Read Ninia Yali IBRANI 8 Bible Online

IBRANI 8 - Ninia Yali bible

IBRANI 8

¹ Nit uruk kahe su anyo, indip furoho hweag-hesa. Imam Agung airoho nenobahet duruk on de, Nenakni mun leho on Allah boholma fahat-nenesugmu enggik bekit fil hwerieg wereg.

²It ap Imam Agung en o sabo hag angge sum fam wiroho, Allah il hanim ap homi enobahet duruk katfagma kemah fam etmano duruk eleg. At de, Allah en ebe on wiroho febag ma Ambe Mun Amu Enegma etano kulug, nenobahet duruk kwit wereg.

³It imam agung eneko unduhuk feseruk anyo, di angge su angge Allah obahet feheg, at owam waroho og-ereheg, duruk kamag ulug, eneko unduhuk feseruk anyo hag, nit nenobahet duruk on nenowe Imam Agung anyo oho, nenobahet duruk kwit, at we hesangge duruk kam fug alereg. Aren oho, nit nenobahet Allah og-utuk on eke og-om ale fano.

⁴Ne, nenobahet duruk on imam ai, kwenangma suma ninim welalep man, at Musa en, “Allah airoho og-utuk kamek,” ulug, melale fesebag ale higitdoho og-utuk on enebe humdoho duruk mu, at Yesus de nenowe imam duruk kalep fug.

⁵ At Musa duruk karuhumu o sabo hag angge sum fam kemah wuruhuk ulug duruk mu, at Allah en hweag-utuk kwit, “Hat domma ninim wereg lit, Diroho wuruhun, ulug, unug-hitihik anyo higitdoho wuruhun en, fureberuk kamin!” ulug, hweag-etfag ma, o ebe boholma wirig wereg kweleg, it Allah il hanim ap homi enobahet duruk on ai, we ahut wal-heheg wirigmu ap homi enobahet duruk mu, hauk kahe.

⁶Ne, Allah en atam Musa abug hweag-etfag wene wereg kweleg, it ap imam ap homi enobahet duruk kweleg, fanoap enebuk fug ale atuk en, ai mabendeg kweleg, ketia re at Yesus nenobahet duruk ai re, Allah en wene nigon keron abug hweag-nesebag along wereg hag, at Yesus en wene nigon ai halug, Allah il hanim nenobahet duruk ai, along humon hauk kahe.

⁷Wene atam Allah en Musa hweag-etfag anyo duruk kweleg, fanoap enepuk kalep man, wene nigon keron ai fobik wenggeloho abug hweag-neselep fug.

⁸ Famen de, Allah en at omaliki wene atam on ai wereg kweleg, siag duruk mu esebagdeg, enebug uruk kwit, “Hit ap homi Israel on inim, Yehuda on inim, hit wene nigon keron wenggeloho abug hweag-hesahuk salim enam aik waharuk, ulug, an Henakni Allah en demdoho hweag-hisihi.

⁹Wene nigon keron wenggeloho abug hweag-hesahuk ihi ai, it henombasi o Mesir en enenggik sen-eneplug, wilibik waharihikdeg, Airoho henebuhuk, ulug, wene hweag-esauihik anyo hag fug. Airoho henebuhuk, ulug, wenggeloho hweag-esauihik anyo, it furebelug, dil la fug angge welatswa ma, an Enakni Allah en lin-esauihik mu, wene ai on ekenim hweag-hesahuk fug.

¹⁰An Tuhan Allah en, Hit Israel on henobahet fobik duhuk wene nigon keron wenggeloho abug hweag-hesahuk, ulug, ihi su. An den, Diroho diyug, airoho diyug, ulug, nawene melaleg hweag-esauk kahi ai, ebereg welamuhup en, enendama wenggel-eseheg, ne, enapeleg am no, enendama lisu hag baloho feseheg, duruk kwit, an Enakni Allah fahat-enesug weregma, it an nomaliki welamuhup.

¹¹It ap homi lohon et, enomaliki doron et, mundoho, Enakni an eneluk amuhup mu, ap eke en are eke hweag-utuk kwit, at Tuhan Allah airoho wereg, ulug, hweag-ereheg, ne, owe en aut eke hweag-utuk kwit, Hakni Tuhan Allah holuk amin, ulug, hweag-ereheg, ulug, duhup fug.

¹²It siag duruk on ai an mundoho ebereg laruhuk fug. Enelaheg boruk kwit, enesiag mundoho napeleg apdoho feseruk karuhuk,” ulug, hweag-esebag.

¹³“Wene nigon keron wenggeloho abug hweag-esahuk,” ebag ai fam, wene atam ebag anyo mining atsi mu, ulug, embesesi. Ne, di angge su angge atam on mining aheg, maben aheg, atuk halug, fobik eleg atuk.