Read Ninia Yali IBRANI 12 Bible Online

IBRANI 12 - Ninia Yali bible

IBRANI 12

¹It ap demdoho bolug, duruk katfag on ai, “Nit duruk katuhuk anyo hagdoho duruk mu esahuk ane, eleg a?” ulug, enebe humdoho maseroho inil kwelap-nenesug lit wereg ma, kwe buroho lauk kwit, nit nenowag sa uk no, di angge su angge nenobam sahalireg wereg anyo inim, ne, siag on deg kweleg, duk ale nenendama nenepuk kwit, salog-kwalog angge hag wereg anyo inim, mundoho embeselug, “Buroho ai hwili inaik lauk kamek,” hweag-nesasi anyo, nenenda hambuk debelug buroho inaik lakohon.

²Ne, nit Allah demdoho boukwag ulug atam nenendama fik-foukdoho nenobahakeg, ai en, nit wene demdoho boruk mu halug, demdoho boruk kamuhuk en ulug fanoapdoho nenobahakeg, duruk on Yesus anyo neg, ninil en walug at mutlug lauk kamul. Ap e salib fam dopnoroho ware feseruk halug, “Ap ai mundoho siag,” ulug, enenggali wat-enepuk anyo hag, at Yesus en, “Airoho nabuhup nerim,” bouk fug angge, “Fobik nahayeg humon hahuk en, ketia dorangge elamna airoho nabuhup fano,” ulug, enda hambukdeg lit, bok wereg kweleg, e salib fam dopnoroho watswa ma, waratsireg, oluk atlug, Allah wene melale nenobaharuk kwit, fahat-nenesugmu etmano Allah enggik bekit fil huraik lahasireg wereg.

³Hit henenda fituk kwit, Allah demdoho boruk kahep anyo fotog-esehep ha no, ap siag duruk on anyo en, Yesus mundoho enerim boruk kwit, enolok en siahap debeheg duruk kweleg, at enda hambuk debelug bok wereg lit, wauk katsi ale fureberuk kamek.

⁴Hiren siag sebeloho foul ulug duruk mu, hit henemep wiliboho henowatswa fug on welahep.

⁵ At Allah en, “Hit an nomaliki,” ulug, henenda aho waroho hweag-hesauk kwit, “An Tuhan en hit nenda hundig henepuk kahi anyo, henenda wenggelukwag ulug, komo-henebeheg, ne, hit, An nomaliki, ulug, og-henepuk kahi anyo, siag duruk mu, yeik henowareheg, duruk kahi. Aireg ma, namloho, an Tuhan en komoroho hwal-hapuk kweleg, henda furebahat-deheg, Siag dehen, ulug, bet-hapuk kweleg, henda firuk fug angge weheg, duruk kamin,” ulug, ebag anyo hit henapeleg atsi behi.

⁷Doron enenda wenggelukwag ulug, enaknisi en komoroho enowatuk eleg on eke wereg fug. It mundoho enomaliki komoroho enowatuk mu, Allah en henenda wenggel-howag ulug, duruk halug, “An at amloho demdoho welahi nealug, enda hundig en napuk hihi,” ulug, henenda hambukdeg lit, wauk kamek.

⁸Nit Allah omaliki halug, mundoho nenenda wenggelukwag ulug komoroho nenowatuk mu, hit eke komoroho henowatuk eleg halug neg de, “Nit at omaliki demdoho on fug, we hesangge ondoho on welahe,” bohup.

⁹Ne, nenaknisi demdoho endag-nenepswa on anyo en, nenenda wenggelukwag ulug, komoroho nenowatuk mu, enenggilug boruk katuhuk anyo hag, at nenenda hwal-nenepuk on Nenakni boholma on Allah ele hweag-nesauk anyo, neneluk mundoho welamuhuk en, nenesanggo holduk kwit, apma sebe ulug, duruk kamuhuk ai fano.

¹⁰Nenaknisi demdoho endag-nenepswa on anyo enendan bolug we elamna komoroho nenowatuk katswa famen, Nenakni Allah neg de, at siag duk fug angge, mun fano eneg wereg on anyo hag, nit inim higitdoho fano eneg welamag ulug, komoroho nenowatuk.

¹¹Nit nenenda wenggelukwag ulug komoroho nenowatuk salim ai neg de, nenendaman, “Fano nenebeheik,” ulug, bouk fug angge, we yehei neg boruk kahe famen, komoroho nenowatuk ale wauk kahe halug neg de, e anggen fano on yihil lauk mu dahanduk anyo hag, nit Allah enda boruk on nenenda wenggeleg fam, fano dil lauk kwit, nenenda hwerieg welamuhuk.

¹² Aireg ma, henowag elek-elek duruk kwit, henenggik omamne eleg henepuk anyo henomamneap dakiek!

¹³ Heneyog ouk henepuk anyo ekenim ouk henebuk no, ite, fano amag ulug, kwe buhundoho yaho on anyo fam neg lauk kamek.

