Read Ninia Yali IBRANI 7 Bible Online

IBRANI 7 - Ninia Yali bible

IBRANI 7

¹ Ap Melkisedek anyo ap homi o Salem on enowe unuk bogdeg raja fahat-enesug wereg lit, at Allah mun leho wereg anyo il hanim eke enobahet duruk on imam welatfag. At airoho wereg kweleg, eke salim at Abraham dog abil lauk kwit, ap enowesi enunuk bogdeg sebele feselug, obam waharuk mu, at ap Melkisedek olohotma wilibik lebagdeg, at Melkisedek anyo en, “Allah en fanoap habukwag,” ulug, hweag-etfag ma,

²Abraham en ap enowatil lauk kwit, enengge hwelil lebag anyo mundoho wenag-halug, minggiroho sohoen fahat-dauk kwit, numon ai, Allah angge, ulug, Allah obahet at ap Melkisedek og-etfag. (Ap Melkisedek unuk soaleg ai, nit nenele fam atam, Fano Neg Duruk On Enowe Raja fahet eheg, ne, eke at o Salem on enowe unuk bogdeg welatfag ma, unuk eke, Ap Homi Enenda Hambukdeg Lit Seberoho Wereg On Enowe Raja fahet eheg, uruk katfag.)

³At Melkisedek anyo, ombasi inim, akni isinga inim, at endag-atfag ale inim, waratfag ale inim, bilinggoho lisu baleg eleg ai fam, at Allah Amloho hag, Allah il hanim ap homi enobahet duruk on imam mundoho eitog on wereg.

⁴Aireg ma, at Melkisedek ai, mun leho wereg ai furebeiyek! At Abraham anyo, nit mundoho nenemulik leho on welatfag famen, dog abil lauk kwit, ap enengge hwelil lebag anyo numon minggiroho Allah obahet ap Melkisedek og-etfag ai fam, at Melkisedek anyo ap mun leho on welatfag hauk kahe.

⁵ Eke Lewi ambiangma on anyo, Allah en, “An nil hanim ap homi enobahet duruk kamuhup,” bolug, unduhuk fesebag higitdoho duruk kweleg, at Allah en it Israel on wene melale feseruk kwit, “Henemunangge manangge numen hag wereg halug, misig minggiroho an nobahet foruk kamuhup mu, it Lewi on neg wauk kamuhup,” ulug, wene melale fesebag ma, it Lewi on en, it on enori Abraham ombasi famen, deg kweleg, airoho wauk katfag.

⁶Airoho wauk katfag famen, at Melkisedek neg de, Lewi on fug famen, Abraham en Allah obahet minggiroho og-etfag ma, at Melkisedek en webagdeg, Allah wene abug hweag-etfag on Abraham fam, “Allah en fanoap habukwag,” ulug, hweag-etfag.

⁷It ap enalong wereg on en it enapma sebeleg on fanoap debeseruk ai nenolukdeg famen,

⁸it ap Lewi on imam ai neg deg waratuk on en Allah obahet foruk on num on wauk katfag famen, at Melkisedek anyo neg de oluk mundoho eitog wereg lit, airoho webag, ulug, Allah wene fam lisu baleg wereg.

⁹Ne, Lewi ai Abraham omba deg ma, ap Melkisedek anyo en Abraham akit wilibik lebag ma, Abraham anyo en at Lewi endag-am fug mu ebe fam owan wereg kweleg, numon og-etfag ma, it Lewi on numon wauk kam on anyo en numon Melkisedek og-etfag uk alereg.

¹¹It Lewi ombasi Allah il hanim ap homi enobahet duruk kweleg, Allah en wene diroho diyug, airoho diyug, ulug, ap homi Israel on wene melale fesebag. Ai famen, it Lewi on anyo en ap homi enobahet duruk kwit, mun fanoap debesouk fug alereg latfag. Mun fanoap debesouk alereg lalep man, fobik ap Imam Harun ombasi on de fug, ite, ap imam amu on nik on eke Melkisedek ambiangma on enam alep fug.

¹²Ai halug, it Allah il hanim ap homi enobahet duruk on sebeloho feselug, obalma amu on keron eke duruk kamag ulug unduhuk foruk kwit, wene keron eke melale foruk.

¹³Su fahet ihi. At Tuhan Yesus en neg duruk karuhu mu, ulug, ihi. At unggul unuk amu on deg ma, at unggul unuk on ai en Allah il hanim ap homi enobahet duruk on imam eke welatfag fug.

¹⁴At Yesus unggul unuk Yehuda on ai, nit mundoho nenelukdeg. Ne, at Musa en ap Allah il hanim nenobahet duruk kamuhup wene melale feseruk kwit, ap Yehuda on fahet eke ebag fug.

¹⁵Ap unggul unuk amu on eke Melkisedek hag, Allah il hanim nenobahet duruk kamag ulug, enam atlug inatsi ai fam, at Allah en enunggul unuk Lewi on anyo embesesi ai mun enegdeg.

