famen, deg kweleg, o lei kwe inim, dom kwe inim, longgo il noruk kwit, “O kema nohouk?” ulug, bohwe elma inim, owikmu inim, hesangge nohweil noruk katfag.

³⁹It ap ai mundoho Allah demdoho neg boruk kwit, dil lauk katfag fam, Allah en, “Ap su fano,” ulug, bebag famen, at Allah en nit owan deg ma nesalug, it atam fanoapdoho fesehuk bebag fug. Ite, it nit ninim ambine fanoapdoho nenobahakuk fano atam wenggeloho febag ma, wene abug hweag-esebag anyo, owan dip-uruk eleg kweleg, wa fug men warail lebag.