Read Ninia Yali IBRANI 6 Bible Online

IBRANI 6 - Ninia Yali bible

IBRANI 6

¹Aireg ma, Kristus disi wene demdoho boukwag ulug atam hweag-hesausa ai neg hweag-nesowag ulug duk fug. Ite, nit nenenda wirik apdoho nenobaharuk wene ai wauk kamuk. Wauk kwit de, o anduli belapuk anyo hag, atam niren, “Nit fano duruk kahe,” boruk kwit famen, siag duruk mu, waratuk katuhuk ale anyo, nenenda wenggele folug, embeseruk wene inim, Allah demdoho bolug obam dip-deberuk wene inim,

²ikma belap-enepuk ale[6] inim, ap enunggulmu enenggik sebele feseruk ale inim, ap homi wareg on enoluk apdoho inamuhup wene inim, o ahae fotogdoho Allah en ayo wiroho en-nenebuhu mu mundoho welamuhuk wene inim, wauhuk anyo, up sahaloho wauk kamuhuk fug.

³Ite, nit nenenda wirik apdoho nenobaharuk wene anyo wauk kamuk. Ne, Allah en fano boruk halug, nit airoho neg duruk kamul.

⁴It ap homi siag duruk katswa anyo embeselug, Allah wene wauk kwit, enendama seleg aheg, boholman onggoleg we og-nesauk anyo unduk neg-hauk hag heheg, Allah Aheime enendama weheg, Allah wene enendama fano enepuk ale eneluk aheg, ne, o ahae fotog salim Allah en omamne humon fam duhu anyo inim heheg, duswa famen, ai en embeselug, enambol sombandoho amu on dil lauk fam iren Allah amloho e salib fam nikangge dopnoroho folug, hummen enggali watuk mu, fobik it siag duswa anyo wenggele folug embesoukwag ulug hweag-esa fug alereg hahup.

⁷Osit di salim su salim nauk kwit, kwenang owe duruk fam ap yabuk wituk on fahet anggen fano neg yihiruk mu, Allah en, “Kwenang su fano,” ulug, fanoap deberuk famen,

⁸ hohol alok angge neg laharuk halug neg de, Allah en, “Kwenang su mun siag,” ulug, ele homan fouk alereg ma, harep fisaruhu en wereg.

⁹Airoho duhu ulug, hweag-hesehe famen, hit neg de, nenori, nenerekwi nenenda on, Allah en hit airoho henebuhu bolug ihi fug. Hit henahap mundoho wendareg lahep ma, Allah en fano on neg henepuk karuhu nolukdeg lit en ihi.

¹⁰At Allah en enda wenggeleg fam dipdoho duruk mu, hiren Allah eyabuk dil lauk kwit, at obam henenda hundig lit, Yesus omaliki let-enebeheg, duruhup inim, ketia owan let-enepuk kahep inim, apeleg aruhu fug.

¹¹O ahae fotog salim airoho nenebuhu wene demdoho boruk kahe anyo owan dip-uk fug kweleg, hit henemu hundomog henenda sug-sag uk fug angge ebetuk kwit, henemurururoho duruk kamuhup en, nenda yehei boruk kwit, hweag-hesehe.

¹²Allah wene wauk kwit, henenda koreg lit duk fug. Ite, it Allah en abug hweag-esebag wene demdoho bolug, enenda hambukdeg lit, bok am fug angge duruk mu halug, Allah en hweag-esebag ale higitdoho og-esebag etmano enowal-heheg duruk kamek.

¹³ At Allah en Abraham wene abug hweag-utuk kwit, “An den fanoap hobahakuk mu, hombasi humdoho endag-amuhup, ulug, an Hakni Allah en demdoho hweag-hirihi,” ulug, at unuk neg leho kweleg, eke wereg fug mu, at onggwareg unuk hombuk baloho hweag-etfag.

¹⁵Hweag-etfag ma, at Abraham en, “Airoho nabuhu,” demdoho bolug, enda hambukdeg lit, nangnoruruk katfag ma, Allah en hweag-etfag on dip-uruk mu hebag.

¹⁶Ap eke at ele mun demdoho boukwag ulug, ap anggilug wereg on unuk hombuk baloho hweag-utuk ai fam, suahal uruk kwit de, wene onggo-onggo uruk anyo bale foruk.

¹⁷Anyo hag, at Allah en enda boruk kwit, “An den Abraham wene abug hweag-itmin on aham-duhuk fug. Ite, at Abraham ambiangma welamuhup on wene su demdoho neg enegdeg ma hahup,” bolug, Abraham hweag-utuk kwit, at onggwareg unuk hombuk baloho hweag-etfag.

¹⁸At Allah en wene eke enda wenggele folug Abraham abug hweag-ereheg, ai en, eke, seiale bouk no ulug, at unuk hombuk baloho hweag-ereheg, debag ai, wene abug indip aham-duk fug alereg on biren ai fam, at Allah en nit nenahap wendat-nenebukwag ulug, at obam dip-debeik lauhuk anyo, at wene abug ebag anyo demdoho bolug, ebereg lit, nenenda hambuk atlug, bik-bok welamag ulug, debag.

¹⁹ Eke kapal anyo, ik en walug la no ulug, bosie manggen anggin on kumbi ililoho ik ahummu belapuk anyo hag, nit nenenda ai, nenenda demdoho bolug ebetuk kahe anyo fam, hambukdeg lit, bik-bok welahe. Kapal bosie manggen anggin on ililig lit, bik-bok wereg anyo hag, nit nenenda demdoho bolug ebetuk kahe ai, Allah obam wirig boholma on etmano sum bul hwiliroho suknig kweleg, ousama ilonggoma kwik lalug ililig hag wereg.

²⁰ Ap Melkisedek duruk katfag anyo ambiangma, Imam Agung mundoho hundig-hundig nenobahet duruk kamag ulug Yesus unduhuk febag ma, nit fobik kuhuk en, at atam kwe yako feil kwik lasireg wereg.