Read Ninia Yali IBRANI 5 Bible Online

IBRANI 5 - Ninia Yali bible

IBRANI 5

¹Ap Imam Agung anyo, Allah en ap homi enenggelegman eneko feselug, ap homi en Allah obahet feik waharuk on Allah og-ereheg, ap homi siag duruk mu, enobahet waroho indok yaleheg, duruk kamag ulug, unduhuk feseruk anyo.

²At oho ap kwenangma on maben on deg ma, ap homi Allah wene furebouk fug angge siag duruk esalug, enda sakoreg lit, enobahet duruk kam alereg.

³ Ap homi enobahet waroho indok yalduk kwit, it enobahet neg fug famen, at oho ap kwenangma on siag duruk on deg ma, onggwareg asiag fahet mel waroho Allah obahet indok yalduk.

⁴ Ne, ap eke endan bolug, “An Imam Agung welaruhuk,” ulug, unduhuk fahat-dauk fug. Ite, Allah en ap Harun eneko unduhuk febag anyo hag, unduhuk feseruk.

⁵ Airoho at Kristus anyo en, “An Imam Agung welaruhuk,” ulug, unduhuk fahat-dasi fug. Ite, Allah en at hweag-utuk kwit, “Yoho, an den endag-habihi angge re, hat de an Namloho welahen,” ulug, ebag.

⁶ Ne, ekema Allah en uruk kwit, “Ap Melkisedek[4] dil lauk katfag anyo ambiangma, an Allah nil hanim ap homi enobahet hat mundoho duruk karuhun,” ulug, hweag-etfag ai fam, Allah en Kristus eneko unduhuk febag hauk kahe.

⁷ At Kristus ap homi higitdeg endag-atlug kwenangma suma dil noruk kwit, at wararuhu anyo, “Nahap wendat-nabin,” ulug, oba humon yatuk kwit, waratuk men, ahap wendaruk on Akni Allah hweag-ereheg, heng-deheg, disi. Disi ai, “Allah enda boruk ale nabukwag,” boruk kwit, disi mu, Allah en Amloho ele esanggo holsi.

⁸Ne, at Kristus Allah amloho deg kweleg, at ouk-bouk hauk katsi fam, Allah boruk ale halug neg duruk ale oluk atsi.

⁹Airoho duruk men, nit nenepuk ale olukdeg kweleg, siag disi fug halug, nit di ap homi su ap homi en at ele hole folug, higitdoho dil noruk kahe anyo mundoho, nenahap wendaroho neneluk mundoho welamuhuk en nenepuk indip at atsi mu,

¹⁰at Allah en, “Ap Melkisedek[5] dil lauk katfag anyo ambiangma, an Imam Agung hat welaruhun,” ulug, unduhuk fesi.

¹¹Wene Yesus Allah il hanim ap homi enobahet duruk ale ai fahet humdoho hweag-hesa ale famen, hit folo-folo furebelug wa fug angge atuhup mu, niren furoho hweag-hesa fug ale nenepuk.

¹² Hit o endam Allah wene holduk katuhup mu, hweag-esauk on guru alep fano famen, siburu wirik on na fug angge wereg lit, ag owe neg nauk hag, Allah wene indip on atam holduk katuhup on neg ekenim hweag-hesowag ulug duruk kahep ma, hisihi.

¹³It ag owe nauk anyo ai omalik fouon hag, Allah wene owan fureberuk fug lit, fano duk ale, siag duk ale inim, orohole eneruk fug alereg famen,

¹⁴siburu wirik on nauk halug ai, ap lohon enenda wereg on hag, Allah wene furebelug duruk mu re, fano duk ale, siag duk ale inim orohole eneruk alereg.