¹⁴Siag on nenendama wereg kweleg, Tuhan ninil hehe ha fug alereg ma, di ap su ap mundoho hinim sebereg lit, siag duk fug angge Allah obahet eneg fano neg welamag ulug, furoho duruk kamek.

¹⁵ Ap homi hiron eke Allah en nenelaheg en nenepuk ale anyo embeselug wilibil lauk kwit, asig angge fehelduk kwit, yaho angge fano on fam asihap deberuk ai hag, ap ai en ap homi mundoho siahap enebuk no, ulug, fureberuk kamek.

¹⁶ Ap Esau anyo en Allah wene sahaloho folug, enda wenggeleg eleg angge hesangge dil lebag anyo hag, hit airoho dil lahep ha no, fureberuk kamek. At Esau anyo en we misiham nauk on eta fahet, wandeba ondoho on akni atuk angge anyo elabo on fam onggo hundutfag.

¹⁷ Ai en, fobik, “Nakni! Hahayeg nobam nobahain abi!” ulug, oba yatuk kwit, akni hweag-ereheg ne kwasikdoho debag ale anyo[10] bekit dimin ulug neg debag famen, enda wenggele folug aham-duk fug ale atfag ma, akni en at ebe embesebag, heneluk.

¹⁸ Nori, nerekwi. Atam it ap homi Israel on Dom Sinai enenggik ki halereg on aldukmu aik watfag hag, hit dom ai hag fam waharuhup fug. Dom ai fam ebe diroho duruk mu, watfag. Indok ambulbul ulog deheg, o mum aheg, o heik aheg, sielu fi dil waheg,

¹⁹ bohweap trompet ele humon fu deheg, duruk kweleg, Allah ele alongdoho uruk kwit, “Wam a, ap homi ane, dom su bal-ha waharuk halug, helep obagdoho enowatuk kweleg, waramag,” ulug, wene ebag ma, it ap homi omano on en enakol en, “Wene ekenim hweag-nesa fug abi!” ulug, ebag.

²¹ Ne, ap homi en enakol boukwag ulug Allah along dil lauk mu, at Musa anyo en oho il hebagdeg, “Nakol en nowag elek duruk kahi,” ulug, ebag.

²²Airoho duruk on fam watfag famen de, hit ketia dom amu on Sion aldukmu, Allah oluk mundoho wereg obam Yerusalem boholma etano, it Allah en mon-enepuk on malaikat omano enebe humdoho weregma aik waharuhup.

²³It atam demdoho bebag fam Allah omaliki wandeba ondoho on hag atfag ma, enunuk boholma lisu baleg enebe enanggilugdoho kabogdegma inim, nit mundoho nenewene bilinggoho ayo wiroho ene nenobaharuk on Nenakni Allah anyo inim, it ap homi fano dil lebagdeg waratfag ma, fanoapdoho fesebag omano inim, aik waharuhup.

²⁴ Ne, Allah il hanim fanoapdoho nenobahaukwag ulug wene keron abug hweag-nesasi mu, nenobahet duruk on Yesus akit waharuhup. At Habel owe en watfag ma, amep hililig on ap unggulmu ap waramag ulug hweag-nesauk hag famen, at nenobahet duruk on Yesus anyo amep hililig ai, nenahap wendat-nenepuk ale fano on hweag-nesauk hag weregma waharuhuk.

²⁵ Ai halug, wene hweag-nesauk su hole folug, embesehep ha no, fureberuk kamek. At kwenangma wereg lit, at Allah en duhup bebag ale anyo husumbi hweag-esebag ma, it, “Nenerim,” ulug, embesebag halug, Allah en it enebe embesebag fug, mundoho enowatfag ma, ketia at boholma wereg anyo en wene husumbi hweag-nesauk kweleg, nit, “Nenerim,” ulug, embeseruk halug, nenebe embesehu behep? Eleg! Nenowaruhu neg.

²⁶ O ai salim Allah ele ebag ai fam o kwenang su neg lang-debag famen, ketia neg de, fobik duhu ale abug hweag-nesauk kwit, “An den eke misiham kwenang su lang-duruk kwit, bohol mel, airoho neg duruk mu neahup,” ulug, hweag-nesebag.

²⁷Eke misiham duhu wene hweag-nesebag ai, di angge su angge lang-duk fug alereg on neg welamag ulug, di angge su angge lang-duruk on wal-debag anyo, misiham lang-duruk kwit, elehapdoho embesehu ulug, unug-nesauk.

²⁸ Aireg ma, at Nenakni Allah anyo, indok ambulbul di angge su angge elehapdoho nil lauk anyo hag wereg ma, nit Allah apma nenobaharukmu etmano lang-duk fug alereg on nit hwalduk kamag ulug og-nesauk halug, nenakol beheg, at anggilug beheg, boruk kwit, at Allah ahayeg boruk ale neg dil, mot-duruk kamul.