Read Ninia Yali IBRANI 3 Bible Online

IBRANI 3 - Ninia Yali bible

IBRANI 3

¹Aireg ma, nori, nerekwi. Hit ninim at Allah en boholma lahakuk ulug hwi-nenepsireg, at obahet neg hit ninim eneko nenobahasi on su, yaho! Nit wene demdoho bolug fag-duruk kahe wene anyo, at Imam Agung, Allah en mon-nesa wahasi on Yesus anyo, fureberuk kamluhup.

² Atam at Musa anyo en de Allah ahainelekwe enebe re Allah obam wirig hag ulug, hwal-enepuk kwit, Allah enda bebag ale furoho duruk katfag ai hag, at Yesus anyo en, “At Nakni Allah en airoho duruk kamag ulug unduhuk nobahasi mu, at boruk ale furoho neg duruk karuhuk,” ulug, boruk kwit, duruk katsi.

³O wirig sebeleg kweleg, at o wutuk on leho wereg anyo hag, at Musa sebeleg kweleg, Allah en Yesus mun leho welaruhu bebag.

⁴Di o su o wutuk kahe anyo, aben neg wutuk famen, munangge manangge neg de at Allah en wal-debag.

⁵At Musa anyo en Allah amingming angge wereg lit, Allah enda bebag ale higitdoho Allah ahainelekwe furoho hwal-enepuk kwit, at Allah en fobik duhu wene ap homi eneluk amag ulug, hweag-esauk katfag.

⁶Ai famen, at Kristus neg de, Allah amloho wereg lit, Allah enda boruk ale higitdoho Allah ahainelekwe furoho fahat-enesug wereg. Ne, nit de, “At demdoho ai nenebuhu,” ulug, wene nenenda hambukdeg lit, ebetuk kahe anyo, embesouk fug angge seneg lamuhuk halug, Allah ahainelekwe on ai nit.

⁷ Aireg ma, at Allah Aheime en uruk kwit, “Henombasi o leimu wereg lit, enobam haro atlug, Allah wene nenerim, ulug, Allah olok apdoho hundig-hundig abut baleheg neg, hweag-itil lebag hag, yoho re, Allah en wene hweag-hesauk mu, holdil lauk kwit, Nenerim, ulug, henobam haro am fug.

⁹Leimu etma 40 tahun noruk kweleg, an henombasi enesahalimu along dil lauk mu, inil neebag famen, Olok duruk mu ninil haul ane, eleg a? ulug, hundig-hundig nabut bal-neeheg neg duruk katfag.

¹⁰Aireg ma, nolok en bet-enepihik. Bet-enepuk kwit, An nenda boruk kahi ale hweag-hesauk kahi anyo, wa fug angge wereg lit, henendan bolug, hesangge dil lauk kahep ma,

¹¹an kel wat-dauk kahimu, hit ninim kel wat-da kuhup fug, ulug, nolok en yeng baloho hweag-esauihik” ulug, ebag.

¹²Airoho ebag ma, hit eke en henenda siag deg kweleg, demdoho bouk fug angge en at Allah mundoho oluk neg wereg on anyo embeselug lahep ha no ulug, henenda furebahat-dauk kamek, nori, nerekwi.

¹³Ite, “Yoho re,” Allah wene fam ebag anyo owan deg wereg ma, hit siag duruk kwit, “Allah en nenowaruhu fug,” ulug, henenda lal-dalug henobam haro ahep ha no en, Allah en hweag-hesauk ale holduk kwit, henenda aho wat-wat atuk kamek.

¹⁴Nit atam wene hole folug, “Nenebuhu bebag anyo demdoho nenebuhu,” ulug, wauhuk wene anyo, o ahae fotog owan am fug mu, bug-bagdoho foroho welahe halug neg de, Kristus owe aut atuhukdeg welahe.

¹⁵ “Enobam haro atlug, Allah wene nenerim, ulug, Allah olok apdoho hundig-hundig abut baleheg neg hweag-itil lebag hag, yoho re, aren hweag-hesauk mu, Nenerim, ulug, henobam haro am fug,” ulug, ebag ale Allah wene fam lisu baleg wereg ai.

¹⁶ San Allah wene hole folug, deg kweleg, enobam haro atlug, Allah wene nenerim, ulug, Allah olok apdoho hweag-itil lebag? Eleg. Ap homi Israel on at Musa en mundoho Mesir en og-eneplug wilipfag anyo en neg de Allah olok apdoho hweag-itil lebag anyo eleg a?

¹⁷Ne, Allah en olok enobam foruk kweleg, 40 tahun duruk katfag anyo sa mel behep? Eleg. It siag dil lauk en enowatfag ma, leimu enowag solong il lebag anyo eleg a?

¹⁸Ne, “An kel wat-dauk kahimu hit ninim kel wat-da kuhup fug,” ulug, yeng baloho wene hweag-esebag ai, ap sa mel hweag-esebag behep? Eleg. It at ele sahaloho folug, enendan bolug dil lebag anyo eleg a? It henombasi ai neg.

¹⁹Ai halug, it henombasi en Allah ele demdoho bolug obam dip-debouk fug angge welatfag man, iren Allah kel wat-daukmu kuk fug alereg welatfag hehe.