Read Ninia Yali IBRANI 13 Bible Online

IBRANI 13 - Ninia Yali bible

IBRANI 13

¹Yesus omaliki, “Nenori,” ulug, henenda hundig enepuk kahep anyo airoho neg duruk kamek.

² It ap homi en Allah ayonggo mon-enepuk on malaikat omano enapelegdeg kweleg, bobag-enepfag ma, it ap homi bohon henekit waharuk halug, dangdoho henobam og-enepuk kamek.

³Nit kwenangma nenap nenahap misigdeg ma, it ap homi sabu hetdegma wereg anyo, “Nit ninim hetdeg welahe hehe,” ulug, ebet-eseheg, ne, it ap homi siahap biahapdoho enowatuk anyo, “Nit oho airoho nenowatuk hehe,” ulug, ebereheg, ebet-enepuk kwit, enelaheg boruk kamek.

⁴Ap eke ohwe hwelowag ulug, sebe-enepuk ale ai siag fug, mun fano deg ma, hit ap homi mundoho en leho foruk kamek. Ne, oho wereg ma, inim nohoruk ai mel fano neg famen, it ap homi hesangge baldil laheg, duhum sauwe on hesangge enebil laheg, duruk esalug neg de, Allah en ayo wiroho eneko siag onggo og-esahu.

⁵ Hit di angge su angge dil noruk kwit, uang neg henenda nil la fug. At Allah en uruk kwit, “An den lin-hesalug laheg, o fotog-hesalug laheg, eke duhuk fug,” ulug, ebag ma, henangge dorangge foroho lahep eta fam, “Eta mundoho wereg,” ulug, henenda hwerieg lit, henahayegdoho dil lauk nu.

⁶ At Allah en, “An den lin-hesalug laheg, o fotog-hesalug laheg, eke duhuk fug,” ebag ai fam, nit nenakol eleg angge, “Tuhan en let-napuk mu, Ap homi en nanggin-nabuhup? an nakol bohuk fug,” ulug, uruk kahe halereg.

⁷It atam Allah wene hweag-hesauk kwit, it henowesi fahat-henesug welatswa anyo, it Allah demdoho bolug, dil lauk katswa ale ebereheg, nangginoho enepuk kweleg, waratswa anyo fu debeseheg, duruk kwit, hit de, ai hagdoho Allah demdoho bolug dil noruk kamek.

⁸Atam inim, ketia inim, fobik inim, at Yesus Kristus amu aham-duk fug angge mundoho eitog wereg.

⁹Di wene su wene amu on nigon hweag-hesa waharuk mu, henesanggo holdil lauk em, og-heneplug la no, fureberuk kamek. It ap homi foman uruk kwit, “Di angge su angge nauk kwit de, diroho diyug, airoho diyug,” ulug, wene melaleg duruk ai fam, enenda fanoapdoho debesouk fug alereg en we alemaroho dil noruk mu, hiren, “Allah en nenelaheg bolug nenepuk ai, along,” bolug, henenda omamne dauk kamuhup fano.

¹⁰It imam Yahudi omano on en, o sabo kemah wire folug, Allah obahet foruk on nauk katfag hag, niren foruk kahe on ai, it ap ai on na wam fug alereg.

¹¹ It ap homi Yahudi enowe imam agung anyo en, ap homi enesiag elehapdoho fesoukwag ulug, Allah owam domba waroho folug, amep walug Ambe Mun Amu Enegma kuruk kweleg, ebe anyo elehet dag fil indok yalduk katfag.

¹²Ai hag, Yesus oho, at amep fam nit ap homi nenesiag elehapdoho folug, Allah obahet neg eneko nenobahaukwag ulug, nenek duruk kwit, o dag fil waratsi.

¹³Ne, at o dag fil nenobahet waratuk kwit, enggali hasi mu, nit inim ai higitdoho nenenggali hahuk en, o dag fil akit seberik lakohon.

¹⁴Nit nenobam femdoho welam on anyo o kwenangma suma wereg fug. Nenobam amu on fobik welaruhu on nangno-hauk kahe.

¹⁵Aireg ma, Yesus nenobahet waratsi anyo inim hundig lit, niren, “Allah Nenakni,” ulug, wam waroho at fahet og-utuk kam hag, di salim su salim nenambilik fam Nenakni Allah unuk humdoho mot-duruk kamul.

¹⁶Ne, airoho uruk kwit, ap homi fano debeseheg, let-enebeheg, duruk kamul. Airoho duruk kamul ai re Allah ahayeg boukwag ulug, owam waroho og-utuk kam hag deg ma, nenapeleg amuhuk fug.

¹⁷It henowesi fahat-henesug wereg on ai, fobik Allah bilinggoho hweag-umuhup en, henenda nanggoho wereg ulug, fahat-henesug wereg ma, enapma sebe ulug, wene hweag-hesauk anyo henesanggo hole folug, furoho duruk kamek! Hit airoho duruk mu hesalug, it enahayegdoho fahat-henesug welamuhup famen, wene hweag-hesauk mu holuk fug angge welahep neg de, enenda hesilduk kwit, “Alemaroho fahat-enesug lahe,” boruk kamuhup.

¹⁸Nenobahet Allah hweag-utuk nu! Niren nenendaman, “Fano bekitdoho neg dul,” boruk kahe ma, di deheg su deheg duruk kwit, siag duruhuk eke ebereg welahe fug mu, nenenda sereg lit, “Fano neg duruhuk,” ulug, boruk kahe.

¹⁹Allah en folo-folo an henekit mon-nabik waruhu en, nobahet Allah hweag-utuk kamuhup ulug, nele ningdoho hweag-hisihi.

²⁰Ne, Allah en wene abug hweag-nesasi anyo, mundoho welaruhu demdoho boukwag ulug, Tuhan Yesus, Allah andomba hwal-enepuk on leho on anyo, nenobahet amep hililsi mu, waratlug lauk men oluk apdoho unduhuk fesi.

²¹At nenenda hambukdoho nenobaharuk on Allah enda boruk ale anyo hit mundoho higitdoho duruk kamuhup en, di angge su angge fano on halug neg lik-loukdoho og-heseheg, ne, Yesus Kristus disi fam nit nenebuhu ale enda ahayeg boruk anyo, nenebeheg, duruk kamag. Kristus unuk mundoho mundoho leho welamag. Amin!

²²Nori, nerekwi neg. An wene dorangge komoroho lisu bal-hisihi mu, henenda fanoroho waluhup en hweag-hisihi.

²³Nenare Timotius o sabu hetdegma welatsi anyo fiselaroho wilibe fousa ma, henelukdoho hweag-hisihi. Ne, at folo-folo nakit waharuk halug, ninim henesa wamuhuk.

²⁴Hit henowesi fahat-henesug on nim, it demdoho boruk on Yesus omaliki inim mundoho, “Aren dang-henebeheik,” ulug, hweag-esakiyug. Ne, it ap henori Italia on inim mundoho oho dang-henebehesa.

²⁵Allah henelaheg en hit mundoho henepuk kamag.