¹⁶Ap eke Melkisedek hag Allah il hanim nenobahet duruk kamag ulug unduhuk fesi indip ai, ap homi en, “Ap ai on ondoho halug, eke Allah il hanim nenobahet duruk karuhu,” ulug, wene melaleg anyo fam unduhuk fesi fug. Ite, at mundoho eitog oluk wereg lit, along wereg ai fam Allah en unduhuk fesi.

¹⁷ At Allah en at anyo halug, fag-duruk kwit, “Ap Melkisedek dil lauk katfag anyo ambiangma, hat an Allah nil hanim ap homi enobahet mundoho hundig-hundig duruk karuhun,” ulug, fag-debag anyo, Allah wene fam lisu baleg wereg.

¹⁸Ne, Allah en Musa wene melale foruk kwit, hweag-etfag anyo, it ap homi en, “Fano duruk kamul,” bolug, duruk kweleg, fanoap enebuk fug alereg en, “Diroho diyug, airoho diyug,” ulug, wene atam melalfag anyo mabendeg alemaroho deg ma, embeselug, ketia wene nigon keron ename fesi mu, niren, “Wene su fanoap nenebuhu hehe,” ulug, demdoho bolug ebereg welahe ai fam, Allah akit horog aik lauk kahe halereg.

²⁰ It atam Allah il hanim ap homi enobahet duruk kamag ulug, unduhuk feseruk kwit, seiale bouk no ulug, Allah unum hombuk baloho unduhuk fesebag fug famen, at Allah en at amloho unduhuk foruk kwit neg de, “Hat an Allah nil hanim ap homi enobahet mundoho hundig-hundig duruk karuhun, ulug, an Hakni Allah nonggwareg nunuk hombuk baloho hweag-hirihi mu, nele aham-duhuk fug,” ulug, seiale bouk no ulug, at unuk hombuk baloho unduhuk febag.

²²Ai halug, at Yesus nenobahet along duruk kamag ulug, wenggeloho febag ai duruk kwit, abug wene atam dahan atuk katfag anyo hag, dahan aruhu fug. Ite, ketia mun higitdoho dip-uhu angge re, Yesus en duruk wene mun along deg.

²³Ne, eke, it imam atam on omano, mundoho hundig-hundig duruk katfag fug. Ite, eke waratuk kweleg, obalma eke unduhuk feseheg duruk katfag ma, enebe humdoho welatfag famen,

²⁴Yesus neg de, mundoho eitog wereg ma, eke obalma inatlug duruk karuhu fug. At amu en neg mundoho hundig-hundig duruk karuhu.

²⁵Aireg ma, at Yesus anyo at mundoho oluk eitog wereg lit, nenobahet ninili oko Allah hweag-utuk kwit wereg ma, nit ap homi at obam dip-debelug Allah akit lahuk boruk kahe halug, ketia fobik mundoho nit nenahap wendat-nenepuk kam alereg.

²⁶Ai halug, nit nenendaman de, “Ap eke airoho nit wereg lahe ale fu nesalug, Allah il hanim nenobahet duruk kalep e!” ulug, boruk kahe on, Allah en Yesus at Imam Agung unduhuk fesi. At enda obabut fanoreg lit, at siag eke mun duk fug angge dil lauk katsi mu, “At siag eke disi,” ulug, enele at obam dopno ha fug alereg ma, at ap homi siag duruk on enenggelegman, eneko bohol soba-soba angge sohwan-esalug, mun emberimmu leho fesi mu wereg.

²⁷ It imam agung omano en hupmu hubet ap homi enobahet waroho Allah og-utuk kwit, atam enonggwareg siag duruk on eleg amag ulug, Allah og-ereheg, ai en, fobik ap homi siag duruk on eleg amag ulug, enobahet Allah og-ereheg, duruk katfag anyo hag, at Yesus airoho duruk eleg. At Yesus neg de, “It siag duruk anyo elehapdoho feikoho an enobahet wararuhuk,” ulug, it enesiag eleg amag ulug Allah obahet waroho og-utuk katfag anyo hag, nit siag duruk kahe elehapdoho fohuk ulug, at misiham mun lebegdoho nenobahet waratsi.

²⁸Musa wene melaleg higitdoho duruk kwit, it ap kwenangma on siag duruk kweleg, Imam Agung welamag ulug, unduhuk feseruk famen, Allah en at amloho unduhuk foruk kwit, seiale bouk no ulug, unuk hombuk baloho ebag anyo, wene melaleg Musa hweag-etfag anyo atam deg kweleg, ebag ma, at amloho nit nenepuk ale at olukdeg kweleg, siag disi fug mu, nenobahet duruk kam on furoho neg mundoho mundoho duruk karuhu en unduhuk fesi mu wereg.