Read Ninia Yali IBRANI 4 Bible Online

IBRANI 4 - Ninia Yali bible

IBRANI 4

¹Aireg ma, at ninim kel wat-da kuhuk ulug, wene abug hweag-nesebag anyo, eleg atuk eleg, owan wereg ma, hit eke en awene wauk kahep fug halug, inim kel wat-da kuk fug alereg ma hesa no, nit nenekol boruk kwit, furebahat-dauk kamul.

²Nit nenombasi wene hweag-esebag anyo hagdoho, nit oho wene Fano Wene hweag-nesausa. Ai famen de, wene it hweag-esebag anyo iren enesanggo hole folug, enenda demdoho bolug webag fug mu, fanoap da fug angge, we alemaroho holfag.

³ Ai halug, nit wene demdoho bolug wauhuk on anyo Allah inim kel wat-da kuhuk. At Allah en bohol kwenang su wal-duhuk bebag anyo, mun wal-debelug, kel wat-dauk kwit famen, “An kel wat-dauk kahimu, hit ninim kel wat-da kuhup fug, ulug, nolok en yeng baloho hweag-esauihik,” ulug, hweag-esebag higitdoho kuhuk.

⁴ Ne, ap eke en, nukoho sabit salim fahet Allah wene anyo fam lisu balduk kwit, “Ne, at Allah en di wal-deheg, su wal-deheg, mun wal-debebagdeg, nukoho sabit salim we bok wereg lit, kel wat-debag.” ulug, baleheg,

⁵ ne, ap eke en Allah wene fam lisu balduk kwit, “An kel wat-dauk kahimu, hit ninim kel wat-da kuhup fug,” ulug, ebag ale, baleheg, balfag ai fam,

⁶it atam wene Fano Wene enesanggo holfagdeg, sahaloho embesebag ma, Allah kel wat-daukmu kwik lebag fug mu, enobalma ap homi amu on inim, kel wat-da kwik lahup hauk kahe.

⁷ Ne, ekenim uruk kwit, “Yoho re, aren wene hweag-hesauk mu, Nenerim, ulug, henobam haro am fug,” ebag wene atam dam hweag-esebag man, tahun humdoho welatlug de, ap Daud anyo en fobik airoho ebag, ulug, lisu balfag ma, wene, “Yoho re,” ulug, Daud en balfag ai, Allah en nukoho amu salim fam ap homi amu on inim kel wat-da kuhup ulug, enda wenggele folug ebag hauk kahe.

⁸ At Yosua anyo en it ap homi Allah inim kel wat-dowag ulug, hondog-eneplug feseik kwik walep man, Allah en fobik eke salim uruk kwit, inim kel wat-dauk kamuhup abug wene ebag ai, elep fug.

⁹Ai halug, at Allah en nukoho sabit salim kel wat-debag anyo hag, ketia nit Allah omaliki oho kel wat-dauk kamuhuk ulug wenggeloho febag ma wereg.

¹⁰ Ap eke en Allah kel wat-daukmu ninim kel wat-da kuhuk boruk halug, at Allah en di wal-deheg, su wal-deheg, wal-debagdeg kel wat-debag anyo hag, higitdoho di deheg su deheg, mun debehureg, kel wat-dauk karuhu.

¹¹Aireg ma, it ap nenombasi Allah wene sahale folug embesebag ma, “Hit kel wat-da kuhup fug,” ulug, hweag-esebag anyo hag, nit higitdoho hweag-nesa no ulug, kel wat-da kwik lahuk en nit fik-furoho duruk kamukohon.

¹²Allah wene uruk on ai re, oluk wereg lit, di deheg su deheg duk alereg. Karog yaron aeg foma-foma maho on en enggalim owagma inim, abohwe elma inim, yuhuloho kweheg, lenggatuk anyo, olok maben hag famen, Allah wene neg de, olok nikale on deg ma, nenendama kuruk kwit de, nenendama kahaloho nenobahakeg, duk ale nenendama herako wenggelduk kahe anyo mundoho enamegma eneko feheg, duruk.

¹³Ne, nit ap homi inim, di angge su angge waldeg on inim, mundoho at Allah en il nesauk mu, misig eke at il nesauk fug, ulug, herag-am fug alereg. At Allah il hanim di angge su angge mundoho enamegma wereg ma, nit duruk kahe ale mundoho at oluk deg ma, niren duruhuk ale bilinggoho at neg hweag-umuhuk.

¹⁴Imam Agung Allah amloho Yesus anyo, bohol soba-soba angge sohwan-esalug emberimmu Allah weregma etmano neg kwik lahasireg, ketia nenobahet duruk kwit wereg ma, nit wene demdoho bolug fag-duruk kahe anyo, furoho foroho welamuhuk.

¹⁵Imam Agung anyo en, nit ap kwenangma on deg ma, nenobabe en naleg-haleg duruk kahe halug, “Nerim,” ulug, nenelaheg bouk fug angge nenepuk eleg. Ite, nit siag dukwag ulug nenobabut balduk ale hauk kahe anyo, at oho mundoho higitdoho neg hasi famen, at siag duk fug angge neg welatsi.

¹⁶Aireg ma, nenobabut balukwag ulug, anggin nenobam atuk ai salim, nenelaheg boruk kwit, let-nenepuk mu hahuk en, nenakol bouk fug angge, at Allah leho lit enda hundig en fahat-nenesug weregma etano horog aik lauk kamukohon.