Read Ninia Yali IBRANI 2 Bible Online

IBRANI 2 - Ninia Yali bible

IBRANI 2

¹Aireg ma, nit Allah wene holduhukdeg wauhuk anyo embeselug lahe ha no, ekenim fik-furebelug foroho lamuhuk.

²Ne, at Allah en it malaikat omano fam wene nenombasi melaloho hweag-esauk katfag anyo, embesouk fug alereg kweleg, iren embeseheg, sahaloho feheg, duruk kwit, siag duruk katfag esalug, Allah en onggo mun higitdoho neg debeseruk katfag.

³Ai hag, nit de nenahap wendat-nenebuhu wene mun along on holduhuk anyo, nenenda seram bolug embeseruk halug, nangginoho nenahap wendaroho wilibuhuk behep? Mun eleg! Nenahap wendat-nenebuhu wene ai, atam Tuhan en fagdoho hweag-esauk katsi mu, it enesanggo holswa on anyo en enenda yeik baluk fug angge demdoho neg boruk kwit nit furoho hweag-nesauk kweleg,

⁴“Wene su demdoho,” ulug, wowag ulug, Allah en enehaleroho howag ulug along deheg, enakol wereg on deheg, duk fug on deheg, dil lauk kwit, nenemu domog duruk kamag ulug Allah enda boruk ale higitdoho Allah Aheime en yohwandoho og-nesasi.

⁵Bohol kwenang eleg aruhu mu, obalma o keron aruhu anyo fahet nit uruk kahe anyo, Allah en it malaikat omano en hwalduk kamag ulug enapma fesebag fug.

⁶ Ite, ap eke Allah wene lisu baleg fam uruk kwit diroho baleg, “Yehei, Allah Nenakni! Ap homi nangginig on deg en haren furebeseruk kahen? Ap homi ai ap homi at deg ma, nangginig on deg en haren fano fahat-enesug lahen?

⁷Embeselen man fano famen, haren we elamna it malaikat omano leho wereg kweleg, ap homi sebeleg hagdoho feserihin famen, haren ap homi enunuk bogdeg lit mun leho feseheg,[3]

⁸di angge su angge mundoho hwalduk kamag ulug, ap homi enapma feseheg, debeserihin.” ulug, ebag ai, di angge su angge mundoho nit ap homi nenapma foruk kwit, eke misig nit hwalduk kamek, ulug, ai ebag fug. Ite, mundoho nit nenapma welamag ulug ebag anyo lisu balfag famen, ketia nenapma atuk mu, owan ha fug angge welahe.

⁹Ai famen de, at Yesus neg de unuk bogdeg lit, mun leho fesi mu hauk kahe. At Allah en nit nenelaheg bebag ma, it malaikat leho wereg kweleg, Amloho Yesus en nit di ap homi su ap homi mundoho nenemu domog nenobahet waramag ulug, we elamna sebele fesi mu, humdoho anggin-fanggin hauk kwit nenobahet waratsi ai fam ap eke alili angge lik-loukdoho wan-deberuk anyo hag airoho Yesus unuk bogdeg lit mun leho fesi mu hauk kahe.

¹⁰At di angge su angge mundoho wal-debagdeg, hwalduk kwit wereg on Allah anyo en, “Nomaliki humdoho ninim higitdoho leho welamuhuk,” ulug, nit nenahap wendat-nenebukoho lit, nenowe kwe yako og-neneplug lahu on Yesus anyo abut balduk men, siag duk fug angge mun fano neg howag ulug, anggin-fanggin hauk kamag ulug, bebag ai, fano neg bebag ma, hauk kahe.

¹¹At Yesus en nit nenesiag horoho elehapdoho folug, Allah obahet neg eneko nenobaharuk anyo, at ho-nenepsi on inim, nit ho-nenobahasi on inim, Nenakni misig deg ma, nenowe Yesus en, enggali eleg angge wereg lit, “Nautsi,” ulug, hweag-nesauk.

¹² Nenowe Yesus en Allah hweag-utuk kwit, “Nakni ahwi! Hat duruk kahen anyo an nautsi hweag-eseheg, ne, hat homaliki kabog-duruk mu, enenggelegma wereg lit, mot-habeheg, duruk karuhuk,” ulug, hweag-etfag.

¹³ Ne, ekenim uruk kwit, “An den nenda Allah obam dip-debelug welaruhuk,” ulug, eheg, ne, ekenim uruk kwit, “Allah en omaliki fahat-enesug laruhuk ulug og-nitsi anyo ninim welahe su,” ulug, eheg, ebag.

¹⁴At Yesus waratsi fam, at waratuk ale indip foroho wereg on Iblis anyo, mun sebeloho foruk kwit, nit ap homi neneluk wereg lit, “Nabelal-habelal ala angge famen, waramuhuk e!” ulug, nenakol humon neg duruk mu, hetdeg hag welahe anyo, fiselaroho nenobahaku en, nit Yesus en, “Nomaliki,” ulug, hweag-nesauk anyo waratuk kahe nesalug, at oho nit higitdoho ap atsi.

¹⁶Aren it malaikat let-esauk fug. Ite, at Abraham ombasi let-esauk mu, enegdeg hauk kahe.

¹⁷Ai fam at Yesus, Imam Agung wereg lit, nenelaheg beheg, bok am fug angge dipdoho neg deheg, duruk on atlug, nit siag duruk kahe nesalug, Allah enda sako amag ulug nenesiag fahet waraik waikoho lit, nit nenepuk ale mundoho at higitdeg am ale atsi mu, atam su autsi nit anyo mun higitdeg neg dasi mu, fano hauk kahe.

¹⁸Ne at neg de, anggin-fanggin heheg, abut balduk mu heheg, duruk katsi mu, ketia re nit nenebut bal-nenepuk kweleg, aren let-nenepuk kam alereg.